<2 Peter ᓂᓵᐧᐤ ᐱᑕᕒ 1

[1] ᓵᐃᒪᐣ ᐱᑕᕒ ᐅᐟ ᐊᑐᐢᑫᔮᑲᓇ ᒥᓇ ᐅᐟ ᐊᐹᐢᑎᓬᐃᒪ ᒋᓴᐢ ᙭ ᐁ ᒪᓯᓇᐦᐊᒪᐊᐧᑭᐠ ᐊᓂᑭ ᑳ ᑭ ᒥᔨᐦᒋᐠ ᑖᐱᐢᑯᐨ ᓂᔭᓈᐣ ᐁ ᐃᓯ ᑭᐦᒉᔨᑖᑲᐧᕽ ᑳ ᑖᐯᐧᔦᔨᑕᒫᐧᔭᕽ ᐅ ᑲᐧᔭᐢᑳᐧᑎᓯᐃᐧᐣ ᑭ ᑭᓭᒪᓂᑐᒥᓇᐤ ᒥᓇ ᑯᐱᒫᒋᐦᐃᐁᐧᒥᓇᐤ ᒋᓴᐢ ᙭;

[2] ᑭᓭᐋᐧᑐᑖᑯᐃᐧᐣ ᒥᓇ ᐯᔭᑕᑫᔨᒧᐃᐧᐣ ᑭ ᑲ ᐃᐧ ᔭᑭᑖᐧᑲᐃᐧᓈᐋᐧᐤ ᐁ ᑭᐢᑫᔨᒫᔦᐠ ᑭᓭᒪᓂᑐ ᒥᓇ ᒋᓴᐢ ᑳ ᑎᐯᔨᒥᑯᔭᕽ;

[3] ᒋᑫᒫ ᐅ ᒪᓂᑐᐃᐧ ᑲᐢᑭᐦᐁᐃᐧᓯᐃᐧᐣ ᑭ ᑭ ᐸᑭᑎᓇᒫᑯᓈᓇᐤ ᑲᐦᑭᔭᐤ ᑫᑲᐧᐩ ᑳ ᐋᐸᒋᐦᐃᐁᐧᐠ ᐱᒫᑎᓯᐃᐧᓂᕽ ᒥᓇ ᒪᓂᑐᐋᐧᑎᓯᐃᐧᓂᕽ, ᐁ ᑭᐢᑫᔨᒫᔭᕽ ᐊᓇ ᑳ ᑭ ᓇᑐᒥᑯᔭᕽ ᐃᐧᔭ ᐅ ᑭᐢᑌᔨᑖᑯᓯᐃᐧᐣ ᒥᓇ ᐅ ᒥᔮᐧᑎᓯᐃᐧᐣ ᐅᐦᒋ;

[4] ᑳ ᐅᐦᒋ ᒥᔨᑯᔭᕽ ᒥᐢᑕᐦᐃ ᑳ ᐃᑌᔨᑖᑲᐧᓂᔨᑭ ᒥᓇ ᐊᔨᐋᐧᐠ ᑳ ᑭᐦᒉᔨᑖᑲᐧᓂᔨᑭ ᐅᐟ ᐊᓱᑕᒫᑫᐃᐧᓇ; ᐁᐊᐧᑯᓂ ᑭᑕ ᑭ ᐅᐦᒋ ᐃᐧᒋᐃᐁᐧᔦᐠ ᑳ ᒪᓂᑐᐊᐧᕽ ᐃᓯ ᐊᔮᐃᐧᐣ ᐁ ᑭ ᐸᐢᐱᔦᐠ ᓂᓯᐊᐧᓈᒋᐦᐅᐃᐧᐣ ᐊᐢᑭᕽ ᑳ ᐊᔮᐠ ᒪᒋ ᒧᐢᑕᐁᐧᔨᑕᒧᐃᐧᐣ ᐅᐦᒋ.

