[1] In mga alapet sogowan, pakalakonawen in kansiro mga kapwan, matang idbatay piyaglibak in Diyos osai in kantam piyagpatoldo.
[2] No in kansiro kapwan agpaniwala na ayaw agpaidapowen kabolowan panawen siro tayari sa agpaniwala. Dayem pakaeyaten in agpaniwala sa kansiro angkataw in piyagtolong kansiro piyagmaal panawen siyo agpasandig din kay Kiristo. Anda in kaimo mga pakalakonawen sa kaimo piyagpatoldo.
[3] Kamayba nakay pag mangyan no osai wakay in piyagpatoldo, idwakay kataw in siyabi kantam Kapwan IsoKiristo, osai idwakay kataw in mga adar makamaal sa kantam mga ogali,
[4] na siyo agbosli, idapo atawanan. Siyo agkasadapan waget agmatiwidan agpaylabanan sa mga agiplaong. Kadogay siro agpanagiri, agpalawayan, agpanlibak, agpamabintang,
[5] osai agpalsisagotan. In mga kataw ina yewed katawan agremrem, yewed katawan in betek. Kansiro remrem in agsamba padalan waget agpayaman.
[6] Kamay ngani lakonaw din in batay abel in agsamba no siyo yewed solangan.
[7] In kitam biyodang kitam idapono biyaba kamayba nakay, kalbas no kitam dogayan matay na idapo din batay biyaba.
[8] Na kitam agkaanggay wa no kitam apo piyagkoman, osai apo piyagsoroy.
[9] Kamay in mga agkabeet aronaw sangkap, siro batay piyagtepeng. Siro piyagsalaod kansiro daeten pag mga piyagkabeet, in agbenglay sa kansiro sa toyongan.
[10] Angkataw in agkabeet sa mga sangkap osai ka pagrakayan in boo daet. Panawen sa agkabeet sa mga sangkap apo mga mangyan batang nges agpaniwala kamay ngona malibangaw, kalbas in kansiro remrem siyaldak wa aronaw mga kaidapan.
[11] Kamay kao wakay, kao sogowan Diyos, ayaw paagem asin pag mga daet. Kao agpilit agogali in betek, in maalno, in agpasandig kay Kiristo, in agpakayawte, in agbanta, osai in mabait.
[12] Kataw in mga begle ageyat matang mibaloy koyay, na kao ageyat agpaniwala, matang kao kabel in boway idapo kalobosan. Ina in piyangako Diyos, in siyo agberya sa kaimo, in kaimo piyatotoo in kaimo paniwala sa pangkit in karowan.
[13] Sa pangkit Diyos in agtaboy boway sa boote, osai sa pangkit Kiristo Isos in agpatotoo maalno in siyo piyagtanong Ponsiyo Pilato,
[14] kao kangay piyagpabilinan, kaimo alapeten in kaimo tongkolin, ayaw somala, ayaw apo daet, anggan rateng in kantam Kapwan IsoKiristo,
[15] sa kabetek siyo piyalowas Diyos in pagmaalen in boo, in Poon lakoy apo kabaloyan, in Mabwat kay sa boo mga poon, in Kapwan in boote.
[16] Siyo waget in idapo katayan, agbalay sa rawa makasolap wano gayed. Idapo batang kangitan sa kansiyo, anggan ngona idapo batang kangitan. Siyo in pagmaalen, osai in apo kabaloyan anggan idapo kalobosan. Ina wa ngani.
[17] Kaimo sabiyen sa mga aronaw sangkap ayaw siro agpakabwat, ayaw siro agpasandig sa mga sangkap agkaidapo, no yewed sa Diyos in agtaboy lakoy in boote matang kitam agkaanggay.
[18] Siro kaimo patoldowen agpangwat in maalno, agpayaman sa maalno pag panawen, yewed ayawan, dayem agpanaboy sa mga roma.
[19] Kataw ina siro agtipon in sangkap sa dogayan pag boway,osai batay kabel in totoo pag boway.
[20] Laki Timotiyo, kaimo ngani alapeten in piyaalapet Diyos sa kaimo. Ayaw agpaagem sa mga agpanggisoden yewed makaanggay sa Diyos, osai sa mga matiwid piyagawit katawanan kamay yewed totoo.
[21] Apo mga agpaniwala asin pag mga matiwidan, kalbas malibangaw sa paniwala. Kamo pakayawteen in Diyos.