<2 Peter ᓂᓵᐧᐤ ᐱᑕᕒ 3

[1] ᐁᐊᐧᑯ ᐅᒪ ᐁᑲᐧ ᓯᔮᑭᐦᐃᑕᑯᐠ, ᓂᓵᐧᐤ ᒪᓯᓇᐦᐊᒫᑫᐃᐧᐣ ᐁ ᒪᓯᓇᐦᐊᒫᑕᑯᐠ; ᐁᑯᓯ ᑖᐱᐢᑯᐨ ᐁ ᐃᓯ ᓂᓯᑭ ᓂ ᐃᐧ ᐋᐦᑲᒥᑖᐣ ᑳ ᐯᑲᕽ ᑭ ᒥᑐᓀᔨᒋᑲᓂᐋᐧᐤ ᐁ ᒥᐢᑲᐋᐧᓱᒥᑕᑯᐠ;

[2] ᑭᑕ ᑲᓄᑭᐢᑭᓯᔦᐠ ᐊᓂᐦᐃ ᐃᑌᐧᐃᐧᓇ ᑲᔭᑌ ᑳ ᑭ ᐃᐧᐦᑕᐦᑭᐠ ᑲᓈᒋ ᐅᑭᐢᑭᐁᐧᐦᐃᑫᐊᐧᐠ, ᒥᓇ ᐅᔭᓱᐁᐧᐃᐧᐣ ᑳ ᑎᐯᔨᐦᒋᑫᐟ ᐅᐱᒫᒋᐦᐃᐁᐧᐤ ᑭᐟ ᐊᐹᐢᑎᓬᐃᒥᐋᐧᐊᐧ ᐁ ᐃᑌᐧᐋᐟ;

[3] ᐁ ᑭᐢᑫᔨᑕᒣᐠ ᐅᒪ ᓂᑳᐣ ᐃᐢᑳᐧᔮᐨ ᐊᑎ ᑲᑭᓯᑳᑭ ᐅᐹᐱᓄᑖᑫᐢᑲᐠ ᑭᑕ ᑕᑯᓯᐦᑭᐠ ᐁ ᐹᐱᓄᑖᑫᒋᐠ, ᐁ ᐱᒧᑖᑐᑕᑭᐠ ᐃᐧᔭᐋᐧᐤ ᐅ ᒪᒋ ᒧᐢᑕᐁᐧᔨᑕᒧᐃᐧᓂᐋᐧᐊᐧ,

[4] ᒥᓇ ᐁ ᐃᑌᐧᒋᐠ, ᑖᓂᐁᐧ ᑳ ᑭ ᐃᓯ ᐊᓱᑕᕽ ᑭᑕ ᑕᑯᓯᕽ? ᒋᑫᒫ ᐊᐢᐱᐣ ᐊᓂᒪ ᐁ ᑭᓯᑳᐠ ᐅᑖᐃᐧᒫᐊᐧᐠ ᑳ ᑭ ᑲᐃᐧᑲᐧᓯᒋᐠ, ᑲᐦᑭᔭᐤ ᑫᑲᐧᐩ ᐱᒥᐸᔨᐤ ᑖᐱᐢᑯᐨ ᑳ ᑭ ᐃᓯ ᐊᔮᑭ ᒥᒋᒫᐨ ᐅᐦᒋ ᐁ ᐅᓯᒋᑳᑌᐠ ᐊᐢᑭ.

[5] ᒋᑫᒫ ᐅᒪ ᐃᐧᔭ ᐅᐦᒋᑕᐤ ᐊᐧᓂᑭᐢᑭᓯᐊᐧᐠ, ᑭᓯᑲᐧ ᐁ ᑭ ᐊᔮᑭ ᑲᔮᐢ ᐅᐦᒋ ᒥᓇ ᐊᐢᑭ ᐁ ᓵᑭᐯᐠ ᓂᐱᕽ ᐅᐦᒋ ᒥᓇ ᒣᑳᐧ ᓂᐱᕽ, ᐁᑯᓯ ᐃᓯ ᐁ ᑭ ᐃᑌᐧᐟ ᑭᓭᒪᓂᑐ;

[6] ᐁᐊᐧᑯ ᒫᑲ ᐅᐦᒋ ᐊᐢᑭ ᐁᑯᐢᐱ ᑳ ᑭ ᐊᔮᐠ ᐁ ᔨᐢᑭᐯᐠ ᓂᐱ ᐅᐦᒋ ᑭ ᓂᓯᐊᐧᓈᑕᐣ;

[7] ᒫᑲ ᑭᓯᑲᐧ ᐊᓄᐦᐨ ᑳ ᐊᔮᑭ, ᐁᐊᐧᑯ ᑫᔮᐱᐨ ᐃᑌᐧᐃᐧᐣ ᐅᐦᒋ ᑳᓇᐁᐧᔨᑖᑲᐧᓇᐧ ᑭᑕ ᑭᓯᑌᑭ ᐁ ᐊᓭᐧᔨᑖᑲᐧᕽ ᐅᔭᓱᐁᐧᐃᐧᑭᓯᑳᐤ ᒥᓇ ᐅ ᓂᓯᐊᐧᓈᒋᐦᐅᐃᐧᓂᐋᐧᐤ ᐁᑳ ᑳ ᐊᔭᒥᐦᐋᐋᐧᑎᓯᒋᐠ ᐊᔨᓯᔨᓂᐊᐧᐠ.

