[1] In kamo agiyagem kay Kiristo, no ina agpakaeyat kanyo remrem, no kamo agkasadapan sa kansiyo agpakayawte, no kamo osai in Abyan Kiristo agpaybelag wa gayed, no kamo agpalsipakayawtean, agkapaytolongan,
[2] na no kataw ina, ako pakaanggayen wa gayed, sa agpalageman pag remrem, paltikkatawanen in agpakayawte, osai malsiyayonan wano.
[3] rn kanyo mga panawen ayaw sa agpanagiri, ayaw sa agpakabwat remrem Dayem agpakabwatte in remrem, pabalayen sa kanyo remrem keyen in mga amat maal kay sa kanyo.
[4] Tolongen in mga amat sa kansiro mga kailangan. Ayaw waget agremremen in kanyo mga sadiri kailangan.
[5] Pakabwatteen in kanyo remrem kataw daan Kiristo Isos. Siyo agpakabwatte remrem kataw anda.
[6] Siyo kataw wa daan gayed Diyos. Siyo kabwat daan Diyos, kamay ina pag kabwaten yewed kansiyo yaalwasi.
[7] Dayem siyo wakayte agbenglay in boo. Siyo mibaloy kataw wa daan sogowan. Siyo mibaloy kataw wa daan mangyan.
[8] In siyo mangyan wa siyo agpakabwatte daan, siyo agpaniwala kamayba siyo biyono, anggan kamaybawa in sa kodos pag katayan.
[9] Panawen ina siyo liyakonaw Diyos, piyakabwat in kansiyo tongkolin, piyalakonaw sa boo.
[10] Anggan in baatte osai sa langit, sa kobat, anggan sa galem diya batay agpaselang, agpasakop sa kansiyo ngaran.
[11] In boo batay keyen IsoKiristo in Kapwan, matang in Diyos Amang piyaglakonaw.
[12] Na, laki mga belag, tangona in ako asina kay sa kanyo kamo baatte maniwala sa kangay. Na ngona in ako idapo, labi kay kamo maniwala. Kamo pasakop gayed agkalimo sa Diyos, ayaw aglimbang agpanawen, anggan mibaloy wa gayed in boway piyagtaboy sa kanyo.
[13] Angkataw Diyos in agpanawen sa kanyo, matang kamo beet maniwala, osai kabaloy agpaniwala sa kansiyo.
[14] Sa boo kanyo panawen ayaw mabyat in remrem, ayaw agpalawayan.
[15] -
[16] Matang kamo maal wano gayed pag mga bodang Diyos, idapo batay ngiitan daet sa kanyo, idapo lebag, kamayba kamo agbalay sa kagwaraan mga mangyan agpamangwat daet, mga aleleng. Na in kamo agpatawtaw in barita agpamaboway kamo mga kagwali tinglaw sa kansiro agrawa sa lened. Na no kataw ina, sa Ibeng Kiristo agrateng lakonaw in kangay kaanggayan panawen sa kanyo, angkataw ngiitan wa gayed in galem kangay panawen, mibaloy wa makabolowan in ako ageyat.
[17] -
[18] Karam ako batay biyono kataw andog piyalagem sa kanyo piyagandog sa Diyos panawen kamo agpaniwala. No kataw ina na ako agkaanggay. Na kamo din agkaanggay. Kitam boo malsikaanggayan.
[19] No nges in Kapwan Isos beet, na idwa dogay batay kangay piyagsogo Timotiyo sa kanyo, matang no atai wakay rateng na apyaan wa in kangay remrem sa barita no kataw nakay wa kamo.
[20] Angkataw idapo kataw siyo agpakayawte sa kanyo, kataw daan in ako agpakayawte sa kanyo. Siyo agpanremrem ngani sa kanyo.
[21] Angkataw in boo roma in beet in kansiro waget sadiri pakinabang. Siro dayo agtolong sa kay IsoKiristo panawen.
[22] Kamo din kangitan wa in kansiyo kaalenen in siyo kagwali kangay bodang agtolong sa kangay in agpabarita in Maal pag Barita.
[23] No kangay wa atawanan in batay mibaloy sa kangay na siyo toloy wa kangay piyagpataboy asin sa kanyo.
[24] Osai nges in kangay piyagayay sa Kapwan, ako idwa din dogay batay kapataboy asin sa kanyo.
[25] Kamay in kangay remrem Ipaprodito paoliyen wa din asin sa kanyo. Siyo kanyo siyogo agtolong sa kangay. Kalbas siyo kangay wa gayed belag, kasondalo wa din katolong sa panawen Diyos.
[26] Siyo agkalowayan wano gayed osai agkariyaban din sa kanyo panawen rateng wa sa kanyo in barita keyen siyo apo maskit.
[27] Batang ngani apo maskit siyo, anggan bangen wa matay, kamay in Diyos agpakayawte sa kansiyo matang siyo maal wakay. Yewed waget sa kansiyo, dayem sa kangay din, matang in siyo piyaoraw na idwa mistobo in kangay agrongkot.
[28] Kaya ngani kangay beet siyo moli wa sa kanyo, matang no siyo kanyo wakay ngiitan na kamo agkaanggay wakay, na ako din idwa agrongkot.
[29] Na panawen sa Kapwan siyo kanyo gayed belagen, kaanggayanen. Kanyo pagmaalen in mga mangyan kataw siyo.
[30] Angkataw yewed kansiyo yaalwasi kansiyo boway sa ageyat agpanawen kay Kiristo. Siyo agkabangen wa matay, panawen siyo in kanyo sogowan agtolong sa kangay.