[1] ᐁ ᐊᑎ ᐊᐧᔭᐃᐧᐟ ᒫᑲ ᑭᐦᒋ ᐊᔭᒥᐦᐁᐃᐧᑲᒥᑯᕽ ᐅᐦᒋ, ᐯᔭᐠ ᐅ ᑭᐢᑭᓄᐦᐊᒪᐋᐧᑲᓇ ᑭ ᐃᑎᐠ, ᑫᐢᑭᓄᐦᐊᒫᑫᔭᐣ, ᐋᐧᐸᒥᐠ, ᐁ ᐃᓯᓈᑯᓯᒋᐠ ᐅᑭ ᐊᓯᓂᔭᐠ ᒥᓇ ᐁ ᐃᓯᑖᕽ ᐅᐦᐃ ᐋᐧᐢᑳᐦᐃᑲᓇ!
[2] ᒋᓴᐢ ᒫᑲ ᑭ ᐃᑌᐤ, ᑭ ᐋᐧᐸᑌᐣ ᒋ ᐅᐦᐃ ᑭᐦᒋ ᐋᐧᐢᑳᐦᐃᑲᓇ? ᓇᒪᐋᐧᐨ ᐯᔭᐠ ᐊᓯᓂ ᑭᑕ ᐃᐢᑯᓈᐤ ᐁ ᐋᑭᐧᑕᐋᐧᐱᐢᑭᓯᕽ, ᐁᑳ ᑭᑕ ᓂᒋᐁᐧᐱᓂᐦᐟ.
[3] ᐁ ᐊᐱᐟ ᒫᑲ ᐊᓬᐃᑊᐢ ᐊᐧᒋᕽ ᑎᐱᐢᑯᐨ ᑭᐦᒋ ᐊᔭᒥᐦᐁᐃᐧᑲᒥᑯᕽ, ᐱᑕᕒ ᒥᓇ ᒉᒥᐢ ᒥᓇ ᒑᐣ ᒥᓇ ᐋᐣᑕᕒᐅ ᓂᓯᕽ ᑭ ᑲᑫᐧᒋᒥᐠ.
[4] ᐃᐧᐦᑕᒪᐃᐧᓈᐣ, ᑖᓂᐢᐱ ᐅᐦᐃ ᑫ ᐃᑭᑭ? ᒥᓇ ᑫᑲᐧᐩ ᑫ ᐅᐦᒋ ᑭᐢᑭᓇᐋᐧᑌᔨᑖᑲᐧᕽ ᐃᐢᐱ ᑲᐦᑭᔭᐤ ᐅᐦᐃ ᐃᐧ ᐊᑎ ᑎᐱᐸᔨᑳᐧᐃᐧ?
[5] ᒋᓴᐢ ᒫᑲ ᑭ ᒫᒋ ᐃᑌᐤ, ᒣᔮᑳᐧᑦ ᐁᑳ ᐊᐃᐧᔭᐠ ᐊᔨᓯᔨᓂᐤ ᑭᑕ ᐊᐧᓂᒥᑎᒣᑕᐃᑯᔦᐠ.
[6] ᒥᐦᒉᐟ ᑭᑕ ᐯ ᐃᑐᐦᑌᐊᐧᐠ ᓂ ᐃᐧᔪᐃᐧᓂᕽ ᐁ ᐃᑌᐧᒋᐠ, ᓂᔭ ᐁᐊᐧᑯ; ᐁᑯᓯ ᒥᐦᒉᐟ ᑭᑕ ᐊᐧᓂᒥᑎᒣᑕᐁᐊᐧᐠ.
[7] ᐃᐢᐱ ᒫᑲ ᐯᐦᑕᒣᑯ ᓄᑎᓂᑐᐃᐧᓇ ᒥᓇ ᐁ ᐋᑐᑖᑲᐧᑭ ᓄᑎᓂᑐᐃᐧᓇ, ᐁᑳᐃᐧᔭ ᒥᑯᐢᑳᑌᔨᑕᒧᐠ: ᐅᐦᐃ ᐅᒋᑕ ᐱᑯ ᑭᑕ ᑎᐱᐸᔨᑭ; ᒫᑲ ᓇᒣᐢᑲᐧ ᑭᓯᐱᐸᔨᐤ.