[8] ᒫᑲ ᐁᑳᐃᐧᔭ ᐊᐧᓂᑭᐢᑭᓯᐠ ᐅᒪ ᐯᔭᐠ ᑫᑲᐧᐩ ᓯᔮᑭᐦᐃᑕᑯᐠ, ᑳ ᑎᐯᔨᐦᒋᑫᐟ ᐃᐧᔭ ᐯᔭᐠ ᑭᓯᑳᐤ ᑖᐱᐢᑯᐨ ᑭᐦᒋ ᒥᑖᑕᐦᑐᒥᑕᓇᐤ ᑕᐦᑐ ᐊᐢᑭ, ᒥᓇ ᑭᐦᒋ ᒥᑖᑕᐦᑐᒥᑕᓇᐤ ᑕᐦᑐ ᐊᐢᑭ ᑖᐱᐢᑯᐨ ᐯᔭᐠ ᑭᓯᑳᐤ.

[9] ᑳ ᑎᐯᔨᐦᒋᑫᐟ ᓇᒪᐃᐧᔭ ᐸᐯᓄᑫᓯᐤ ᑭᑕ ᐃᑐᑕᕽ ᐅᐟ ᐊᓱᑕᒫᑫᐃᐧᓇ ᑖᐱᐢᑯᐨ ᐋᑎᐦᐟ ᐸᐯᓄᑫᓯᐃᐧᐣ ᑳ ᐃᑕᑭᑕᑭᐠ ᒫᑲ ᑭ ᓯᐯᔨᑕᒫᑯᐋᐧᐤ, ᐁᑳ ᐁ ᓇᑕᐁᐧᔨᑕᕽ ᐊᐃᐧᔭ ᑭᑕ ᓂᓯᐊᐧᓈᑎᓯᔨᐟ ᒫᑲ ᑲᐦᑭᔭᐤ ᑭᑕ ᐅᑎᑕᒥᔨᐟ ᑫᐧᐢᑳᑎᓯᐃᐧᐣ.

[10] ᒫᑲ ᐅ ᑭᓯᑳᑦ ᑳ ᑎᐯᔨᐦᒋᑫᐟ ᑭᑕ ᑕᑯᓯᓄᒪᑲᓂᔨᐤ ᑖᐱᐢᑯᐨ ᑭᒧᑎᐢᐠ; ᐁᑯᐢᐱ ᑭᓯᑲᐧ ᑭᑕ ᓯᐯᐧᐸᔨᐊᐧ ᐁ ᑭᐦᒋ ᐯᑖᑲᐧᑭ ᒥᓇ ᓇᔦᐊᐧᒋ ᑭᓯᑯᕽ ᑳ ᐊᔮᑭ ᑭᑕ ᓇᒪᑕᑲᐧᑭ ᐃᔨᑯᕽ ᑭᑕ ᑭᓯᑌᐠ, ᐊᐢᑭ ᒫᑲ ᒥᓇ ᑲᐦᑭᔭᐤ ᐊᑐᐢᑫᐃᐧᓇ ᐁᑯᑕ ᑳ ᐊᔮᑭ ᑭᑕ ᑭᓯᑌᐊᐧ.

[11] ᐁᑯᓯ ᒫᑲ ᐃᐧᔭ ᑲᐦᑭᔭᐤ ᐅᐦᐃ ᐁᑯᓯ ᑭᑕ ᐃᓯ ᓇᒪᑕᑲᐧᑭ, ᑖᓂᓯ ᐁᑕᐢᑌᐠ ᑭᔭᐋᐧᐤ ᑭᑕ ᑐᐃᐧᑳᓂᐃᐧᔦᐠ ᒥᓯᐁᐧ ᑲᓈᒋ ᐱᒫᑎᓯᐃᐧᓂᕽ ᒥᓇ ᐊᔭᒥᐦᐋᐋᐧᑎᓯᐃᐧᓂᕽ,

[12] ᐁ ᐊᓴᐋᐧᐸᑕᒣᐠ ᒥᓇ ᐊᔨᐋᐧᐠ ᐁ ᓇᑕᐁᐧᔨᑕᒣᐠ ᑭᑕ ᑕᑯᓯᓄᒪᑲᕽ ᐅ ᑭᓯᑳᑦ ᑭᓭᒪᓂᑐ ᐁᐊᐧᑯ ᐃᐢᐸᔨᑭ ᑭᓯᑲᐧ ᐁ ᑳᐧᑯᑌᑭ ᑭᑕ ᓇᒪᑕᑲᐧᑭ ᒥᓇ ᓇᔦᐊᐧᒋ ᑭᓯᑯᕽ ᑳ ᐊᔮᑭ ᑭᑕ ᑎᑭᑌᑭ ᐃᔨᑯᕽ ᐁ ᑭᓯᑌᐠ?

