[1] Ako Pablo in agsolat. Sa beet Diyos ako katiwala Kiristo Isos, siyogo agbarita panawen sa boway piyangako sa mga agiyagem kay Kiristo Isos.
[2] Ako agsolat kay Timotiyo, in kangay piyagpakayawte pag bodang. Laki Timotiyo, in kangay pandalangin kao pabelagen, pakayawteen, osai pakaanggayen in Diyos kantam Amang, osai Kiristo Isos kantam Kapwan.
[3] Ibeng osai yabi ako baatte agremrem sa kaimo osai agpandalangin agkaanggay sa Diyos in kangay piyagpaniwalaan gayed kataw in piyangwat in kangay mga kakoyayan.
[4] No kangay aremreman in kao agpanangis, na ako maloba wano beet katagbo wakay sa kaimo, matang ako batay agkaanggay gayed.
[5] Palagi kangay piyagpanremrem in kao yewed aglimbang agpaniwala, kataw in agpaniwala kaimo akbai Lowida, osai in kaimo inang Yonisi. Kangay atawanan kao agaway kay daan agpaniwala.
[6] Ina in dailan kaya kao kangay piyagpabilinan kaimo pakaeyaten in agpangwat in tongkolin tiyaboy Diyos sa kaimo tangona in kao kangay yaatang piyandalangin.
[7] Angkataw in tiyaboy Diyos sa kantam yewed in agkalimo, dayem in kansiyo Abyan in agtaboy sa kantam in kabaloyan, in agpakayawte, osai in katawan agsakop sa kantam remrem.
[8] Na ayaw agkalimo agbarita panawen sa kantam Kapwan. Ayaw din agkalimo panawen ako piyagbilanggo panawen kay Kiristo. Dayem kao sandata din domalan sa kaidapan panawen sa Maal pag Barita, na kao batay piyakan Diyos kabaloyan agbanta.
[9] Kitam piyaboway in Diyos osai iidang matang kansiyo bodang. Ina kansiyo piyangwat yewed panawen sa kantam mga piyangwat, dayem panawen sa kansiyo remrem, panawen siyo agpakayawte sa kantam. Ikkay piyangwat in kobat siyo agpakayawte wa sa kantam panawen kay Kiristo Isos.
[10] Kamay ina bayo piyalowas in rateng Kiristo Isos, in kantam Agpamaboway. Panawen sa Maal pag Barita kantam atawanan kansiyo wa diyaeg in katayan, osai piyalowas in boway idapo kalobosan.
[11] Ako piyangwat Diyos katiwala agpatoldo matang agbarita ina pag Maal pag Barita.
[12] Ina in dailan kaya ako piyagkaidapan kataw tai. Kamay ako yewed agkalimo, angkataw kangay atawanan in kangay piyagpasandigan, atawanan ngani siyo apo kabaloyan kansiyo batay piyagalapet anggan sa kalobosan pag ibeng in Maal pag Barita kansiyo piyaalapet sa kangay.
[13] Kaimo alapeten, kaimo toladen in mga maalno pag kangay piyatoldo sa kaimo. Ayaw agempet agpaniwala osai agpakayawte panawen kitam agiyagem kay Kiristo Isos.
[14] Kaimo alapeten in boo mga maal in piyaalapet Diyos sa kaimo, sa tolong in Betek pag Abyan agbalay sa kantam.
[15] Kaimo atawanan ako biyaliwan wa in boo mga taga Asya, kadayo Pigilo osai Irmoginis.
[16] In boo mga kamalay Onisiporo pakayawteen in Kapwan. Makakarowan wa ako kansiyo tiyolong. Siyo yewed agkalimo kamayba ako piyagbilanggo.
[17] Kamay in siyo rateng sa bayan Roma ako kansiyo piilit piyamangkit anggan ngiitan.
[18] Kaimo ngani atawanan in karowen in kansiyo tolong sa kangay in ako sa Ipiso. Kangay pandalangin siyo pakayawteen in Kapwan sa Ibeng in Kapwan.