[1] Ako Pablo in agsolat, katiwala Kiristo Isos, angkataw ina in beet Diyos. Ako agsolat sa mga bodang Diyos sa Ipiso, sa mga yewed aglimbang agpaniwala kay Kiristo Isos.
[2] Kamo pakayawteen osai pakapyaen in Diyos kantam Amang osai IsoKiristo kantam Kapwan, osai pakanen in apyaan pag remrem.
[3] Kitam malkaanggayan sa Diyos sa Amang IsoKiristo kantam Kapwan. Kitam kansiyo wa piyakan in baatte maal pag batang sa langit, in piyagkailangan kantam abyan, angkataw kitam piyaagem kay Kiristo.
[4] Ikkay piyangwat in kobat, kitam iidang wa Diyos matang piyangwat maal gayed, idapo wa daet sa kansiyo pangkit panawen kitam agiyagem wa kay Kiristo. Panawen kitam kansiyo piyagpakayawte,
[5] kitam kansiyo piyabokod matang kitam kansiyo mga bodang. IsoKiristo in padalan agpabokod. Tangona daan kataw ina in maal pag remrem Diyos in kansiyo piyagkabeet.
[6] Ina matang batay piyagmaal in kalakoyen in kansiyo idapo piyagayay pag agpakayawte sa kantam, angkataw kitam piyaagem sa kansiyo piyagpakayawte pag Bodang.
[7] Kiristo biyono panawen sa kantam. Na kitam piyalpas, in beet siyabi liibangaw wa in kantam mga daet. In kalakoyen in lakonaw pag agpakayawte in Diyos sa kantam
[8] lakonaw wano lakoy anggan idwa asabi. Panawen sa kansiyo katawanan, sa kansiyo maal pag remrem
[9] -
[10] kansiyo wa piyangwat in kansiyo datiyan piyagremrem batay piyagpangwat. Kansiyo wa piyalowas sa kantam in kansiyo batang piyagbetang pag remrem, in kansiyo datiyan batay piyagpangwat paka rateng in kabetek. Kiristo in kansiyo padalan agpangwat. Ina pag kansiyo remrem in boote sa langit osai sa kobat kansiyo piyagpaagem kay Kiristo. Siyo in olo.
[11] Panawen kay Kiristo kami in mga Odyo iidang Diyos, matang kansiyo mga mangyan. Ina in siyandata Diyos in agpangwat in boote no nangkataw in beet kansiyo remrem.
[12] Kami in mga tokaw agpasandig kay Kiristo, siyandata Diyos agmaal sa kansiyo kalakoyen.
[13] Kalbas kataw din ina kamo in mga yewed Odyo. Paka kamo karengey in betek, in Maalno pag Barita in agpamaboway, na kamo din agpasandig kay Kiristo, mibaloy wa kansiyo mga mangyan. Kalbas kamo piyakan in piyangako Diyos in Betek pag Abyan, matang tanda kamo kansiyo agbangen.
[14] Ina pag Abyan in piyagtaboy sa kantam matang kantam matiyak atawanan batay ngani tiyaboy sa kantam in boo kansiyo piyangako sa kansiyo mga iidang, anggan dogayan mibaloy wa gayed piyaboway. Na kantam wa pagmaalen in kansiyo kalakoyen.
[15] Kaya ngani, ibat ako abaritaan kamo agpasandig wa kay Isos sa Kapwan, osai kamo agpakayawte sa boo mga bodang Diyos,
[16] ako palagi agkaanggay sa Diyos panawen sa kanyo. Sa kangay pandalangin kamo palagi piyagpaagem.
[17] In kangay piyagayay sa Amang lakoy, sa Diyos kantam Kapwan IsoKiristo keyen, Kamo pakanen in katawanan pag remrem osai siyo papangkit sa kanyo matang siyo kanyo wa gayed atawanan.
[18] Osai kansiyo paliwanagen sa kanyo remrem in kantam piyagpanaya, in galem in siyo agberya sa kantam, in kalakoyen in kayamanan kansiyo piyagsandata sa boo kansiyo mga bodang,
[19] osai in kansiyo idapo kalobosan pag kabaloyan sa kantam sa mga agpasandig sa kansiyo. Ina daan din pag kabaloyan lakoy
[20] in agpaboway wakay tagoli osai agpaakyat kay Kiristo sa langit, siyo piyangwat Diyos kapitan.
[21] Matang sakop wa daan sa kansiyo in boo mga poon, in mga koyay lakoy, in mga apo kabaloyan, in boo mga kapwan. Siyo labi kay mabwat sa boo mga tongkolin, yewed ngona waget pag mga betek, dayem anggan kamayba nangkadogay.
[22] In boo wanote piyasakop Diyos sa kabaloyan Kiristo. Osai siyo piyangwat poon, olo sa barkadaan mga bodang Diyos.
[23] In barkadaan in kansiyo bilog. Siyo in agpaibaloy sa boote sa boo betek. Paka miyagem wa sa olo in bilog, na siyo mibaloy wa gayed.