[5] ᐁᐦᐁ, ᐅᒪ ᒫᑲ ᐅᐦᒋ ᐋᑲᒣᔨᒧᐠ ᑭᑕ ᔭᑭ ᐊᔮᔦᐠ, ᑭ ᑖᐯᐧᔦᔨᑕᒧᐃᐧᓇᐋᐧᕽ ᑕᑯᑖᐠ ᒥᔮᐧᑎᓯᐃᐧᐣ; ᐁᑯᓯ ᑭ ᒥᔮᐧᑎᓯᐃᐧᓂᐋᐧᕽ ᑭᐢᑫᔨᑕᒧᐃᐧᐣ;

[6] ᐁᑯᓯ ᑭ ᑭᐢᑫᔨᑕᒧᐃᐧᓂᐋᐧᕽ ᓇᐃᔨᑯᑳᐧᑎᓯᐃᐧᐣ; ᐁᑯᓯ ᑭ ᓇᐃᔨᑯᑳᐧᑎᓯᐃᐧᓂᐋᐧᕽ ᓯᐯᔨᑕᒧᐃᐧᐣ; ᐁᑯᓯ ᑭ ᓯᐯᔨᑕᒧᐃᐧᓂᐋᐧᕽ ᐊᔭᒥᐦᐋᐋᐧᑎᓯᐃᐧᐣ;

[7] ᐁᑯᓯ ᐊᔭᒥᐦᐋᐋᐧᑎᓯᐃᐧᓂᕽ ᐁ ᓵᑭᐋᔦᑯᐠ ᐅᒋᐋᐧᒥᒫᐊᐧᐠ; ᐁᑯᓯ ᐁ ᓵᑭᐋᔦᑯᐠ ᐅᒋᐋᐧᒥᒫᐊᐧᐠ ᑭᓭᐋᐧᑎᓯᐃᐧᐣ.

[8] ᒋᑫᒫ ᑭᐢᐱᐣ ᐅᐦᐃ ᑭᑭᐢᑳᑯᔦᑯ ᒥᓇ ᐁᐧᔪᒋ ᐊᔮᔦᑯ ᑭ ᑲ ᐃᓯᐃᑯᓈᐋᐧᐤ ᐁᑳ ᑭᑕ ᑭᑎᒥᔦᐠ ᐊᐦᐳ ᑭᑕ ᐁᑳ ᒥᓂᓯᐃᐧᔦᐠ ᐅ ᑭᐢᑫᔨᑕᒧᐃᐧᓂᕽ ᑳ ᑎᐯᔨᒥᑯᔭᕽ ᒋᓴᐢ ᙭.

[9] ᒋᑫᒫ ᐊᓇ ᑳ ᑭᐧᑕᒫᐟ ᐅᐦᐃ ᓇᒪᐃᐧᔭ ᐊᐧᐃᐧᔭᐋᐧᐱᐤ ᐁ ᐋᐧᐸᐦᑕᕽ ᐱᑯ ᐊᓂᒪ ᑭᓯᐋᐧᐠ ᑳ ᐊᔮᔨᐠ, ᐁᑳ ᐁ ᑭᐢᑭᓯᐟ ᑳ ᑭ ᐯᑭᐃᐦᐟ ᑲᔮᐢ ᐅ ᒪᒋᐃᑎᐃᐧᓇ ᐅᐦᒋ.

[10] ᐁᑯᓯ ᒫᑲ ᓂᒋᐋᐧᒥᑎᐠ, ᐊᐊᐧᓯᒣ ᐋᑲᒣᔨᒧᐠ ᑭᑕ ᑫᒋᓈᑖᔦᐠ ᑭ ᓇᑐᒥᑯᐃᐧᓂᐋᐧᐤ ᒥᓇ ᑭ ᓇᐊᐧᓱᓂᑯᐃᐧᓂᐋᐧᐤ; ᒋᑫᒫ ᑭᐢᐱᐣ ᐅᐦᐃ ᐃᑐᑕᒣᑯ ᓇᒪᐃᐧᑳᐨ ᑭ ᑲ ᐸᐦᑭᓯᓂᓈᐋᐧᐤ;

