[1] ᐃᐢᐱ ᒫᑲ ᐁ ᐊᔭᒥᐦᐁᑭᓯᑳᐠ ᑳ ᒪᔮᐢᑲᒧᐸᔨᐠ, ᒣᕒᐃ ᒫᐠᑕᓬᐃᐣ ᒥᓇ ᒣᕒᐃ ᐅᑳᐃᐧᔭ ᒉᒥᐢ, ᒥᓇ ᓴᓬᐅᒥ ᑭ ᐊᑖᐁᐧᐊᐧᐠ ᒪᐢᑭᑭᔭ ᐁ ᐃᐧ ᐯ ᓇᑕᐃᐧ ᒪᐢᑭᑭᐊᐧᐋᐧᒋᐠ.
[2] ᐃᐧᐸᐨ ᒫᑲ ᑫᑭᓭᐹ ᓂᐢᑕᑦ ᐁ ᑭᓯᑳᐠ ᐁᐊᐧᑯ ᐁ ᐃᐢᐸᔨᐠ, ᑭ ᑕᑯᓯᓇᐧᐠ ᓇᐦᐃᓂᑐᐃᐧᑲᒥᑯᕽ ᐁ ᓵᑳᐢᑌᐠ.
[3] ᐊᔨᑌᐧᐊᐧᐠ ᒫᑲ ᐃᐧᔭᐋᐧᐤ, ᐊᐁᐧᓇ ᐅᐱᒣ ᑫ ᐃᓯ ᑎᑎᐱᓇᒫᑯᔭᕽ ᐊᓯᓂᔭ ᑳ ᑭᐸᐱᐟ ᐁ ᐃᐢᑳᐧᑌᒥᐊᐧᕽ ᓇᐦᐃᓂᑐᐃᐧᑲᒥᐠ?
[4] ᐁ ᐃᑖᐱᒋᐠ ᒫᑲ, ᐳᑎ ᐋᐧᐸᒣᐊᐧᐠ ᐊᓂᐦᐃ ᐊᓯᓂᔭ ᐁ ᑭ ᐊᓭ ᑎᑎᐱᓂᒥᐦᐟ: ᒋᑫᒫ ᒥᐢᑕᐦᐃ ᑭ ᒥᒑᐱᐢᑭᓯᔨᐊᐧ.
[5] ᐁ ᐱᐦᑐᑫᒋᐠ ᒫᑲ ᓇᐦᐃᓂᑐᐃᐧᑲᒥᑯᕽ, ᐋᐧᐸᒣᐊᐧᐠ ᐅᐢᑭᓂᑭᐊᐧ ᐁ ᐊᐱᔨᐟ ᑭᐦᒋᓂᐢᑭᕽ ᐃᑌᑫ, ᐋᐧᐱᐢᑲᓵᑲᐩ ᐁ ᑭᑭᐢᑲᒥᔨᐟ; ᐁᑯᓯ ᑭ ᒫᒪᐢᑳᑌᔨᑕᒪᐧᐠ.
[6] ᑭ ᐃᑎᑲᐧᐠ ᒫᑲ, ᐁᑳᐃᐧᔭ ᒫᒪᐢᑳᑌᔨᑕᒧᐠ: ᑭ ᓇᑐᓇᐋᐧᐋᐧᐤ ᒋᓴᐢ, ᐊᓇ ᓈᓴᕒᐃᐣ, ᑳ ᑭ ᒋᐢᑕᐋᐢᑲᐧᑎᐟ: ᑭ ᐊᐧᓂᐢᑳᐤ; ᓇᒪᐃᐧᔭ ᐅᑕ ᐊᔮᐤ; ᒫᑎᑲ ᐃᑕ ᑳ ᑭ ᐱᒥᓯᒫᒋᐠ!
[7] ᒫᑲ ᓂᔮᐠ, ᐃᐧᐦᑕᒫᒫᕽ ᐅ ᑭᐢᑭᓄᐦᐊᒪᐋᐧᑲᓇ ᒥᓇ ᐱᑕᕒ, ᑭ ᓂᑳᓄᑖᑯᐋᐧᐤ ᑳᓬᐊᓬᐃᕽ: ᐁᑯᑕ ᑫ ᐋᐧᐸᒫᔦᐠ ᑳ ᑭ ᐃᑎᑯᔦᐠ.
