[1] Wa baʼad da, Allah chawwafaani Yachuuʼ kabiir rujaal al-diin waagif giddaam malak Allah. Wa Ibliis al-tahhaam waagif be nuss al-zeene hana Yachuuʼ le yathamah.
[2] Wa malak Allah gaal le Ibliis : «Khalli Allah yisakkitak, ya Ibliis ! Aywa, khalli Allah yisakkitak, hu al-azal Madiinat al-Khudus. Wa kan le l-raajil da, hu ma misil muchhaab al-chaalooh min al-naar walla ?»
[3] Wa Yachuuʼ waagif giddaam al-malak wa laabis khulgaan waskhaaniin.
[4] Wa l-malak amar wa gaal le l-waagfiin jambah : «Sillu minnah khulgaanah al-waskhaaniin.» Wa baʼad da, gaal le Yachuuʼ : «Chiif, ana najjeetak min zanbak. Khalli yilabbusuuk khulgaan hana iid.»
[5] Wa gaal battaan : «Khalli yukhuttu fi raasah kadmuul taahir.» Wa khalaas, labbasooh khulgaan wa khatto kadmuul taahir fi raasah. Wa malak Allah waagif fi l-bakaan da.
[6] Wa khalaas, malak Allah kallam le Yachuuʼ wa gaal :
[7] «Daahu Allah al-Gaadir gaal : ‹Kan tichiil derbi wa tahfad khidimti, inta bas tahkim fi beeti wa tiraakhib fi fadaayti kula. Wa ana nantiik bakaan ambeen al-aakhariin al-waagfiin hini.›»
[8] «Asmaʼ, ya Yachuuʼ kabiir rujaal al-diin wa kulla rujaal al-diin al-tihtak. Intu zaatku alaama hana l-cheyy al-yukuun. Daahu gariib ana nirassil abdi al-binaaduuh Bizre.
[9] Chiifu al-hajar al-khaali al-khatteetah giddaam Yachuuʼ. Wa fi l-hajar, fi sabʼa uyuun. Wa daahu ana zaati nanguch foogah nagich. Wa fi yoom waahid bas, nuguchch khata al-balad di. Wa da kalaam Allah al-Gaadir.
[10] Wa fi l-yoom da, ayyi waahid minku yaʼazim jaarah le yagood be l-salaama fi lubb jineentah hana l-inab wa l-tiin.» Wa da kalaam Allah al-Gaadir.