[13] ᒫᑲ ᐁ ᑭ ᐃᓯ ᐊᓱᑕᕽ, ᑭᐟ ᐊᓴᐋᐧᐸᑌᓈᓇᐤ ᐅᐢᑭ ᑭᓯᐠ ᒥᓇ ᐅᐢᑭ ᐊᐢᑭ ᐃᑕ ᐁ ᐊᔮᐠ ᑲᐧᔭᐢᑳᐧᑎᓯᐃᐧᐣ.

[14] ᐁᑯᓯ ᒫᑲ ᓯᔮᑭᐦᐃᑕᑯᐠ, ᐃᐧᔭ ᐁ ᐊᓴᐋᐧᐸᐦᑕᒣᐠ ᐅᐦᐃ, ᐋᑲᒣᔨᒧᐠ ᑭᑕ ᒥᐢᑳᑯᔦᐠ ᐯᔭᑕᑫᔨᒧᐃᐧᓂᕽ ᐁᑳ ᑭᑕ ᒫᔨᓈᑯᒋᑫᔦᐠ ᐊᐦᐳ ᐋᓀᐧᔨᑖᑯᓯᔦᐠ ᐃᐧᔭ ᐁ ᐃᓯ ᑭᑖᐸᑕᕽ.

[15] ᒥᓇ ᐅ ᓯᐯᔨᑕᒧᐃᐧᐣ ᑳ ᑎᐯᔨᒥᑯᔭᕽ ᐁᐊᐧᑯ ᐱᒫᒋᐦᐃᐁᐧᐃᐧᐣ ᐃᑕᑭᑕᒧᐠ; ᑖᐱᐢᑯᐨ ᑳ ᓵᑭᐋᔭᕽ ᑭᒋᐋᐧᒥᓇᐤ ᐹᓬ ᒥᓇ ᐁ ᐃᓯ ᒥᔨᑯᐃᐧᓯᐟ ᐃᔨᓂᓯᐃᐧᐣ ᑳ ᑭ ᐃᓯ ᒪᓯᓇᐦᐊᒫᑯᔦᐠ;

[16] ᑖᐱᐢᑯᐨ ᐃᓴ ᐱᑯ ᒥᓯᐁᐧ ᐅ ᒪᓯᓇᐦᐊᒫᑫᐃᐧᓂᕽ ᐁ ᑕᓯᑕᕽ ᐁᑯᑕ ᐁᐊᐧᑯᓂ ᐅᐦᐃ; ᐁᑯᑕ ᒫᑲ ᐋᑎᐦᐟ ᐊᓂᐦᐃ ᑳ ᐋᔨᒪᑭ ᑭᑕ ᓂᓯᑐᐦᑕᒥᕽ, ᐁᐊᐧᑯᓂ ᐁᑳ ᑳ ᐅ ᑭᐢᑫᔨᑕᒧᐃᐧᓂᒋᐠ ᒥᓇ ᐁᑳ ᑳ ᐊᔮᑌᔨᑖᑯᓯᒋᐠ ᑳ ᑫᐧᐢᑭᓇᐦᑭᐠ ᑳ ᐃᑐᑕᐦᑭᐠ ᐃᓴ ᐱᑯ ᑯᑕᑲ ᑭᐦᒋ ᒪᓯᓇᐦᐃᑫᐃᐧᓇ, ᐃᐧᔭᐋᐧᐤ ᐅ ᓂᓯᐊᐧᓈᒋᐦᐅᐃᐧᓂᐋᐧᕽ.

[17] ᑭᔭᐋᐧᐤ ᒫᑲ ᓯᔮᑭᐦᐃᑕᑯᐠ, ᓂᔮᐠ ᐅᐦᐃ ᐁ ᑭᐢᑫᔨᑕᒣᐠ ᐊᔮᑳᐧᒥᓯᐠ ᑫᑲ ᓈᐣᑕᐤ ᐃᓯ ᓯᐯᐧᑕᐃᑯᔦᑯ ᐅ ᐊᐧᓂᒥᑎᒣᐃᐧᓂᐋᐧᐤ ᐅᒪᒑᑎᓴᐠ, ᑭᑕ ᐸᐦᑭᓯᓂᔦᐠ ᑭᐟ ᐋᔮᑌᔨᑕᒧᐃᐧᓂᐋᐧᕽ ᐅᐦᒋ.

[18] ᒫᑲ ᔭᑭᑭᐠ ᐅ ᑭᓭᐋᐧᑎᓯᐃᐧᓂᕽ ᒥᓇ ᐅ ᑭᐢᑫᔨᑕᒧᐃᐧᓂᕽ ᑳ ᑎᐯᔨᒥᑯᔭᕽ ᑯᐱᒫᒋᐦᐃᐁᐧᒥᓇᐤ ᒋᓴᐢ ᙭. ᐁᐊᐧᑯ ᑭᑕ ᐊᔮᐤ ᑭᐢᑌᔨᑖᑯᓯᐃᐧᐣ ᐊᓄᐦᐨ ᒥᓇ ᑳᑭᑫ. ᐋᒣᐣ.