[1] Asʼalo Allah achaan yinazzil leeku matar al-richaach fi waktah. Allah bas yikawwin al-sahaab wa yinazzil matar katiir. Wa le ayyi insaan kula, hu yigawwim maʼaach fi zerʼah.
[2] Laakin kan tasʼalo al-asnaam, yuruddu be l-fasaala wa l-chawwaafiin yihajju be kidib. Hilimhum kula ma sahiih wa yisabburuuku be khachch. Wa fi chaan da, al-chaʼab aayriin // misil al-khanam wa tiʼibo be sabab ma induhum raaʼi.
[3] «Khadabi yanzil didd ruʼyaanhum wa niʼaakhib kubaaraathum // al-misil tuyuus. Aywa, ana Allah al-Gaadir nidaafiʼ le Bani Yahuuza // al-misil khanami. Wa ana nisawwiihum misil juwaad aziim fi l-harib.
[4] Wa min Bani Yahuuza, yamurgu khuyyaad wa humman chudaad misil hajar al-asaas wa saabtiin misil witid al-kheema wa gawiyiin misil nubbaal al-harib.
[5] Humman yihaarubu misil furraas al-yifajjukhu aduuhum // misil tiinat al-chawaariʼ. Humman yihaarubu achaan ana Allah maʼaahum wa hatta siyaad al-kheel kula, al-eeb yikhattiihum.
[6] «Ana nigawwi Bani Yahuuza wa ninajji zurriiyit Yuusuf. Wa nigabbilhum fi baladhum achaan hanneet fooghum misil awwal abadan ma abeethum. Achaan ana Allah Ilaahhum wa nakhbal salaathum.
[7] Naas gabiilat Afraayim yabgo misil furraas wa yinmalu be l-farah misil al-chirbo al-khamar. Wakit yichiifuuhum, iyaalhum yinbastu wa guluubhum yafraho fi chaan Allah.
[8] Wa ana nisaffir leehum le nilimmuhum achaan ana fadeethum. Humman yaldo wa yabgo katiiriin min awwal.
[9] Ana chattattuhum fi ust al-chuʼuub wa laakin fi l-bakaan al-baʼiid kula, yizzakkarooni. Humman yiʼiichu hinaak maʼa iyaalhum wa baʼadeen, yigabbulu fi arduhum.
[10] Ana nigabbilhum min balad Masir wa min balad Achuur, nilimmuhum. Wa nisabbithum fi balad Gilʼaad // wa Lubnaan lahaddi al-ard ma titimmuhum.
[11] Humman yagtaʼo bahar al-taʼab wa ana Allah nadrub al-mooj // fi ust al-bahar wa kulla almi al-Niil al-khariig yikammil. Istikbaar Achuur yiddammar wa asaat muluk Masir tilkassar.
[12] Nichaddid chaʼabi be gudurti ana Allah wa be usmi, yiʼiichu // wa yaʼabuduuni.» Wa da kalaam Allah.