[1] Tangona kay kamo in mga yewed Odyo matay wa panawen sa kanyo mga daet, panawen kamo dayo maniwala.
[2] In kanyo mga ogali daet, kataw daan in mga ogali atai sa kobat. Kamo sakop sa poon mga mamaw, in datiyan agpansakop sa mga dayo maniwala sa Diyos.
[3] Tangona kami in mga Odyo kataw din ina. Kanyam piyagogali in mga ogali waget mangyan, kamayba nakay in beet kanyam bilog, in kanyam remrem. Na kami din kataw daan in boo mangyan piyagkagalitan Diyos panawen sa mga daet pag ogali.
[4] Kamay in Diyos maloba wa apakayawtean sa kantam. In kalakoyen in kansiyo agpakayawte sa kantam
[5] anggan kamayba wa kitam matay sa kantam mga daet, kitam piyaboway wakay piyaagem kay Kiristo. Kitam piyaboway wa ngani panawen sa kansiyo lakonaw pag agpakayawte sa kantam.
[6] Panawen kitam agiyagem kay Kiristo Isos kitam piyaboway wakay Diyos piyaakyat sa langit, sarig Kiristo agpansakop.
[7] Ina pag boo kansiyo piyangwat matang sa mga agrateng kay pag mga ibeng kansiyo batay apapangkit in idbatay asabi pag kalakoyen in kansiyo agpakayawte sa kantam. Kiristo Isos in padalan matang mipapangkit.
[8] Kitam piyaboway angkataw kitam agpasandig sa kansiyo. Kamay ina panawen sa kansiyo lakonaw pag agpakayawte sa kantam, yewed panawen sa kantam agbangen piyangwat. Ina tiyaboy waget Diyos sa kantam.
[9] Yewed panawen sa kantam mga piyangwat, matang kitam yewed mayadi agpakabwat remrem.
[10] Kitam piyangwat Diyos. Kaya kitam piyangwat matang kitam agiyagem kay Kiristo Isos agpangwat maal sa boo kantam ogali. Tangona daan ina pag maal pag ogali siyandata wa Diyos matang kantam piyangwat.
[11] Kamo in mga yewed Odyo ayaw anaweyan sa kanyo tangona boway. In mga Odyo, panawen sa kansiro piyangwat sa kansiro bilog, siro piyagawit toli. Kalbas kamo kansiro piyagawit yewed toli.
[12] Kanyo pagremremen, tangona kamo agisoway kay Kiristo, yewed agiyagem sa mga mangyan Diyos. Kamo mga panyawan waget, idapo bagiyan sa polong Diyos, sa kansiyo mga piyangako sa kansiyo mga mangyan. Kamo agkaboway waget atai sa kobat idapo Diyos, idapo piyagpanaya.
[13] Kamo tangona adayonaw sa Diyos. Kamay ngona, Kiristo biyono panawen sa kantam. Na kamo piyaagem sa kansiyo piyasabangen wa Diyos.
[14] Kitam yaayos wakay Kiristo, piyabelag. Kami in mga Odyo, osai kamo in mga yewed Odyo, kansiyo piyangwat osai waget. Kansiyo tiyaboy kansiyo bilog, matang kansiyo riyegnas in kagwali bengbeng in agpalsoway sa kantam, in kitam agpalaway.
[15] Osai in mga Batas mga Odyo, ina boo bilin, boo otos, ina kay Isos wa piyaidapo kabaloyan, matang piyaagem wa sa kansiyo in mga Odyo osai in mga yewed Odyo. Siro piyangwat wa osai waget matang apyaan wa gayed.
[16] In siyo matay sa kodos, kansiyo wa liyobos in agpalaway in mga Odyo osai in mga yewed Odyo. Tanan wakay piyaoli sa Diyos, mibaloy wa osai waget.
[17] Kiristo atai pataboy, agpatoldo in Maal pag Barita keyen, piyagpamakapya kadayo din kamo in mga yewed Odyo adayonaw sa Diyos, kadayo din kami in mga Odyo bangente sa kansiyo.
[18] Panawen kay Kiristo tanan wa maal agpasabangen sa Amang sa padalan in Betek pag Abyan.
[19] Na kamo mga yewed Odyo idwa taga adayonaw, idwa panyawan. Dayem kamo mga belag wa sa mga iidang Diyos, osai miyagem wa sa kansiyo talnakiyan.
[20] Kamo din piyaiskapet sa balay piyagtadyok in mga katiwala Kiristo, osai in mga poropita. IsoKiristo wa daan in arigi lakoy.
[21] In baatte towar piyagpasibay sa amat towar. Kiristo in pamekkes, matang in piyagpangwat balay lakoy maalen, piyabokod tiyalaga sa Kapwan.
[22] Panawen kamo din agiyagem kay Kiristo kitam boo piyalkapetan matang pagbalayan Diyos, piyagbalayan kansiyo Abyan.