[1] Mga belag, sa kalobosan agbangen, kami dalanginen matang in agiplaong in Kapwan madali omarabang, osai pagpakalakoyen kataw din in sa kanyo.
[2] Kami din dalanginen matang kami yewed abel in mga aleleng, in mga daeten pag mangyan, angkataw apo mga yewed agpaniwala sa agiplaong Diyos.
[3] Kamay in Kapwan yewed aglimbang. Kamo kansiyo batay piyagpakan eyat osai piyagalapet panawen sa Daeten.
[4] Panawen sa Kapwan lakonaw in kanyam paniwala in kanyam mga bilin kanyo wa piyagpangwat osai batay din piyagpangwat.
[5] Paistobowen in Kapwan in kanyo atawanan sa agpakayawte in Diyos, osai sa kabaloyan agtiis piyagtaboy Kiristo.
[6] Laki mga belag, panawen kami piyagsogo in Kapwan IsoKiristo kamo kanyam piyagayaw agyanggat sa bibelen pag mga belag, sa mga dayo agogali in kanyam mga piyatoldo sa kanyo.
[7] Kanyo wa daan atawanan kailangan kamo tomolad sa kanyam piyangwat. In kami asina kay kami yewed agkabibel agpanawen.
[8] In pamangnen kanyo tiyaboy sa kanyam, kanyam piyagbayadan. Kami agpanawen maloba ibeng kamayba yabi, agpilit matang kami yewed mabyat sa kanyo.
[9] Maal nges kami mangayay sa kanyo, kamay yewed ina in kanyam piyangwat matang kamo pakanen pagtoladan.
[10] In kami agyanggat kay sa kanyo kamo kanyam piyakan bilin keyen, kamayba nakay in dayo agpanawen ayaw agpakanen pamangnen.
[11] Kaya kanyam siyabi angkataw apo agbarita sa kanyam keyen in kalaati sa kanyo bibelen, yewed ageyat sa kansiro daan panawen, dayem agpagolo sa mga roma mangyan panawen.
[12] Sa kabaloyan in Kapwan IsoKiristo maloba wa kami agpatoldo sa kataw ina pag mga mangyan keyen agpanawen gayed maal, ayaw agpagolo, matang kangitan in kansiro daan pamangnen.
[13] Kamay mga belag, ayaw kitam piyagsawaan agpangwat maal.
[14] Kamayba nakay in dayo maniwala sa kanyam mga bilin atai pag solat na kanyo tandaanen, kalbas ayaw agyanggat matang siyo arikoyan.
[15] Kamay ayaw kanyo agsabiyen siyo kalaban, no yewed kanyo patoldowen kataw daan belag.
[16] In Kapwan in agtaboy in apyaan pag remrem, na in kanyam pandalangin kamayba nangkataw in mibaloy kamo baatte kansiyo pakanen in apyaan pag remrem. Kamo boo sarigen in Kapwan.
[17] Ako Pablo in agsolat anda in agpaalam agbangen. Anda in kangay pirma sa boo kangay mga solat. Kataw ina in kangay solat.
[18] Kamo boo pakayawteen in kantam Kapwan IsoKiristo.