[11] ᐁᑯᓯ ᐃᓯ ᒫᑲ ᑭ ᑲ ᐁᐧᔪᒋ ᐅᐦᑎᓇᒫᑲᐃᐧᓈᐋᐧᐤ ᑭᑕ ᐱᐦᑐᑫᔦᐠ ᑳᑭᑫ ᑳ ᐊᔮᔨᐟ ᐅᐟ ᐅᑌᓇᐃᐧᐃᐧᐣ ᑳ ᑎᐯᔨᒥᑯᔭᕽ ᒥᓇ ᑯᐱᒫᒋᐦᐃᐁᐧᒥᓇᐤ ᒋᓴᐢ ᙭.

[12] ᐁᑯᓯ ᒫᑲ ᓇᒪᐃᐧᔭ ᓂ ᑲ ᐋᒋᐢᑕᐁᐧᔨᑌᐣ ᑭᑕ ᒥᐢᑲᐋᐧᓱᒥᑕᑯᐠ ᐅᐦᐃ ᐋᑕᐃᐧᔭ ᐁ ᑭᐢᑫᔨᑕᒣᐠ ᒥᓇ ᐁ ᐋᔮᒋ ᐊᔮᔦᐠ ᐊᓂᒪ ᑖᐯᐧᐃᐧᐣ ᑳ ᑭᑭ ᐊᔮᔦᐠ.

[13] ᑲᐧᔭᐢᐠ ᒫᑲ ᓂᐟ ᐃᑌᔨᑌᐣ, ᐃᐢᑯ ᐁ ᐊᔮᔮᐣ ᐅᒪ ᓂᑭᕽ ᑭᑕ ᐅᐢᐸᐁᐧᐃᑕᑯᐠ ᐁ ᒥᐢᑲᐋᐧᓱᒥᑕᑯᐠ;

[14] ᐁ ᑭᐢᑫᔨᑕᒫᐣ ᐃᐧᐸᐨ ᐁᑲᐧ ᑭᑕ ᑫᒋᑯᐢᑲᒫᐣ ᐅᒪ ᓂᑭ, ᐃᐧᔭ ᐁᑯᓯ ᐁ ᑭ ᐃᓯ ᑭᐢᑫᔨᑕᒧᐃᐟ ᑳ ᑎᐯᔨᒪᑯᔭᕽ ᒋᓴᐢ ᙭.

[15] ᐁᑯᓯ ᒫᑲ ᓂ ᑲ ᐋᑲᒣᔨᒧᐣ ᓴᑭᓀ ᑭᑕ ᑲᐢᑭᑖᔦᐠ ᑭ ᐳᓂ ᐱᒫᑎᓯᔮᓂ ᐅᐦᐃ ᒥᓇ ᑭᑕ ᑭᐢᑭᓱᒥᓱᔦᐠ.

[16] ᒋᑫᒫ ᓇᒪᐃᐧᔭ ᓄᐦᒋ ᐱᒥᑎᓴᐁᓈᐣ ᐁ ᑲᑲᔦᔨᓯᐃᐧ ᐅᓯᒋᑳᑌᑭ ᐋᑕᔪᑳᓇ ᐃᐢᐱ ᑳ ᑭᐢᑫᔨᑕᒧᐃᑖᕽ ᐅ ᒪᐢᑲᐃᐧᓯᐃᐧᐣ ᒥᓇ ᐅ ᑕᑯᓯᓄᐃᐧᐣ ᑳ ᑎᐯᔨᒥᑯᔭᕽ ᒋᓴᐢ ᙭, ᒫᑲ ᓂ ᑭ ᐋᐧᐸᐦᑕᒫᐧᓈᐣ ᓂᐢᑭᓯᑯᓈᕽ ᐅᐦᒋ ᐅ ᑭᒑᔨᐃᐧᐃᐧᐣ.

