[1] Kami Pablo in agsolat, osai Timotiyo. Kami kay Kiristo Isos alapet sogowan. Kami agsolat sa boo mga bodang Diyos sa bayan Pilipos, mga paagem kay Kiristo Isos, kadayo sa mga koyay, osai sa mga katolong.
[2] Kanyam pandalangin keyen, Kamo pakayawteen osai pakapyaen kantam Amang Diyos osai IsoKiristo kantam Kapwan.
[3] Baatte ako manremrem sa kanyo ako agkaanggay sa Diyos kangay piyagmaal.
[4] Baatte ako agpandalangin sa kanyo boo ako agkaanggay wano,
[5] angkataw kitam agpaysarigan agpabarita in Maal pag Barita, ibat kamo bayo kay maniwala anggan ngona.
[6] Kangay wa gayed atawanan in Diyos in agparakay in maal pag panawen sa kanyo. Na siyo wa daan in batay aglobos anggan sa Ibeng rateng Kiristo Isos.
[7] Kamo ayaw agsoyo in ako agpakayawte sa kanyo boo, kataw kamo kangay wano piyagmaal. Angkataw kamo kangay mga belag sa makaanggay pag panawen tiyaboy Diyos sa kangay. Tangona in ako agipalpas kay agpatonay osai agmatiwid agalapet sa Maal pag Barita kamo kangay wa belag, anggan din ngona in ako piyagbilanggo wa kamo belag kay din.
[8] In Diyos katawan kaya ako agkalowayan wano gayed sa kanyo boo, angkataw Kiristo Isos in agbalay sa kangay galem agpakayawte sa kanyo boo.
[9] Kangay pandalangin in kanyo agpakayawte agistobo anggan anggan, apo agiyagem katawanan sa boo maal osai kabaloyan agidang keyen, anda maal, anda daet,
[10] matang kamo kaidang in maalno gayed. No kataw ina na dogayan sa Ibeng rateng Kiristo Isos kamo ngiitan malinis, idapo daet.
[11] Osai in boo kanyo ogali maalno batang kay IsoKiristo. Matang in Diyos piyagmaal osai piyagpakalakonaw.
[12] Laki mga belag, kamo katawan ina in mga mibaloy sa kangay. Na beet kangay siyabi sa kanyo, ina boo makatolong sa agipanaw in Maal pag Barita.
[13] Panawen asin in boo mga agdamay sa balay lakoy in poon lakoy, osai in mga amat kay atai, kansiro wa atawanan, kaya ako piyagbilanggo panawen ako kay Kiristo sogowan.
[14] Panawen din in ako piyagbilanggo in karowan sa mga belag atai labi kay agpakaeyat sa agpasandig sa Kapwan. Siro yewed agrega, siro agpakaeyat kay agbaba in barita Diyos.
[15] Ako katawan in kalaati, kaya siro agbarita Kiristo angkataw siro agpamalaway osai agpanagiri. Kamay in amat wakay agbangen, kaya siro agbarita panawen sa kansiro maalno pag remrem.
[16] Siro agbarita panawen siro apo in agpakayawte pag remrem, angkataw kansiro atawanan kaya ako piyagbilanggo panawen ako agmatiwid agalapet sa Maal pag barita.
[17] In amat in ako keyen agpamalaway, in siro agbarita Kiristo siro agpanagiri, in kansiro beet ako labi kay piyagpaidapan atai sa bilanggowan.
[18] Kamay ina pag boo yewed makasida sa kangay. Kamayba nangkataw agbangen ako agkaanggay daan angkataw Kiristo piyagbarita, kamayba maal in kansiro remrem, kamayba daet. In osai kay kangay piyagkaanggay,
[19] in kangay atawanan ako batay piyalpas panawen sa kabaloyan in Abyan IsoKiristo osai sa kanyo pandalangin.
[20] In kangay kayno piyagkabeet in ako nges idapo liimbangan sa kangay mga panawen. Dayem kamayba ngona palagi maeyat kangay remrem, matang boo kangay bilog aglakonaw kay Kiristo kamayba wa ako agkaboway, kamayba wa matay.
[21] No sa kangay in agkaboway idapo kabolowan no idapo Kiristo. Na in matay labi kay apo kabolowan.
[22] Ako yewed kaidang asin pag dowai. Kamay no ako agkaboway kay, na aronaw kay in mibaloy sa kangay mga panawen.
[23] Kaya piyagbaslag kangay remrem, ako beet panaw wa atai pag boway, pataboy kay Kiristo, angkataw ina in labi wa makaanggay sa kangay.
[24] Kamay labi kay piyagkailangan in ako agkaboway kay, matang labi kayno makatolong sa kanyo.
[25] Na panawen ina, kangay wa gayed atawanan ako agaway kay agkaboway sarig kamo boo, matang katolong sa kanyo agpakarigen osai agpakaanggay agpasandig sa Kapwan.
[26] Na no ako asina wakay sa kanyo, kamo labi kay agkaanggay aglakonaw kay Kiristo Isos panawen sa kangay.
[27] Na, laki mga Belag, in kanyo mga ogali pasibayen sa Maal pag Barita panawen kay Kiristo. No kataw ina kamayba wa ako karateng sa kanyo, kamayba aratengan waget barita, na ako katawan kamo yewed aglimbang agpaniwala. Osai waget in remrem kamo agpaytolongan ageyat agpanawen sa Maalno pag Barita.
[28] Ayaw agkalimo sa mga agkabais sa kanyo. Angkataw no kamo yewed agkalimo na ina in tanda siro batay diyaeg. Batang sa Diyos in kanyo pandaeg.
[29] Angkataw in lakonaw pag tiyaboy Diyos sa kanyo panawen kay Kiristo yewed waget in agpaniwala sa kansiyo, dayem kadayo din in agbanta sa kaidapan panawen sa kansiyo.
[30] Kanyo ngiitan ako datiyan piyaglabanan, osai kanyo atawanan anggan ngona ako agaway kay piyaglabanan, kamay ngona kitam boo agpaysarigan piyaglabanan.