[1] Wa min fariighum fi Chittiim, Yachuuʼ wileed Nuun rassal jawaasiis itneen be sirr wa gaal leehum : «Amchu akkudu al-balad wa hillit Ariiha.» Wa humman macho. Wakit wassalo fi hillit Ariiha, dakhalo fi beet hana mara waahide charmuuta usumha Raahaab wa naamo fi l-bakaan da.
[2] Wa naas waahidiin macho khabbaro malik Ariiha wa gaalo leyah : «Daahu fi rujaal dakhalo hini albaareh wa humman min Bani Israaʼiil wa jo le yuruukhu kulla l-balad.»
[3] Wa l-malik rassal le Raahaab wa gaal leeha : «Amurgi al-rujaal al-jo wa dakhalo fi beetki, achaan humman jo le yuruukhu kulla l-balad.»
[4] Wa laakin al-mara chaalat al-rujaal al-itneen wa labbadathum. Wa khalaas, raddat le l-malik wa gaalat : «Sahiih, al-rujaal dool jo fi bakaani wa laakin ana ma naʼarif humman jo min ween.
[5] Wa l-rujaal dool marago min al-hille be l-leel wakit yisiddu baab al-hille wa ana ma naʼarif bakaan macho. Amchu waraahum ajala, akuun talhagoohum !»
[6] Wa taari, hi tallaʼathum fi raas beetha wa labbadathum tihit ganaadiil al-kattaan al-marsuus fi raas al-beet.
[7] Wa rujaal al-malik macho yifattuchuuhum be l-derib al-maachi ale bahar al-Urdun, gariib le l-maʼada. Wa baʼad marago yifattuchuuhum, saddo baab al-hille waraahum.
[8] Wa gabul al-rujaal al-itneen dool ma yunuumu, hi talaʼat leehum fi raas al-beet
[9] wa gaalat leehum : «Ana naʼarif kadar al-balad di Allah antaaha leeku. Wa aniina khufna khoof chadiid minku lahaddi kulla sukkaan al-balad gaaʼidiin yarjufu giddaamku.
[10] Simiʼna kadar Allah yabbas leeku al-bahar al-Ahmar wakit maragtu min balad Masir. Wa simiʼna kikkeef dammartu Siihuun wa Oog al-muluuk al-itneen hana l-Amuuriyiin al-gaʼado sabaah le bahar al-Urdun.
[11] Wa wakit simiʼna al-khabar da, khalaas galibna angataʼ wa ma indina gudra le nigaabuluuku. Achaan Allah Ilaahku, hu al-Ilaah al-gaaʼid foog fi l-sama wa tihit fi l-ard.
[12] Wa daahu ana sawweet leeku al-kheer. Wa be da, ahalfu leyi be Allah kadar intu kula tisawwu al-kheer le aayilti. Wassufuuni al-alaama al-tiʼakkid haliifitku
[13] kadar ma taktulu abuuyi wa la ammi wa la akhwaani wa la akhwaati wa la aayilaathum wa tinajjuuna min al-moot.»
[14] Wa l-rujaal al-itneen gaalo leeha : «Kan inti ma maragti achiirna da le l-naas, nahalfu leeki be ruuhna. Wa kan Allah antaana al-balad, nisawwu leeki al-kheer wa l-amaan.»
[15] Wa khalaas, hi dallathum be habil min al-chubbaak hana beetha achaan beetha mulassag maʼa l-durdur al-muhawwig al-hille.
[16] Wa gaalat leehum : «Amchu ale l-jibaal achaan al-naas al-macho waraaku ma yalgooku. Wa allabbado hinaak talaata yoom, lahaddi al-naas al-macho waraaku yigabbulu. Wa baʼad da, amurgu wa chiilu deribku.»
[17] Wa l-rujaal al-itneen gaalo leeha : «Aniina nitimmu al-haliife al-hallaftiina beeha.
[18] Wa wakit nahjumu baladki, arbuti al-jango al-ahmar da fi l-chubbaak al-maragtiina beyah. Wa limmi fi beetki abuuki wa ammiki wa akhwaanki wa kulla aayilitki.
[19] Wa kan naadum minhum marag min beetki, aniina bariyiin minnah wa hu yilhammal masʼuuliiyit mootah. Wa kan naadum min naaski al-maʼaaki katalooh fi beetki, aniina nilhammalo masʼuuliiyit mootah.
[20] Wa laakin kan maragti achiirna da, aniina nukuunu bariyiin min al-haliife al-hallaftiina beeha.»
[21] Wa hi gaalat : «Khalli yabga misil intu gultuuh.» Wa khalaas, khallathum macho wa rabatat al-jango al-ahmar fi l-chubbaak.
[22] Wa humman macho ale l-jibaal wa allabbado hinaak talaata yoom lahaddi al-naas al-macho waraahum gabbalo. Wa l-naas al-taradoohum fattachoohum fi tuul al-derib wa ma ligoohum. Wa gabbalo Ariiha.
[23] Wa khalaas, al-rujaal al-itneen dool addallo min al-jibaal wa gataʼo bahar al-Urdun. Wa baʼad da, jo le Yachuuʼ wileed Nuun wa kallamooh be kulla l-cheyy al-kaan leehum.
[24] Wa gaalo le Yachuuʼ : «Sahiih ke, Allah antaana kulla l-balad fi iideenna wa sukkaan al-balad gaaʼidiin yarjufu giddaamna.»