[8] ᐁᑯᓯ ᐃᐧᔭᐋᐧᐤ ᑭ ᐊᐧᔭᐃᐧᐊᐧᐠ, ᒥᓇ ᑭ ᑕᐸᓯᐊᐧᐠ ᓇᐦᐃᓂᑐᐃᐧᑲᒥᑯᕽ ᐅᐦᒋ; ᒋᑫᒫ ᓇᓇᒥᐸᔨᐃᐧᐣ ᒥᓇ ᒫᒪᐢᑳᑕᒧᐃᐧᐣ ᑭ ᐅᑎᑎᓂᑲᐧᐠ: ᐁᑯᓯ ᓇᒪᐃᐧᔭ ᐊᐃᐧᔭ ᓈᐣᑕᐤ ᐃᑌᐊᐧᐠ; ᐃᐧᔭ ᐁ ᓭᑭᓯᒋᐠ.
[9] ᐁᑲᐧ ᒫᑲ ᐃᐢᐱ ᑳ ᐊᐧᓂᐢᑳᐟ ᐃᐧᐸᐨ ᐁ ᑫᑭᓭᐹᔮᐠ ᐁ ᐯᔭᑯ ᑭᓯᑳᐠ ᐁᐊᐧᑯ ᐁ ᐃᐢᐸᔨᐠ, ᑭ ᓄᑯᐦᐃᓱᐢᑕᐁᐧᐤ ᓂᑳᐣ ᒣᕒᐃ ᒪᐠᑕᓬᐃᓇ, ᐊᓂᐦᐃ ᑳ ᑭ ᐅᐦᒋ ᐊᐧᔭᐃᐧ ᐁᐧᐱᓈᐟ ᐁ ᑭᑭᐢᑳᑯᔨᐟ ᑌᐸᑯᑊ ᒪᒋ ᐊᐦᒑᐦᑲᐧ.
[10] ᐃᐧᔭ ᒫᑲ ᑭ ᓇᑕᐃᐧ ᐃᐧᐦᑕᒪᐁᐧᐤ ᐊᓂᐦᐃ ᑳ ᑭ ᐃᐧᒉᑯᐟ, ᐁ ᐱᑫᐧᔨᑕᒥᔨᐟ ᒥᓇ ᐁ ᒫᑐᔨᐟ.
[11] ᐁᑯᓯ ᐁᐊᐧᑲᐧᓂᐠ, ᐃᐢᐱ ᐱᐁᑕᑭᐠ ᐁ ᐱᒫᑎᓯᔨᐟ ᒥᓇ ᐁ ᑭ ᐋᐧᐸᒫᔨᐟ ᓇᒪᐃᐧᔭ ᑖᐯᐧᑕᒪᐧᐠ.
[12] ᒣᐧᐢᑕᐢ ᐃᔨᑯᕽ ᒫᑲ ᑭ ᓄᑯᐦᐃᓱᐢᑕᐁᐧᐤ ᐱᑐᐢ ᐃᓯ ᓂᓱ ᐁᐊᐧᑲᐧᓂ, ᐁ ᐸᐱᒧᑌᔨᐟ, ᐃᑕ ᐁᑳ ᐁ ᐅᑌᓈᐊᐧᕽ ᐁ ᐃᑐᐦᑌᔨᐟ.
[13] ᐁᑯᓯ ᐁᐊᐧᑲᐧᓂᐠ ᑭ ᓯᐯᐧᑌᐊᐧᐠ ᒥᓇ ᑭ ᐃᐧᐦᑕᒪᐁᐧᐊᐧᐠ ᐊᓂᐦᐃ ᑯᑕᑲ: ᒫᑲ ᐃᐧᔭᐋᐧᐤ ᒥᓇ ᓇᒪᐃᐧᔭ ᑖᐯᐧᑖᑲᐧᐠ.
[14] ᒣᐧᐢᑕᐢ ᐃᔨᑯᕽ ᒫᑲ ᑭ ᓄᑯᐦᐃᓱᐢᑕᐁᐧᐤ ᐊᓂᐦᐃ ᒥᑖᑕᐟ ᐯᔭᑯᓵᑊ ᐁ ᐊᐱᔨᐟ ᐁ ᒥᒋᓱᔨᐟ; ᐁᑯᓯ ᑭ ᐋᓀᐧᔨᒣᐤ ᐅᐟ ᐊᓀᐧᑕᒧᐃᐧᓂᔨᐤ ᒥᓇ ᐅ ᒪᐢᑲᐃᐧᑌᐁᐃᐧᓂᔨᐤ ᐅᐦᒋ, ᒋᑫᒫ ᐁᑳ ᐁ ᑖᐯᐧᑕᐋᐧᔨᐟ ᐊᓂᐦᐃ ᑳ ᑭ ᐋᐧᐸᒥᑯᐟ ᓵᓴᐩ ᐁ ᑭ ᐊᐧᓂᐢᑳᐟ.
