[1] Laki mga belag, kanyo abel sa kanyam in mga ogali maal kantam alapeten, in makaanggay sa Diyos. Kalbas ina wa ngani in kanyo piyagalapet mga ogali. Na ngona sa kabaloyan Isos in Kapwan, kami agbilin kay keyen baatte kanyo paistobowen in kataw ina pag mga ogali.
[2] Kanyo wa daan atawanan in mga bilin kanyam tiyaboy sa kanyo sa kabaloyan Isos in Kapwan.
[3] In beet Diyos kitam mga maal wano, idapo wano agpanggaraw.
[4] Kailangan in baatte osai katawan agsakop sa kansiyo remrem. Ina alapeten sa maalno, ayaw agalapeten sa marames.
[5] Ayaw kamayba nangkataw waget inbeet kansiyo bilog, kataw in ogali in mga yewed agpaniwala, idapo katawan sa Diyos.
[6] Na asin pag panawen ayaw agpangwat daet sa roma mangyan, ayaw agpandaeg, angkataw piyagparosa in Kapwan in mga agpamangwat kataw ina pag mga daet. Ina datiyan wa kanyam piyagsabi, maloba piyagbilin sa kanyo.
[7] Angkataw kaya kitam biyerya Diyos yewed matang agpangwat in marames pag ogali dayem matang agogali makaanggay sa Diyos.
[8] No kamayba nakay in aglaban asin pag piyagpatoldo na yewed in mangyan in piyaglabanan dayem in Diyos in agtaboy sa kantam in kansiyo Betek pag Abyan.
[9] Yewed wa kailangan kami agsolat sa kanyo panawen sa agpakayawte sa mga belag agpaniwala sa Kapwan, angkataw kamo piyatoldo wa daan in Diyos agpaybelagan.
[10] Kataw ngani ina in kanyo piyagpangwat sa boo mga belag sa boo kobat Masidonya. Kamay, mga belag, in kanyam ngani piyagsabi sa kanyo paistobowen kay ina pag agpakayawte.
[11] Kamo agpilit agpanawen sa kanyo daan panawen, pakaeyaten in bakwaw, matang kamo apo pamangnen, kataw taite in kanyam bilin sa kanyo.
[12] Matang kamo batay piyagmaal in mga yewed kay agpaniwala, osai kamo idbatay agpangayay sa mga roma kamayba nakayte.
[13] Laki mga belag, kanyam beet kanyo kay atawanan in panawen sa mga matay wa, matang kamo idbatay agrongkot kataw in amat mga mangyan idapo piyagpanaya.
[14] Kitam agpaniwala Isos matay kadogay boway wakay, na kitam maniwala din batay wakay din piyaboway Diyos in boo mga agpasandig kay Isos mga matay wa, matang piyaanggat sa kansiyo.
[15] In kanyam ngona piyagsabi sa kanyo piyatoldo daan in Kapwan. Kitam in mga agkaboway kay anggan agrateng in Kapwan, kitam idbatay tokaw sa mga matay wa.
[16] Ina pag betek batay apo lakoy mango agsogo, in agiplaong in poon mga angil, osai in agana in bodyong Diyos. Kalbas aglompot wa in Kapwan batang sa langit. In tokaw batay piyaboway in mga agpasandig kay Kiristo mga matay wa.
[17] Kalbas kitam in mga agkaboway kay kansiyo batay piyagtipon sa libo sarig in mga piyaboway wa, matang tomagbo sa Kapwan sa kiwang. No kataw ina kitam asina wa sa Kapwan anggan idapo kalobosan.
[18] Na ngani ina pag barita kantam alapeten agpakaeyat remrem sa baatte osai.