[1] Remremen anda. Sa kalobosan pag mga ibeng batay apo mga kabetek maidap wano.
[2] Batay apo mga mangyan madamot, agkabeet aronaw sangkap, agpalalo, mayabang, agpansabi daet sa roma, agsonggar sa mga koyay, yewed agremrem maal, aglibak sa Diyos,
[3] yewed agpakayawte, yewed agpabelag, agpanlibak, yewed agsakop sa kansiro remrem, matapang, dayo sa maal,
[4] yewed paniwalaan, bosliyen, agpakabwat, beet agpakaanggay sa sadiri, dayo agpakaanggay sa Diyos.
[5] Siro agpakagwali agpaniwala kamay in kansiro mga ogali agpapangkit idapo kabolowan in siro keyen siro agpaniwala. Kao ayaw agyanggat sa mga kataw ina pag mangyan.
[6] In kalaati sa kansiro agpangisoroy sa mga balay, matang kansiro piyagsakop in mga kagbaiyan kabwatte in remrem, mga abyatan kansiro mga daet, mga piyagakay kamayba nakay in beet,
[7] mga kagbaiyan baatte agadar kamay yewed daan katawan in betek.
[8] Ina pag mga kaliyakiyan aglaban sa betek, kataw Anis osai Amris lomaban kay Mowisis. Siro idapo agremrem maalno, yewed sibay in kansiro paniwala.
[9] Kamay idwa dogay siro diyaeg wa, angkataw in kansiro idapo katawanan batay piyagngitan in boo, kataw in mibaloy kay Anis osai Amris.
[10] Kamay kao agbangen, kaimo atawanan wa gayed in kangay piyagpatoldo, in kangay mga ogali, osai in kangay piyagpilit piyagkabel. Kaimo ngiitan in ako agpaniwala, in ako agbanta sa mga kaidapan, in ako agpakayawte sa amat, in ako idbatay siyawaan agpaniwala,
[11] in ako piyagpangwatan daet, osai in mga kaidapan kangay piyagbanta. Kaimo atawanan in mibaloy sa kangay sa Antiyokya, sa Ikonyo, osai sa Lisra. In kalobaen in mga kaidapan kangay diyalan. Kamay asin pag boo ako tiyolong in Kapwan.
[12] In boo mga beet agogali maalno panawen agyanggat kay Kiristo Isos batay piyagpaidapan.
[13] Kamay in mga agpamangwat daet labi kay batay agistobo in daet. In mga agpatoldo baribid, labi kay batay agistobo in baribid. Siro agpadaya sa amat kadayo din siro piyagpadaya.
[14] Kamay kao agbangen, ayaw agbaliwanen in mga piyatoldo kaimo atawanan, kaimo piyagpasandigan marigen, nangkataw kaimo atawanan maal piyaniwalaan in mga agpatoldo sa kaimo.
[15] Sogod bodangte kay kaimo atawanan in Maalno pag mga Agisolat, in kabaloy agpatoldo sa kaimo matang kao batay piyagpaboway gayed panawen sa agpasandig kay Kiristo Isos.
[16] In boo mga Agisolat in Abyan Diyos in agpasolat. Ina apo kabolowan sa agpatoldo in betek, sa agayaw sa daeten pag piyagpatoldo, sa agpaoraw sa baribid pag panawen, osai sa agakay sa betek pag ogali.
[17] Matang in sogowan Diyos sandata, apo kabaloyan agpangwat in boo maalno pag panawen.