[8] ᒋᑫᒫ ᐯᔭᑯᐢᑳᐣ ᐊᔨᓯᔨᓂᐊᐧᐠ ᑭᑕ ᐸᓯᑯᐢᑕᐁᐧᐊᐧᐠ ᑯᑕᑲ ᐁ ᐃᑕᐢᑳᓀᓯᔨᐟ, ᒥᓇ ᐅᑌᓇᐃᐧᐃᐧᐣ ᑯᑕᐠ ᐅᑌᓇᐃᐧᐃᐧᐣ: ᐁᑯᓯ ᑭᑕ ᑭᑲᐧᐣ ᐹᐱᑐᐢ ᐃᑕ; ᑭᑕ ᓄᑌᑲᑖᓂᐊᐧᐣ: ᐁᐊᐧᑲᐧᓂ ᐅᐦᐃ ᐁ ᒫᒋᐸᔨᑭ ᑯᑕᑭᑖᐃᐧᓇ.
[9] ᒫᑲ ᐊᔮᑲᐧᒥᓯᐠ ᑭᔭᐋᐧᐤ; ᒋᑫᒫ ᑭ ᑲ ᐸᑭᑎᓂᑯᐋᐧᐊᐧᐠ ᐅᔭᓱᐁᐧᐃᐧᓂᕽ; ᒥᓇ ᑭ ᑲ ᐸᐸᑲᒪᐅᑲᐃᐧᓈᐋᐧᐤ ᐊᔭᒥᐦᐁᐃᐧᑲᒥᑯᕽ; ᒥᓇ ᑭ ᑲ ᐅᑎᐢᑲᐃᐧᑳᐸᐃᐧᐢᑕᐋᐧᐋᐧᐊᐧᐠ ᐅᔭᓱᐁᐧᐃᐧᑭᒫᐊᐧᐠ ᒥᓇ ᑭᐦᒋ ᐅᑭᒫᐊᐧᐠ ᓂᔭ ᐅᐦᒋ, ᑭᑕ ᐋᒋᒧᐢᑕᐋᐧᔦᑯᐠ.
[10] ᒫᑲ ᒥᔪ ᐋᒋᒧᐃᐧᐣ ᓂᑳᐣ ᐅᒋᑕ ᐱᑯ ᑭᑕ ᐃᐧᐦᑕᒫᒋᐠ ᑲᐦᑭᔭᐤ ᐁ ᐃᑕᐢᑳᓀᓯᒋᐠ ᐊᔨᓯᔨᓂᐊᐧᐠ.
[11] ᐃᐢᐱ ᒫᑲ ᐃᑐᑕᐃᑯᔦᑳᐧᐃᐧ ᐅᔭᓱᐁᐧᐃᐧᓂᕽ ᒥᓇ ᐸᑭᑎᓂᑯᔦᑳᐧᐃᐧ, ᐁᑳᐃᐧᔭ ᓂᔮᐠ ᑭ ᑲ ᓯᐦᑌᔨᑕᒥᐃᑯᓈᐋᐧᐤ ᑖᓂᓯ ᑭᑕ ᐃᑌᐧᔦᐠ: ᒫᑲ ᐱᑯ ᑫ ᐃᓯ ᒥᔨᑯᐃᐧᓯᐁᐧᑫᐧ ᐁᐊᐧᑯ ᐁ ᐃᐢᐸᔨᐠ ᑎᐸᐃᐱᓯᒫᐧᐣ ᐁᐊᐧᑯ ᐃᑌᐧᐠ: ᒋᑫᒫ ᓇᒪᐃᐧᔭ ᑭᔭᐋᐧᐤ ᑳ ᐱᑭᐢᑫᐧᔦᐠ, ᒫᑲ ᑲ ᑲᓈᑎᓯᐟ ᐊᐦᒑᕽ.
