[1] Kami Pablo, osai Silas, osai Timotiyo in agsolat sa barkadaan mga bodang Diyos sa Tisalonika, in mga iidang Diyos kantam Amang osai IsoKiristo in Kapwan sa boo.
[2] Kanyam pandalangin kamo pakayawteen lakoy in Diyos Amang osai in Kapwan IsoKiristo, osai pakanen apyaan pag remrem.
[3] Laki mga belag, kailangan kami palagi agkaanggay sa Diyos panawen sa kanyo. Maal in kami agkataw ina angkataw kanyo piyagpakarigen wano in agpasandig kay Kiristo, osai agistobo din in kamo agpaybelagan.
[4] Matang kamo kanyam piyaglakonaw sa mga barkadaan mga bodang Diyos panawen kamo agaway kay agpaniwala osai kamaybawa kamo piyagpangwatan daet, aronaw in mga kaidapan kanyo piyagdalan, na kamo agbanta daan.
[5] Panawen ina piyagngitan betek in mga batay piyangwat Diyos, angkataw kamo kansiyo batay piyasibay mibaloy kansiyo mga bodang. Ina in dailan kaya kamo agbanta sa kaidapan.
[6] Batay ngani piyangwat Diyos in maal, kansiyo ngani batay piyagpaidapan in mga agpaidap sa kanyo.
[7] Kamo wakay in mga piyagpaidapan, kamo batay piyakan apyaan, kataw daan kami. Ina kansiyo batay piyagpangwat sa betek agrateng in Kapwan Isos batang sa langit sarig in kansiyo mga maeyat pag angil
[8] sa agigang lakoy baya. Kansiyo batay piyarosaan in mga yewed katawan sa Diyos, in mga yewed agpaniwala sa Maal pag Barita panawen sa kantam Kapwan Isos.
[9] In parosa sa kansiro siro batay piyagpaidapan idapo kalobosan, siro batay piyakaadayonaw sa Kapwan sa kalakoyen kansiyo kabaloyan.
[10] Ina batay mibaloy sa Ibeng siyo batay atai matang siyo piyaglakonaw in kansiyo mga mangyan, osai matang siyo piyagmaal in boo mga agpasandig sa kansiyo. Ina kamo din angkataw kamo maniwala sa Maal pag Barita kanyam piyatoldo sa kanyo.
[11] Ina in dailan kaya kamo palagi kanyam piyagpandalangin matang kamo kansiyo pangwaten sibay sa mga ogali kansiyo tiyaboy sa kantam. Osai panawen sa kansiyo kabaloyan kamo pakanen in boo maalno kanyo beet osai kansiyo pabaloyen in boo kanyo mga piyagpangwat panawen kamo agpasandig sa kansiyo.
[12] No kataw ina na in ngaran kantam Kapwan Isos kanyo batay piyagpakalakonaw, osai kamo batay din kansiyo piyagpakalakonaw panawen kamo piyagpakayawte Diyos osai in Kapwan IsoKiristo.