[1] Wa battaan ana rafaʼt raasi wa chift ruʼya. Wa daahu chift sabi wa indah fi iidah habil al-yigaawusu beyah.
[2] Wa ana saʼaltah wa gult leyah : «Inta maachi ween ?» Wa hu gaal leyi : «Maachi nigaawis Madiinat al-Khudus le naʼarif urdaha wa tuulha kam.»
[3] Wa baʼad da, al-malak al-gaaʼid yihajji leyi gamma maachi wa malak aakhar ja laagaah.
[4] Wa l-malak al-awwal gaal le l-aakhar : «Ajri hajji le l-sabi da wa guul leyah : ‹Madiinat al-Khudus tagood maftuuha bala durdur achaan al-naas wa l-bahaayim bigo katiiriin fi usutha.›
[5] Wa daahu kalaam Allah : ‹Ana zaati nukuun leeha durdur hana naar muhawwigha. Wa fi usutha, nukuun majdaha.›»
[6] Daahu kalaam Allah : «Yalla ! Yalla ! Intu al-ana chattattuku // fi l-jiihaat al-arbaʼa, arrudu min balad al-munchaakh ! Wa da kalaam Allah.
[7] Yalla ! Ya Sahyuun ! Inti al-saakne fi Baabil al-misil bineeye, arridi min hinaak !»
[8] Majd Allah rassalaani ana Zakariiya didd al-umam al-nahabooku wa daahu Allah al-Gaadir gaal : «Ayyi naadum al-yilammisku da misil limis wald eeni.
[9] Aywa, daahu narfaʼ iidi didduhum hatta abiidhum kula yanhaboohum.» Wa be da, taʼarfu kadar Allah al-Gaadir, hu bas rassalaani.
[10] Daahu kalaam Allah : «Zakhriti wa afrahe, ya Sahyuun al-misil bineeye, achaan daahu ana jaayi naskun fi usutki.
[11] Wa fi l-yoom da, umam katiiriin yinkarbu foogi ana Allah. Wa yabgo chaʼabi halaali. Wa ana naskun fi usutku.» Wa be da, taʼarfu kadar Allah al-Gaadir, hu bas rassalaani leeku.
[12] Wa balad Yahuuza tabga hint Allah halaalah misil gismah fi l-ard al-mukhaddasa wa hu yaʼazil battaan Madiinat al-Khudus.
[13] Khalli kulla makhluug hayy yaskut giddaam Allah achaan hu marag min maskanah al-mukhaddas.