[12] ᐅᒋᐋᐧᒥᒫᐤ ᒫᑲ ᑭᑕ ᐸᑭᑎᓀᐤ ᐅᒋᐋᐧᒪ ᑭᑕ ᓂᐸᐃᒥᐦᐟ, ᒥᓇ ᐅᑖᐃᐧᒫᐤ ᐅᐟ ᐊᐋᐧᓯᒥᓴ; ᐁᑯᓯ ᐊᐋᐧᓯᓴᐠ ᑭᑕ ᐸᓯᑯᐢᑕᐁᐧᐊᐧᐠ ᐅ ᓂᑭᐃᑯᐋᐧᐊᐧ, ᒥᓇ ᑭᑕ ᐃᓯᐦᒋᑫᐊᐧᐠ ᑭᑕ ᓂᐸᐃᒥᐦᐟ.
[13] ᐁᑯᓯ ᑭ ᑲ ᐸᑳᐧᑎᑯᐋᐧᐊᐧᐠ ᑲᐦᑭᔭᐤ ᐊᔨᓯᔨᓂᐊᐧᐠ ᓂ ᐃᐧᔪᐃᐧᐣ ᐅᐦᒋ: ᒫᑲ ᐊᓇ ᑫ ᓯᐯᔨᑕᕽ ᑭᓯᐸᓄᕽ ᐃᐢᑯ ᐁᐊᐧᑯ ᑫ ᐱᒫᒋᐃᐦᐟ.
[14] ᒫᑲ ᐃᐢᐱ ᐋᐧᐸᐦᑕᒣᑯ ᑳ ᐸᑳᐧᑎᑲᐧᕽ ᓂᓯᐊᐧᓈᒋᒋᑫᐃᐧᐣ ᐁ ᓂᐸᐃᐧᐟ ᐃᑕ ᐁᑳ ᐅ ᑲ ᓂᐸᐃᐧ (ᐊᓇ ᑳ ᐊᔭᒥᑖᐟ ᑭᑕ ᐃᐧ ᓂᓯᑐᐦᑕᑦ) ᑭᔮᑦ ᐊᓂᑭ ᒍᑎᔭᐃᕽ ᑳ ᐊᔮᒋᐠ ᐊᐧᒋᕽ ᑭᑕ ᐃᑖᒧᐊᐠ:
[15] ᒥᓇ ᐊᓇ ᑕᑯᒋ ᐋᐧᐢᑳᐦᐃᑲᓂᕽ ᑳ ᐊᔮᐟ ᐁᑳᐃᐧᔭ ᑭᑕ ᓂᓵᑕᐃᐧᐤ ᐊᐦᐳ ᐱᐦᑐᑫᐤ ᑭᑕ ᐅᑎᓇᕽ ᑫᑲᐧᐩ ᐅ ᐋᐧᐢᑳᐦᐃᑲᓂᕽ ᐅᐦᒋ:
[16] ᒥᓇ ᐊᓇ ᑭᐢᑎᑳᓂᕽ ᑳ ᐊᔮᐟ ᐁᑳᐃᐧᔭ ᑭᑕ ᐯ ᑭᐁᐧᐤ ᑭᑕ ᐅᑎᓇᕽ ᐅᐟ ᐊᑯᓂᐃᐧᐣ.
[17] ᒫᑲ ᑭᑕ ᑯᑕᑭᑖᐊᐧᐠ ᐊᓂᑭ ᑫ ᑭᑭᐢᑲᐋᐧᐊᐧᓱᒋᐠ ᒥᓇ ᑫ ᓄᔮᐊᐧᓱᒋᐠ ᐁᑯᐢᐱ ᑲᑭᓯᑳᔨᑭ.
[18] ᐊᔭᒥᐦᐋᐠ ᒥᓇ ᐁᑳ ᐁ ᒣᑳᐧ ᐱᐳᕽ ᑭᑕ ᐊᔮᐠ.
