[1] Kao kangay piyagpabilinan sa pangkit Diyos osai Kiristo Isos in batay agidang no nakay in parosaanen sa mga agkaboway osai sa mga matay wa. Panawen sa siyo batay wakay agrateng batay agpapoon, kao kangay piyagpabilinan
[2] agpaliwanag in Agiplaong Diyos, agpilit agpaliwanag kamayba kabetek, kamayba yewed, sabiyanen in mga agpatoldo daet, pabeteken in mga baribid pag panawen, paeyaten in remrem in mainaen pag mga mangyan. Kao agpakabait in agpatoldo.
[3] Angkataw agrateng wa in kabetek in mga mangyan idbatay wa agparengey sa betek pag piyagpatoldo, dayem in kansiro waget beet. Siro batay agpamangkit aronaw mga mangyan in kansiro waget beet in piyagpatoldo.
[4] Siro batay agidapo kabolowan sa betek, toloy wa maniwala sa mga panggisoden.
[5] Kamay kao agbangen, kamayba nakay in mibaloy kao agpakaeyat in remrem, agbanta sa boo mga kaidapan, agpilit agpabarita in Maal pag Barita, pangwaten gayed in tongkolin tiyaboy Diyos sa kaimo.
[6] Kamay ako agbangen batay wa kagwali andog, rateng wa in kabetek ako batay wa matay.
[7] Kangay wa piyangwat in boo kangay abaloyan sa labanan lakoy. Ako yewed agpaglebey agpaniwala. Lobos wa kangay diyalagan in boo dalan tiyaboy sa kangay.
[8] Ngona in Diyos apo siyandata sarikaw sa kangay tanda sa betek in piyagtaboy sa mandaeg. Sa Ibeng Agosap in Kapwan in betek pag agidang, siyo in batay agtaboy sa kangay ina pag sarikaw. Kamay yewed waget sa kangay, dayem sa boo mga agkaanggay agpanaya in siyo rateng atai.
[9] Piliten karateng atai sa kangay, ayaw dogay.
[10] Ako biyaliwan wa Dimas panawen siyo agkabeet wa sa mga sangkap, pataboy wa sa Tisalonika. Kirisinti pataboy sa Galasya, Titos wakay sa Dalmasya.
[11] Lokas waget in kangay sarig atai. Markos kaimo tangawen, atai paanggaten, angkataw siyo kangay batay katolong sa panawen.
[12] Tikiko kangay wa piyataboy sa Ipiso.
[13] Paka kao atai agtaboy na babaen kangay islen ista kangay biyaliwan kay Karpo sa Torowas, kadayo in kangay mga aklat, labi kay in mga lakonaw in bayad.
[14] Daeten wano in piyangwat sa kangay Aliyanro in agpamangwat tanso. In Kapwan wa in batay agparosa sa kansiyo panawen sa kansiyo piyangwat.
[15] Kao agingat sa kansiyo, angkataw siyo aglaban wano sa kantam piyagpabarita.
[16] In tokaw ako piyagosapan idapo agtolong sa kangay. Ako biyaliwan wa in boo. Kangay piyagpandalangin ayaw siro parosaanen in Diyos.
[17] Kamay in Kapwan agtolong daan sa kangay. Ako piyakan eyat matang kapabarita in boo Maal pag Barita sa boo mga yewed Odyo. Kalbas ako kansiyo wa piyaboway, idwa biyono.
[18] Ako batay piyaboway in Kapwan sa boo mga daet, siyo din batay agpaanggat sa kangay sa kansiyo sakopan sa langit. Siyo pagmaalen anggan idapo kalobosan. Ina wa ngani.
[19] Kao keyen kay Pirisila osai Akwila, kataw nakay wa siro, osai sa talnakiyan Onisiporo.
[20] Irasto mataw sa Korinto. Toropimo wakay kangay biyaliwan sa Milito angkataw siyo apo maskit.
[21] Bayo rateng in balongaing piliten kao atai karateng. Kora Yobolo, Podinti, Lino, Kalaodya, osai in boo mga belag, siro keyen, Kao nangkataw wa?
[22] In kangay pandalangin kao pakayawteen in Kapwan. Kamo boo pakayawteen in Diyos.