[15] ᑭ ᐃᑌᐤ ᒫᑲ, ᐃᑐᐦᑌᐠ ᒥᓯᐁᐧᐢᑲᒥᐠ, ᒥᓇ ᐃᐧᐦᑕᒫᕽ ᒥᔪ ᐋᒋᒧᐃᐧᐣ ᑲᐦᑭᔭᐤ ᑳ ᑭ ᐅᓯᐃᐦᐟ.
[16] ᐊᓇ ᑳ ᑖᐯᐧᑕᕽ ᒥᓇ ᑳ ᐸᑊᑕᐃᓯᐃᐧᐦᐃᐦᐟ ᑭᑕ ᐱᒫᒋᐦᐋᐤ; ᒫᑲ ᐊᓇ ᐁᑳ ᑳ ᑖᐯᐧᑕᕽ ᑭᑕ ᓇᓂᐳᒫᐤ.
[17] ᐅᐦᐃ ᒫᑲ ᑭᑕ ᐊᑎ ᐅᐦᒋ ᑭᐢᑭᓇᐋᐧᑌᔨᑖᑯᓯᐊᐧᐠ ᐊᓂᑭ ᑳ ᑖᐯᐧᑕᐦᑭᐠ: ᓂ ᐃᐧᔪᐃᐧᓂᕽ ᑭᑕ ᐊᐧᔭᐃᐧ ᐁᐧᐱᓀᐊᐧᐠ ᒪᒋ ᐊᐦᒑᐦᑲᐧ; ᑭᑕ ᐱᑭᐢᑫᐧᐊᐧᐠ ᐅᐢᑭ ᑭᓭᐧᐃᐧᓇ;
[18] ᑭᑕ ᐅᑎᓀᐊᐧᐠ ᑭᓀᐱᑲᐧ, ᑭᐢᐱᐣ ᒫᑲ ᒥᓂᑫᐧᑖᐧᐃᐧ ᐁ ᓂᐸᐃᐁᐧᐠ ᑫᑲᐧᐩ, ᓇᒪᐃᐧᔭ ᓈᐣᑕᐤ ᑭᑕ ᐃᑎᐢᑳᑲᐧᐠ; ᑭᑕ ᓵᒥᓀᐊᐧᐠ ᐅᑖᑯᓯᐊᐧ ᐁᑯᓯ ᑭᑕ ᒥᔪ ᐊᔮᔨᐊᐧ.
[19] ᐁᑲᐧ ᒫᑲ ᑳ ᑎᐯᔨᐦᒋᑫᐟ ᒋᓴᐢ ᐃᐢᐱ ᐅᒪ ᑳ ᐊᔨᑖᐟ, ᑭ ᐅᑎᓈᐤ ᑭᐦᒋ ᑭᓯᑯᕽ, ᐁᑯᓯ ᑭ ᓇᐦᐊᐱᐤ ᐅ ᑭᐦᒋᓂᐢᑭᔨᕽ ᑭᓭᒪᓂᑐᐊᐧ.
[20] ᐃᐧᔭᐋᐧᐤ ᒫᑲ ᑭ ᓯᐯᐧᑌᐊᐧᐠ ᒥᓇ ᑭ ᑲᑫᐢᑭᒥᐁᐧᐊᐧᐠ ᒥᓯᐁᐧᐃᑌ, ᑳ ᑎᐯᔨᐦᒋᑫᔨᐟ ᐁ ᐃᐧᒋ ᐊᑐᐢᑫᒥᑯᒋᐠ, ᐁᑯᓯ ᐁ ᐋᔮᑕᐢᑖᔨᐟ ᐃᑌᐧᐃᐧᐣ ᑭᐢᑭᓇᐋᐧᒋ ᐃᓯᐦᒋᑫᐃᐧᓇ ᐁ ᐊᑎ ᓄᑲᐧᑭ. ᐁᒣᐣ.