[19] ᒋᑫᒫ ᐁᐊᐧᑯ ᑭᓯᑳᑭ ᑭᑕ ᐊᔮᐤ ᐊᔨᒥᓯᐃᐧᐣ, ᐁᑳ ᐃᐧᑳᐨ ᑳ ᑭ ᐯ ᐃᑭᕽ ᐊᐢᐱᐣ ᓂᐢᑕᑦ ᑳ ᑭ ᐯ ᐅᓯᐃᐁᐧᕽ, ᑭᓭᒪᓂᑐ ᐅᑎ ᑳ ᑭ ᐅᓯᐃᐁᐧᐟ, ᐱᔨᐢ ᐊᓄᐦᐨ, ᐁᑯᓯ ᐁᑳ ᐃᐧᑳ ᒥᓇ ᑭᑕ ᐃᑭᕽ.
[20] ᑭᐢᐱᐣ ᒫᑲ ᐁᑳ ᑳ ᑎᐯᔨᐦᒋᑫᐟ ᑭ ᒋᒫᓯᑖᐟ ᐁᐊᐧᑲᐧᓂ ᑭᓯᑳᐊᐧ ᓇᒪᐋᐧᐨ ᐊᐃᐧᔭᐠ ᐅ ᑲ ᐱᒫᑎᓯ; ᒫᑲ ᐊᓂᑭ ᐊᐧᐁᐧᔦᔨᒫᑲᓇᐠ ᐅᐦᒋ, ᑳ ᑭ ᓇᐊᐧᓱᓈᐟ ᑭ ᒋᒫᓯᑖᐤ ᐊᓂᐦᐃ ᑭᓯᑳᐊᐧ.
[21] ᐁᑯᐢᐱ ᒫᑲ ᑭᐢᐱᐣ ᐊᐃᐧᔭᐠ ᐊᔨᓯᔨᓂᐤ ᐃᑎᑯᔦᑯ, ᒋᐢᐟ, ᐊᐊᐧ ᐃᑕ ᙭; ᐊᐦᐳ, ᒋᐢᐟ, ᓈᐦᐊ ᐃᑕ, ᐁᑳᐃᐧᔭ ᑖᐯᐧᑖᕽ.
[22] ᒋᑫᒫ ᑭᑕ ᒧᐢᑭᐊᐧᐠ ᓇᐢᐹᐨ ᙭ᐊᐠ ᒥᓇ ᓇᐢᐹᐨ ᐅᑭᐢᑭᐁᐧᐦᐃᑫᐊᐧᐠ, ᐁᑯᓯ ᑭᑕ ᐋᐧᐸᑎᔨᐁᐧᐊᐧᐠ ᑭᐢᑭᓇᐋᐧᒋ ᐃᓯᐦᒋᑫᐃᐧᓇ ᒥᓇ ᐁ ᒫᒪᐢᑳᑌᔨᑖᑲᐧᑭ, ᑭᑕ ᐊᐧᓂᒥᑎᒣᑕᐋᒋᐠ, ᑭᐢᐱᐣ ᑭ ᐃᑭᕽ, ᐊᐦᐳ ᐊᐧᐁᐧᔦᔨᒫᑲᓇ.
[23] ᒫᑲ ᐊᔮᑳᐧᒥᓯᐠ: ᒫᑎᑲ, ᓂᔮᐠ ᑭ ᑭ ᐃᐧᐦᑕᒫᑎᓈᐋᐧᐤ ᑲᐦᑭᔭᐤ ᑫᑲᐧᐩ:
[24] ᒫᑲ ᐁᑯᐢᐱ ᑲᑭᓯᑲᑭ, ᒣᐧᐢᑕᐢ ᐃᔨᑯᕽ ᐊᓂᒪ ᐋᔨᒥᓯᐃᐧᐣ, ᐱᓯᑦ ᑭᑕ ᐊᐧᓂᑎᐱᐢᑭᓯᐤ, ᒥᓇ ᑎᐱᐢᑳᐃᐧ ᐱᓯᑦ ᓇᒪᐃᐧᔭ ᑭᑕ ᐋᐧᓭᔮᓯᑫᐤ,
[25] ᐊᒐᐦᑯᓴᐠ ᑭᑕ ᐸᐦᑭᓯᓇᐧᐠ ᑭᓯᑯᕽ ᐅᐦᒋ, ᐁᑯᓯ ᓱᑫᔨᑖᑯᓯᐃᐧᓇ ᑭᓯᑯᕽ ᑳ ᐊᔮᑭ ᑭᑕ ᓇᓇᒥᐸᔨᐊᐧ.
