[1] Ako Pablo in agsolat, sogowan Diyos, katiwala IsoKiristo. Ako siyogo agpaeyat sa mga bodang Diyos sa kansiro paniwala, osai agpaistobo sa kansiro atawanan sa betek in agakay kantam sa Diyos,
[2] panawen sa agpanaya sa boway idapo kalobosan. Tangona kay naw, idapo kay in kobat, ina pag boway piyangako wa Diyos in yewed katawan agsabi baribid.
[3] Kalbas sa kabetek ina kansiyo wa piyalowas kansiyo agiplaong. In Diyos in kantam Agpamaboway agsogo sa kangay agpaliwanag ina pag barita in kansiyo piyaalapet sa kangay.
[4] Ako agsolat sa kaimo laki Titos, kao kangay wa gayed bodang sa paniwala. Kita tanan agpaniwala. Kangay pandalangin kao pakayawteen lakoy osai pakanen apyaan pag remrem in Diyos Amang osai Kiristo Isos kantam Agpamaboway.
[5] Kao wa in kangay biyaliwan sa Kirita matang kaimo pakapyaen in mga yewed kay sibay, osai kao omidang mga koyay sa mga barkadaan mga bodang Diyos sa baatte bayan, kataw in kangay piyabilin sa kaimo.
[6] In kaimo pamangkiten mangyan in idapo batay ngiitan daet, osai waget in babai, kadayo in mga bodang agpaniwala, yewed agpalawayan, yewed din daegan.
[7] Angkataw in agpapoon sa barkadaan mga bodang Diyos kailangan idapo batay ngiitan daet sa kansiyo angkataw siyo paalapetan Diyos. Siyo yewed mayadi agpalalo, yewed galiten, yewed aglasing, yewed mayadi matapang, yewed amagen.
[8] Kailangan siyo agpabelag, agkamaalan sa maal pag ogali, apo ngani bait, boo betek, maal wano, osai kabaloy agsakop sa kansiyo remrem.
[9] Kailangan siyo agatang marigen sa barita piyatoldo, in maal piyaniwalaan. Kataw ina siyo batay kapatoldo in betek pag barita sa mga roma, osai batay kabaloy agpabetek sa mga aglaban asin.
[10] Aronaw in mga mangyan daegan aglaban asin pag adar, in karowen sa kansiro in mga agsogo keyen patoli wa. In kansiro mga agiplaong idapo kabolowan agpamadaya sa mga amat.
[11] Kailangan siro sawayen, dodowen in kansiro piyagpangwat, angkataw apo wa talnakiyan kansiro wa gayed piyaggolo. Siro agpatoldo in yewed maal patoldowen matang waget kabel kowarta.
[12] Osai ka poropita taga daan Kirita in agsabi keyen, In mga taga Kirita datiyan mga agpansabi baribid, mga idapo bait, mga bibelen, mga solangan.
[13] Na betek ngani in piyagsabi ina pag taga Kirita. Panawen ina siro pangelelen wa gayed, matang siro piyakapya wakay sa kansiro paniwala,
[14] osai matang siro ayaw wa maniwala sa mga panggisoden in mga Odyo, kamayba sa piyagpatoldo in mga mangyan dayo sa betek.
[15] Sa mangyan maalno in remrem, in boo maalno. Kamay sa mga mangyan daeten in remrem osai yewed agpaniwala, na sa kansiro in boo daeten, angkataw daeten wa in kansiro bait, in kansiro remrem.
[16] Kansiro piyagsabi siro katawan sa Diyos, kamay ina yewed piyagngitan sa kansiro mga ogali. Siro mga marames wa labi, mga daegan, idbatay wa kapangwat kamayba nakay pag maal pag ogali.