[1] Laki mga belag, idwa kailangan kami agsolat sa kanyo no nangkadogay gayed betek in batay mibaloy in mga ina.
[2] Angkataw kanyo wa daan gayed atawanan in Kapwan batay agrateng sa Ibeng yewed piyagpanaya, kataw in tolisan agrateng sa yabi.
[3] Sa kabetek in mga mangyan keyen, Apyaan wa, idapo wa batay mibaloy, na siro toloy wa batay piyaidapan wano maloba. Kataw in kagbaiyan bonting, bayo katawan piyagpaidapan wa, siro idbatay mipalpas.
[4] Kamay mga belag, kitam idwa sa lened, na asin pag ibeng kitam idbatay ariyaban kataw in mangyan riyatengan tolisan.
[5] Kitam boo sa ibeng agbangen, sa rawa. Kitam yewed sa yabi, yewed sa lened.
[6] Na ayaw kitam agesek kataw in mga roma, dayem kitam agipolaw, agpakabait.
[7] Angkataw sa yabi agbangen in mga mangyan agesek. Sa yabi din in mga agbarik aglasing.
[8] Kamay kitam agbangen sa ibeng, na kitam agpakabait. Kailangan kitam agpasandig sa Diyos, agpakayawte sa mga mangyan. Ina kagwali bengbeng sa kantam bilog. Kailangan kitam agpanaya sa kitam batay piyaboway. Ina kagwali bengbeng sa olo.
[9] Kitam iidang Diyos yewed matang kitam batay piyarosa, dayem matang kitam kansiyo piyaboway. In kantam Kapwan IsoKiristo in agpaboway.
[10] Siyo matay panawen sa kantam, matang kamayba kitam agkaboway kay in siyo agrateng, kamayba kitam matay wa, na kitam kansiyo batay piyaanggat agkaboway.
[11] Na kitam agpakaeyat ngani remrem sa osai osai, maytolongan, kataw daan in kanyo ngona piyagpangwat.
[12] Mga belag, in kanyam piyagsabi sa kanyo, kanyo pagmaalen in mga agpanawen sa kanyo, siro mga iidang Diyos agpapoon osai agpatoldo sa kanyo.
[13] Panawen sa kansiro panawen, siro kanyo ngani pagmaalen, pakayawteen. Kamo maybelagan.
[14] Osai mga belag, in kanyam mga bilin kanyo patoldowen in mga bibelen, pakaeyaten in mainaen in remrem, tolongen in mga idwa kabaloy, pakayawteen in boo.
[15] In mga piyagpangwatan daet kanyo patoldowen keyen ayaw agganti. Kami agpilit agpangwat in maal sa baatte osai kadayo sa boo mangyan.
[16] Baatte kamo agkaanggay.
[17] Ayaw aglimbang agpandalangin.
[18] Kamayba nakay in mibaloy na kamo agkaanggay sa Diyos angkataw in agkaanggay in beet Diyos sa kantam, sa mga agiyagem kay Kiristo Isos.
[19] Ayaw mandaeg sa Abyan Diyos.
[20] Ayaw agidapowen kabolowan in piyagsabi batang sa Diyos.
[21] Kanyo remremen in boo, alapeten in maal.
[22] Ayaw agpangwat kamayba nakay pag daet.
[23] In Diyos in agpakapya, na in kanyam pandalangin kamo kansiyo pangwaten maal wano gayed, osai kamo kansiyo alapeten, in kanyo abyan, kanyo remrem, kadayo kanyo bilog boo idapo daet anggan pataboy atai in kantam Kapwan IsoKiristo.
[24] In omidang sa kantam, siyo idbatay somala. Ina batay ngani kansiyo piyagpangwat.
[25] Mga belag, kami kanyo din dalanginen.
[26] Kamo in boo mga belag malkaanggayan agpanggisodan.
[27] Sa pangkit in Kapwan kamo kangay piyagpabilinan basaen anda pag solat sa boo mga belag.
[28] Kamo pakayawteen in kantam Kapwan IsoKiristo.