[26] ᐁᑲᐧ ᒫᑲ ᑫ ᐋᐧᐸᒫᒋᐠ ᐃᔨᓂᐃᐧᑯᓯᓵᓇ ᐁ ᐹᐸᔨᔨᐟ ᐊᐧᐢᑯᕽ ᑭᑭ ᑭᐦᒋ ᓱᑳᑎᓯᐃᐧᐣ ᒥᓇ ᑭᐢᑌᔨᑖᑯᓯᐃᐧᐣ.
[27] ᐁᑲᐧ ᒫᑲ ᑫ ᓯᐯᐧᑎᓴᐋᐧᐟ ᐅᑭᓯᑯᒪ, ᒥᓇ ᑭᑕ ᒫᐊᐧᒋᐁᐤ ᐅ ᐊᐧᐁᐧᔦᔨᒫᑲᓇ ᓀᐊᐧᔭᐠ ᔪᑎᓄᕽ ᐅᐦᒋ, ᐃᑌ ᐁ ᑲᑭᓯᐸᐢᑲᒥᑳᐠ ᒥᓇ ᐁ ᑲᑭᓯᐱᑭᓯᑯᐊᐧᕽ ᐅᐦᒋ.
[28] ᐁᑲᐧ ᒫᑲ ᑲᑫᐧ ᑭᐢᑫᔨᑕᒧᐠ ᐋᐁᐧᒋᑲᐣ ᒥᓂᓵᑎᑯᕽ ᐅᐦᒋ: ᐁ ᐹᐸᐢᑫ ᓂᐦᑖᐃᐧᑭᐟ ᐁᑲᐧ ᐁ ᐊᑎ ᔪᐢᑳᐠ ᒥᓇ ᐁ ᐊᑎ ᓄᑲᐧᑭ ᓂᐱᔭ, ᑭ ᑭᐢᑫᔨᑌᓈᐋᐧᐤ ᐁ ᓂᐱᕽ ᑭᓯᐋᐧᐠ ᐁ ᐊᔮᐠ:
[29] ᐁᑯᓯ ᑭᔭᐋᐧᐤ ᒥᓇ, ᐃᐢᐱ ᐋᐧᐸᐦᑕᒣᑯ ᐅᐦᐃ ᐁ ᐊᑎ ᑎᐱᐸᔨᑭ, ᑭᐢᑫᔨᑕᒧᐠ ᑭᓯᐋᐧᐠ ᐁ ᐊᔮᐟ, ᐃᐢᑳᐧᑌᒥᕽ ᐃᓴ ᐱᑯ.
[30] ᑖᐯᐧ ᑭᐟ ᐃᑎᓈᐋᐧᐤ ᐅᑭ ᑳ ᐋᓂᐢᑫ ᐱᒫᑎᓯᒋᐠ ᓇᒪᐃᐧᔭ ᑭᑕ ᐳᓂ ᐊᔮᐊᐧᐠ, ᐃᔨᑯᕽ ᑲᐦᑭᔭᐤ ᐅᐦᐃ ᑭᑕ ᐃᑭᐦᑭ.
[31] ᑭᓯᐠ ᒥᓇ ᐊᐢᑭ ᑭᑕ ᐳᓂ ᐊᔮᐊᐧ, ᒫᑲ ᓂᔭ ᓂᐟ ᐃᑌᐧᐃᐧᓇ ᓇᒪᐃᐧᔭ ᑭᑕ ᐳᓂ ᐊᔮᐊᐧ.