[17] ᑭ ᒥᔨᐠ ᒫᑲ ᑭᓭᒪᓂᑐᐊᐧ ᐁᐧᔪᑖᐃᐧᕽ ᑭᐢᑕᑭᒥᑯᐃᐧᐣ ᒥᓇ ᑭᐢᑌᔨᑖᑯᓯᐃᐧᐣ ᐃᐢᐱ ᑳ ᐅᑎᐦᑎᑯᐟ ᐃᑌᐧᐃᐧᐣ ᑳ ᐊᔨᐋᐧᑫᔨᑖᑲᐧᕽ ᑭᐦᒑᔨᐃᐧᐃᐧᓂᕽ ᐅᐦᒋ, ᐁᐊᐧᑯ ᐊᐊᐧ ᑳ ᓵᑭᐦᐊᐠ ᓂᑯᓯᐢ, ᓈᐢᐱᐨ ᑳ ᓇᐦᐃᔭᐁᐧᐦᐃᐟ;

[18] ᐅᒪ ᒫᑲ ᐃᑌᐧᐃᐧᐣ ᑭᐦᒋ ᑭᓯᑯᕽ ᐅᐦᒋ ᓂ ᑭ ᐯᑌᓈᐣ, ᐁ ᐃᐧᒉᐋᐧᔮᕽ ᑳ ᑲᓈᑌᔨᑖᑲᐧᕽ ᐊᐧᒋ.

[19] ᐁᑯᓯ ᑭᐟ ᐊᔮᓇᐤ ᒥᓇ ᑭᐢᑭᐁᐧᐦᐃᑫᐃᐧ ᐊᔭᒥᐃᐧᐣ ᐊᔨᐋᐧᐠ ᐁ ᑫᒋᓈᑖᕽ; ᐁᐊᐧᑯ ᑭ ᒥᔪᑐᑌᓈᐋᐧᐤ ᐁ ᐊᔮᑳᐧᒣᔨᑕᒣᐠ, ᑖᐱᐢᑯᐨ ᐋᐧᓴᐢᑯᑌᓂᑲᐣ ᐁ ᐋᐧᐢᑌᐠ ᐊᐧᓂᑎᐱᐢᑳᕽ, ᐱᔨᐢ ᑭᑕ ᐯᑖᐸᕽ ᐁᑯᓯ ᐋᐧᐸᓇᒐᕽ ᑭᑕ ᓵᑯᑌᐟ ᑭᑌᐦᐃᐋᐧᕽ;

[20] ᐁ ᑭᐢᑫᔨᑕᒪᕽ ᐅᒪ ᓂᑳᐣ ᐁᑳ ᓇᐣᑕᐤ ᑭᐢᑭᐁᐧᐦᐃᑫᐃᐧᐣ ᑭᐦᒋ ᒪᓯᓇᐦᐃᑫᐃᐧᓂᕽ ᐁ ᐱᐢᑭᒋ ᐃᑌᐧᐢᑕᒪᐋᐧᑌᒥᕽ.

[21] ᒋᑫᒫ ᓇᒪᐃᐧᑲᐨ ᑭ ᑕᑯᓯᓄᒪᑲᐣ ᑭᐢᑭᐁᐧᐦᐃᑫᐃᐧᐣ ᐅᐟ ᐃᑌᔨᑕᒧᐃᐧᓂᕽ ᐊᔨᓯᔨᓂᐤ ᐅᐦᒋ; ᒫᑲ ᐊᔨᓯᔨᓂᐊᐧᐠ ᑭ ᐱᑭᐢᑫᐧᐊᐧᐠ ᑭᓭᒪᓂᑐᐊᐧ ᐅᐦᒋ, ᐁ ᐃᑌᐧᐃᑯᒋᐠ ᑳ ᑲᓈᑎᓯᔨᐟ ᐊᐦᒑᐦᑲᐧ.