[1] -
[2] Paka kami idwa gayed katiis sa agkalowayan, kanyam remrem Timotiyo kanyam wa sogowen sa kanyo, kami pabaliwan wa sa Atinas. Timotiyo kantam belag, kanyam sarig sa panawen Diyos. Kaya siyo kanyam siyogo matang kamo piyakarigen sa agpasandig kay Kiristo, osai piyakaeyat in kanyo remrem,
[3] matang kamo idapo piyagbaslag in remrem panawen sa mga kaidapan. Kamo katawan wa din kitam piyagpadalan Diyos sa mga kataw ina.
[4] Angkataw tangona kay in kami asina sa kanyo, kanyam wa daan piyagsabi keyen kitam batay piyagpaidapan. Kalbas ngona kanyo atawanan ina wa ngani in mibaloy.
[5] Ina in dailan kaya Timotiyo kangay siyogo sa kanyo, angkataw ako idwa katiis. Ako beet wano katawan no kataw nakay in kamo agpasandig sa Kapwan. Ako agkariyaban karam kamo piyaakayan wa diyablo sa daet, kadogay maidapo wa kabolowan in kanyam piyanawen.
[6] Kamay ngona Timotiyo atai wakay rateng apo piyagbaba barita. Maalen wano kono in kamo agpaniwala, osai in kamo agpakayawte. Kansiyo din siyabi in kamo palagi agkaanggay sa kanyam, kamo maloba wano agkalowayan sa kanyam kaloba daan in kami agkalowayan sa kanyo.
[7] Na laki mga belag, kamaybawa kami abyatan sa mga kaidapan sa mga makariyaban, ngona apyaan wakay in kanyam remrem panawen sa kanyo agpaniwala.
[8] Kami abowayan wakay panawen kamo agaway kay marigen in agpasandig sa kantam Kapwan.
[9] In kami agkaanggay sa kanyo in kalakoyen anggan idapo wa batay asabi in kami agkaanggay sa Diyos.
[10] Boo ibeng kadayo yabi kami maloba agayay sa Diyos kitam maltagbowan wakay asin, matang kanyam wa gayed mataboy no nakay in idapo kay sa kanyo paniwala.
[11] Kanyam pandalangin sa Diyos kantam Amang osai sa kantam Kapwan Isos keyen, Kami pakanen wa ngani dalan agtaboy sa kanyo.
[12] Osai paistobowen wa ngani in Kapwan anggan paarabangen in kamo agpakayawte sa osai osai, anggan sa boo mangyan, kataw daan in kami agpakayawte sa kanyo.
[13] Osai kansiyo ngani pakaeyaten in kanyo remrem, matang paka agrateng wakay in kantam Kapwan Isos, agyanggat in boo kansiyo mga iidang, kamo idapo baribid, maal wano sa pangkit Diyos kantam Amang.