[32] ᒫᑲ ᐁᐊᐧᑯ ᑭᓯᑳᐤ ᒥᓇ ᐁᐊᐧᑯ ᑎᐸᐃᐱᓯᒫᐧᐣ ᓇᒪᐃᐧᔭ ᐊᐃᐧᔭᐠ ᑭᐢᑫᔨᑕᑦ; ᓇᒪᐋᐧᐨ ᐊᐦᐳ ᐅᑭᓯᑯᐊᐧᐠ ᑭᐦᒋ ᑭᓯᑯᕽ, ᓇᒪᐃᐧᔭ ᒥᓇ ᐅᑯᓯᓯᒫᐤ, ᒫᑲ ᐁᐧᔪᑖᐃᐧᕽ.
[33] ᐊᔮᑳᐧᒥᓯᐠ ᑭᔭᐋᐧᐤ, ᐊᓴᐋᐧᐱᐠ ᒥᓇ ᐊᔭᒥᐦᐋᐠ: ᒋᑫᒫ ᓇᒪᐃᐧᔭ ᑭ ᑭᐢᑫᔨᑌᓈᐋᐧᐤ ᐃᐢᐱ ᑫ ᐅᑎᐦᒋᐸᔨᐠ.
[34] ᐃᑌᔨᑖᑲᐧᐣ ᑖᐱᐢᑯᐨ ᐊᔨᓯᔨᓂᐤ, ᐱᑐᐢ ᐊᐢᑭᕽ ᐁ ᐊᔮᐟ, ᐁ ᑭ ᓇᑲᑕᕽ ᐅ ᐋᐧᐢᑳᐦᐃᑲᐣ; ᒥᓇ ᐁ ᑭ ᑕᑎᐯᔨᑕᒧᐋᐟ ᐅᐟ ᐊᑐᐢᑫᔮᑲᓇ, ᐸᐯᐢᑭᐢ ᐁ ᒥᔮᐟ ᑕᐦᑐ ᓈᐯᐊᐧ ᐅᐟ ᐊᑐᐢᑫᐃᐧᓂᔨᐤ, ᐁ ᐃᑕᓱᐋᐧᑖᐟ ᒥᓇ ᐅᑲᓇᐃᐧᐢᑳᐧᑕᐁᐧᐊᐧ ᑭᑕ ᐊᓴᐋᐧᐱᔨᐟ.
[35] ᐊᓴᐋᐧᐱᐠ ᒫᑲ: ᒋᑫᒫ ᓇᒪᐃᐧᔭ ᑭ ᑭᐢᑫᔨᑌᓈᐋᐧᐤ ᐃᐢᐱ ᑳ ᑎᐯᔨᑕᕽ ᐋᐧᐢᑳᐦᐃᑲᐣ ᑫ ᑕᑯᓯᕽ, ᑭᐢᐱᐣ ᐁ ᐅᑖᑯᓯᐠ, ᐊᐦᐳ ᐁ ᐋᐱᑖᑎᐱᐢᑳᐠ, ᐊᐦᐳ ᐁ ᐯᐦᑖᑯᓯᐟ ᐹᑲᐋᑳᐧᐣ, ᐊᐦᐳ ᐁ ᑫᑭᓭᐹᔮᐠ:
[36] ᑫᑲ ᓯᓯᑯᐨ ᑕᑯᓯᑭ ᑭᑕ ᑭ ᒥᐢᑳᑯᔦᐠ ᐁ ᓂᐹᔦᐠ.
[37] ᐊᓂᒪ ᒫᑲ ᑭᔭᐋᐧᐤ ᑳ ᐃᑎᑕᑯᐠ ᑲᐦᑭᔭᐤ ᓂᐟ ᐃᑖᐊᐧᐠ, ᐊᓴᐋᐧᐱᐠ.