[1] Ako Pablo in agsolat, ako katiwala Kiristo Isos panawen ako iidang Diyos in Agpamaboway sa kantam, iidang din Kiristo Isos in kantam piyagpasandigan.
[2] Ako agsolat kay Timotiyo, sa kangay wa gayed bodang sa paniwala. Laki Timotiyo, in kangay pandalangin kao pabelagen, pakayawteen, osai pakaanggayen in Diyos kantam Amang, osai Kiristo Isos kantam Kapwan.
[3] Kaimo remremen, in ako batay wa sa Masidonya, kangay bilin sa kaimo kao mataw sa Ipiso, angkataw apo asin mga mangyan agpatoldo in baribid pag adar. Na kao mataw ngani asin agayaw sa kansiro.
[4] Siro kaimo patoldowen keyen benglayen wa in mga panggisoden osai in maaba pag mga listaan mga kakoyayan. In mga kataw ina in parakayan agpaylabanan, ina yewed makatolong sa kantam agpangwat in remrem Diyos, in batay atawanan panawen sa agpasandig sa kansiyo.
[5] Kaya ako agbilin kataw ina matang kitam agpakayawte batang sa maalno pag remrem, idapo daet, batang din sa agpasandig gayed kay Kiristo.
[6] In kalaati agbenglay wa ina pag panawen, matang siro toloy wa sa mga idapo kabolowan pag panggisoden.
[7] Kansiro beet agpatoldo in mga Batas Diyos, kamay yewed kansiro atawanan in kansiro mga piyagsabi, in kansiro mga piyagpangaas piyagpatoldo.
[8] Kanta atawanan maal in mga Batas, kamay kailangan alapeten sa maal pag padalan.
[9] Kanta remremen, kaya piyangwat in mga Batas yewed batay sa mga maalno pag mangyan, dayem batay sa mga dayo sa batas, mga daeten pag mangyan, mga dayo sa Diyos, mga aleleng, mga aglibak sa Diyos, mga yewed agsamba, mga agpamono sa kansiro mga koyay, mga agpamono mangyan.
[10] In mga Batas piyangwat ngani batay sa mga agpanggaraw, mga bakla, mga kamomogot, mga agpansabi baribid, mga agpamabintang, kamayba nakay pag aglaban sa betek pag piyagpatoldo.
[11] Ina pag piyagpatoldo sa Maalno pag Barita batang sa Diyos in pakalakonawen osai pagmaalen in boo. Ina piyaalapet sa kangay matang piyabarita.
[12] Ako agkaanggay kay Kiristo Isos kantam Kapwan, in agtaboy sa kangay in kabaloyan atai pag panawen. In kangay piyagkaanggayan kansiyo remrem ako yewed aglimbang matang ako kansiyo iidang kansiyo sogowan.
[13] Ako iidang kamayba ako tangona aglibak sa kansiyo, siyo kangay piyagpaidapan, piyagpangwatan daet. Kamay ako piyakayawte in Diyos angkataw yewed kangay atawanan in kangay piyagpangwat in ako yewed kay agpasandig sa kansiyo.
[14] Kamay lakonaw in agpakayawte in Kapwan sa kangay, anggan ako piyakan kabaloyan agpasandig sa kansiyo, osai agpakayawte sa mga roma, kataw din in boo piyaagem kay Kiristo Isos.
[15] Kiristo Isos atai pataboy sa kobat matang agpaboway sa mga agpamangwat daet. Ina pag siyabi totoo ngani, maal paniwalaanen in boo. Tangona ako in apo daet labi kay sa boo mangyan.
[16] Kamay ako piyakayawte in Diyos anggan Kiristo Isos agaway kay agpakayawte sa kangay kamayba in kangay daet lakonaw sa boo. Ina osai ka alimbawa sa mga batay agpasandig sa kansiyo, mga batay piyakan boway idapo kalobosan.
[17] Pagmaalen osai paglakonawen anggan idapo kalobosan in Diyos. Siyo osai waget, Poon lakoy idapo kalobosan, idbatay matay, osai yewed piyagngitan. Ina wa ngani.
[18] Laki kangay bodang Timotiyo, anda pag boo kangay piyagpabilin sa kaimo panawen sa mga siyabi tangona in mga poropita panawen sa kaimo. Ayaw alibangawan ina pag mga siyabi matang kao apo eyat aglaban,
[19] agpaniwala daan, osai maalno in remrem. Apo mga mangyan yewed maniwala sa kansiro maalno pag remrem, matang toloy wa masida in kansiro paniwala.
[20] Kataw ina Iminyo osai Aliyanro. Siro kangay wa tiyaboy kay Katanas matang patoldowen ayaw aglibak sa Diyos.