[1] Kami apo piyagsabi panawen sa agrateng in kantam Kapwan IsoKiristo, osai panawen sa kitam batay tiipon sa kansiyo.
[2] Mga belag, anda in kanyam piyagsabi wano sa kanyo, ayaw kamo toloy ariyaban, ayaw magolo kanyo remrem sa mga agsabi keyen rateng wa in Ibeng in Kapwan. Kamaybawa siro kono agporopita, no yewed keyen kanyam kono piyatoldo, no yewed solat batang kono sa kanyam.
[3] Kamo ayaw maniwala kamayba nangkataw in kansiro siyabi kamayba nakay pag mangyan siro. Angkataw idbatay kay rateng in Ibeng in Kapwan anggan yewed kay mibaloy in mga mangyan agpaypanlaban lakoy sa Diyos, osai no ikkay lomwas in Mangyan in Agpanonggar wano sa boo siyabi Diyos. Siyo dogayan batay piyagtaboy sa kaidapan idapo kalobosan.
[4] Siyo batay aglaban sa boo mga piyagsamba mga mangyan sa boo mga piyagawit diyos. Siyo batay agyabang asin pag boo. Siyo batay misoroy sa balay lakoy Diyos tomokkaw ista. Kansiyo piyagsabi keyen, Ako in Diyos.
[5] Ina pag boo in datiyan wa kangay piyagsabi in ako asin kay kanyo, aon? Amba remremen wakay.
[6] Kalbas kanyo din atawanan no nakay ngona in agayaw asin pag Agpanonggar matang siyo idbatay kay lomwas anggan sa kabetek.
[7] Kamay ngona in kabaloyan in Agpanonggar agpangwat wa daet, piyagtago kay, anggan baywi kay in agayaw ina. Kamay paka idapo wa in agayaw
[8] na in Agpanonggar piyagngitan wa. Kamay paka rateng Isos in Kapwan, in kansiyo paroypoy batay agbono asin pag Agpanonggar, osai in kansiyo makasolap pag kalakoyen, batay agsida in boo kansiyo kabaloyan.
[9] Katanas in batay agpalowas ina pag Agpanonggar, osai in agtaboy sa kansiyo kabaloyan agpangwat in boo mga panawen agpamadaya pag mga tanda, mga makasoyo.
[10] Kansiyo batay piyagpangwat in boo mga daet agpamadaya sa mga batay sa toyongan, angkataw siro dayo maniwala sa betek in agpaboway nges sa kansiro.
[11] Panawen siro dayo maniwala sa betek siro piyabayaan wa Diyos, matang siro maloba piyadaya anggan kansiro piyagpaniwala in baribid.
[12] Na batay piyarosaan in boo mga beet sa daet, in mga dayo maniwala sa betek.
[13] Mga belag piyagpakayawte in Kapwan, kailangan kami baatte agkaanggay sa Diyos panawen sa kanyo, angkataw sa parakayan kay kamo iidang Diyos matang piyaboway, matang din kamo piyagpakamaalno in kabaloyan in Abyan, osai din matang kamo agpaniwala sa betek.
[14] Ina ngani in dailan kaya kamo biyerya Diyos matang kamo maniwala sa Maal pag Barita kanyam piyatoldo sa kanyo matang din kamo piyakan bagiyan in kalakoyen kantam Kapwan IsoKiristo.
[15] Na ngani mga belag, ayaw agpaglebey, pakarigenen in agiskapet sa kanyam mga piyatoldo sa kanyo, kamayba sa agiplaong, kamayba sa solat.
[16] Osai in kanyam pandalangin kamo pakaanggayen in kantam Kapwan IsoKiristo osai in Diyos kantam Amang in agpakayawte sa kantam anggan kitam piyakan idapo bayad in idapo kalobosan pag maeyat remrem osai in maal pag piyagpanaya.
[17] Na kamo pakanen in marigen pag remrem matang kamo yewed aglimbang agpangwat osai agbarita in boo maal.