[1] Kamo in mga bodang, kamo maniwala sa kanyo mga koyay, angkataw ina in piyatoldo in Kapwan, ina in betek pag ogali.
[2] Pagmaalen in kanyo amang osai inang, angkataw ina in tokaw pag bilin apo pangako, keyen,
[3] No kao agmaal sa kaimo mga koyay, na kao batay apiyaan, batay dogay in kaimo boway atai sa kobat.
[4] Kamo in mga koyay, ayaw agpakadaet remrem sa kanyo mga bodang. Dayem siro kanyo paistobowen patoldowen in mga adar in Kapwan.
[5] Kamo in mga sogowan piyagalapet, kamo maniwala sa kanyo mga kapwan atai sa kobat. Pasakop wa gayed, agkalimo sa kansiro, ayaw aglimbang. Kataw daan in kamo agpasakop kay Kiristo.
[6] Ayaw waget agpapangkit makaanggay sa kanyo kapwan. Kamayba idapo agpangkit, na kamo agpanawen daan gayed, kataw sogowan Kiristo. Kamo wakayte agpangwat in beet Diyos.
[7] In agpanawen pakamaalnowen in bait kataw kamo sogowan Kiristo yewed mangyan waget.
[8] Angkataw kantam atawanan IsoKiristo batay agbayad sa baatte mangyan agpangwat maal, kamayba sogowan piyagalapet kamayba yewed.
[9] Kamo in mga kapwan, agpakamaal sa kanyo mga piyagalapet sogowan. Ayaw wa agpamalimlimo sa kansiro, angkataw kanyo atawanan kamo tanan sogowan piyagalapet osai waget ka Kapwan sa langit. Siyo idapo piyagidang.
[10] Anda wa in kalobosan kangay piyagsabi. Kitam agpakaeyat. In padalan agpakaeyat in kitam agiyagem sa Kapwan, osai in kitam agpasandig sa kansiyo lakoy kabaloyan.
[11] Kantam soroyen in boo panlaban piyagtaboy Diyos, matang kitam kalaban sa daet pag mga padalan dimonyo.
[12] Angkataw yewed mga mangyan in kantam kalaban, no yewed in mga poon, in mga agpakoyay, in mga apo kabaloyan sa lened atai sa kobat, in karowan mamaw sa kiwang.
[13] Na kantam soroyen in panlaban piyagtaboy Diyos. Kataw ina kitam batay kabaloy dogay in aglaban, no rateng in daet pag kabetek. Kalbas paka idapo wa abaloyan, kitam marigen daan in agtaydek.
[14] Na kitam pakarigen in agtaydek. In totoo kantam pabalayen sa baris. In boo betek kantam pabengbengen sa barosen.
[15] Soroyen sa darapa in sandata agpatoldo in Maalno pag Barita Diyos agpamakapya remrem.
[16] Kantam palagi pagatangen in pamengbeng agkaplek sa boo mga agigang pag pana dimonyo. Ina pag pamengbeng in agpasandig kay Kiristo.
[17] Kantam soroyen in sambalilo bakal in kitam piyaboway Diyos. Kantam atangen in pisaw in piyagtaboy in Abyan Diyos. Ina in kansiyo Agiplaong.
[18] Kitam baatte agpandalangin, agayay tolong sa Diyos. Baatte kabetek mandalangin no nangkataw in piyatoldo in Abyan. Kamayba nakay pag betek ayaw aglimbang agpandalangin sa boo mga bodang Diyos.
[19] Ako din dalanginen matang ako piyagpakan in betek pag mga agiplaong, osai yewed agkalimo agpatoldo in Maalno pag Barita in batang piyagbetang.
[20] Panawen asin pag Maalno pag Barita ako siyogo, kalbas ngona piyageket karakara. Na ako dalanginen matang in ako agbarita ako yewed agkalimo, kataw kailangan ako miplaong kataw ina.
[21] Tikiko in batay agbarita sa kanyo in boote panawen sa kangay, no kataw nakay ako. Siyo kantam belag piyagmaal, osai yewed aglimbang sa panawen in Kapwan.
[22] Kaya siyo kangay piyagsogo sa kanyo matang kanyo batay atawanan no nangkataw ako matang agpakaeyat sa kanyo remrem.
[23] In mga belag pakanen Diyos in apyaan pag remrem osai in paniwala osai pakayawteen in Diyos Amang osai IsoKiristo in Kapwan.
[24] Kamo pakayawteen lakoy in Diyos, kamo in boo mga yewed aglimbang agkaanggay kay IsoKiristo kantam Kapwan.