[1] Mewɔ anidasoɔ sɛ, sɛ meyɛ nkwaseadeɛ koraa a, mobɛgye me. Mepa mo kyɛw, monyɛ saa.
[2] Metwe mo ho ninkunu, sɛdeɛ Onyankopɔn twe mo ho ninkunu no. Mote sɛ ɔbaabunu a, mahyɛ ɔbarima baako pɛ bi a ɔno ne Kristo no bɔ sɛ mede mo bɛma no aware.
[3] Mesuro sɛ wɔbɛsɛe mo adwene na mo a mode mo ho nyinaa ama Kristo no, mobɛgyae sɛdeɛ ɔwɔ no nam anifere so daadaa Hawa no.
[4] Mode anigyeɛ gye obiara a ɔba mo nkyɛn bɛka Yesu foforɔ a ɔnyɛ deɛ yɛka ne ho asɛm kyerɛ mo no di; mogye honhom no ne asɛmpa a nsonoe da ɛno ne Honhom ne Asɛmpa a yɛka kyerɛ mo no ntam no di.
[5] Mennye nni sɛ meyɛ “Asomafoɔ” no mu abomfiaa.
[6] Ebia mʼano ntee deɛ, nanso mʼadwene mu abue. Ɛkwan biara so, yɛama mo ate saa asɛm yi ase.
[7] Mebɛkaa Onyankopɔn Asɛmpa no kyerɛɛ mo no, mannye mo hwee. Mebrɛɛ me ho ase sɛdeɛ ɛbɛma mo akorɔn. Bɔne a meyɛeɛ ne sɛ meyɛɛ saa?
[8] Berɛ a na mereyɔ mo mu adwuma no, asafo afoforɔ bi na na wɔtua me ka.
[9] Berɛ a na mewɔ mo nkyɛn no, sɛ sika ho hia me a, na menha mo. Na anuanom a wɔte Makedonia no de biribiara a ɛho hia me brɛ me. Sedeɛ na ɛte mmerɛ a atwam no, saa ara nso na daakye bɛyɛ. Merenyɛ adesoa mma mo da.
[10] Kristo nokorɛdie a ahyɛ me ma nti, mehyɛ mo bɔ sɛ obiara rentumi nka mʼahohoahoa yi nhyɛ wɔ Helaman mu da.
[11] Adɛn nti na meka saa? Ɛfiri sɛ, mennɔ mo anaa? Onyankopɔn nim sɛ medɔ mo.
[12] Mɛkɔ so madi dwuma a meredi no seesei yi sɛdeɛ ɛbɛyɔ a, saa “asomafoɔ” no rennya kwan nhoahoa wɔn ho sɛ dwuma a wɔdi no te sɛ yɛn dwuma a yɛdi no pɛ.
[13] Saa nnipa no nyɛ nokorɛ asomafoɔ. Wɔyɛ atorɔ asomafoɔ a wɔnam twa atorɔ wɔ wɔn adwuma ho ma nnipa hu wɔn sɛ wɔyɛ Kristo asomafoɔ.
[14] Ɛnyɛ me nwanwa, ɛfiri sɛ, ɔbonsam koraa tumi sesa ne ho ma ɔdane yɛ sɛ hann.
[15] Enti ɛnyɛ nwanwa sɛ nʼasomfoɔ tumi sesa wɔn ho de daadaa nnipa sɛ wɔyɛ papa. Awieeɛ no, wɔbɛnya wɔn nneyɔeɛ so akatua pɛpɛɛpɛ.
[16] Meti mu ka bio sɛ: Ɛnsɛ sɛ obiara susu sɛ meyɛ ɔkwasea. Sɛ mesusu saa a, ɛnneɛ monnye me sɛdeɛ mobɛgye ɔkwasea na menam so matumi mahoahoa me ho.
[17] Asɛm a mereka yi nyɛ deɛ Awurade pɛ sɛ meka. Meka ahohoahoa ho asɛm a, na mekasa sɛ ɔkwasea.
[18] Nanso, ɛsiane sɛ nnipa bebree hoahoa wɔn ho nipasu mu nti, me nso mɛyɛ saa.
[19] Mo ankasa mo ani ate nti mode anigyeɛ gye nkwaseafoɔ.
[20] Mogye obi a ɔhyɛ mo so anaa deɛ ɔnya mo ho biribi anaa deɛ ɔsum mo fidie anaa deɛ ɔmmu mo anaa deɛ ɔbɔ mo ani so.
[21] Mefɛre sɛ mɛgye yei ato mu, nanso yɛn ahoɔmmerɛ na ɛma yɛyɛɛ saa. Sɛ obi tumi de biribi hoahoa ne ho a, ɛnneɛ na mekasa sɛ ɔkwasea; me nso mɛtumi ahoahoa me ho wɔ dekodeɛ no ho bi.
[22] Wɔyɛ Hebrifoɔ anaa? Me nso meyɛ bi. Wɔyɛ Israelfoɔ anaa? Me nso meyɛ bi. Wɔyɛ Abraham asefoɔ anaa? Me nso meyɛ bi.
[23] Wɔyɛ Kristo asomfoɔ anaa? Mekasa sɛ ɔbɔdamfoɔ. Nanso, meyɛ ɔsomfoɔ pa sene wɔn. Mayɔ adwuma a ɛyɛ den sene wɔn; mada afiase mprɛ bebree; wɔabɔ me mmaa bebree na metaa mebɛn owuo nso.
[24] Yudafoɔ bɔɔ me mmaa aduasa nkron ahodoɔ num.
[25] Romafoɔ bɔɔ me mmaa mprɛnsa na wɔsii me aboɔ pɛnkorɔ. Metenaa ahyɛn mu maa ɛbɔeɛ mprɛnsa. Medii nsuo ase nnɔnhwere aduonunan pɛn.
[26] Mʼakwantuo ahodoɔ mu, mehyiaa nsuyire ne akwanmukafoɔ. Mehunuu amane wɔ Yudafoɔ ne Amanamanmufoɔ nsam. Mehunuu nkuro so amane. Mehunuu wuram amane. Mehunuu ɛpo so amane ne nnamfoɔ a wɔnka nokorɛ nsam amane.
[27] Mayɔ adwuma a ɛyɛ den na ɔbrɛ wɔ mu. Mprɛ pii menna. Ɔkɔm ne sukɔm dee me. Mprɛ pii mennya aduane a ɛbɛso me nni. Mennya baabi nna anaa atadeɛ nhyɛ.
[28] Berɛ biara na mema asafo ahodoɔ no ho nsɛm yɛ me asɛnhia.
[29] Sɛ obi yɛ mmerɛ a ɛma me nso meyɛ mmerɛ. Sɛ obi ka ɔfoforɔ kɔ bɔne mu a, ɛma me werɛ ho.
[30] Sɛ mehoahoa me ho a, na ɛsɛ sɛ mehoahoa me ho wɔ nnoɔma a ɛkyerɛ me mmerɛyɛ no mu.
[31] Awurade Yesu no, Onyankopɔn ne Agya no a ɛsɛ sɛ yɛkamfo no no nim sɛ merentwa nkontompo.
[32] Berɛ a mewɔ Damasko no, Amrado a na ɔhyɛ Ɔhene Areta ase no maa awɛmfoɔ wɛn kuro no pono pɛɛ sɛ wɔkye me.
[33] Nanso, wɔde me sii kɛntɛn mu twetwee me faa ɔfasuo bi a apae tokuro mu de me sii fam maa medwane firii ne nsam.