[1] Wa baʼad khatto kulla l-balad tihit hukumhum, kulla mujtamaʼ Bani Israaʼiil lammo fi Chiilooh wa bano kheemat al-ijtimaaʼ.
[2] Wa min Bani Israaʼiil, fi sabʼa gabaayil al-lissaaʼ ma ligo warasathum.
[3] Wa Yachuuʼ gaal le Bani Israaʼiil : «Le mata taabo ma tamchu tichiilu al-balad al-antaaha leeku Allah Rabb juduudku ?
[4] Aʼazulu talaata rujaal min ayyi gabiila wa ana nirassilhum yamchu yuruukhu al-balad. Wa yaktubu rasim huduud ard al-warasa al-muwaafge le ayyi gabiila wa yigabbulu leyi.
[5] Wa humman yigassumu al-balad al-faddalat ale sabʼa gisim. Wa gabiilat Yahuuza yagoodu fi turaabhum fi l-wati wa zurriiyit Yuusuf yagoodu fi turaabhum fi l-munchaakh.
[6] Amchu wa aktubu rasim huduud al-balad hasab al-sabʼa gisim wa jiibuuh leyi hini giddaami. Wa ana nisawwi amʼiyeedaat giddaam Allah Ilaahna achaan naʼarfu al-gisim le ayyi gabiila.
[7] Wa laakin ma fi gisim ambeenaatku le l-Laawiyiin achaan humman warasathum khidmit rujaal al-diin. Wa gabiilat Gaad wa gabiilat Raʼuubiin wa nuss gabiilat Manassa humman ligo gisimhum sabaah khaadi le bahar al-Urdun. Wa da l-gisim al-antaah leehum Muusa abd Allah.»
[8] Wa l-rujaal al-azaloohum jahhazo le l-machi. Wa gubbaal ma yamchu, Yachuuʼ gaal leehum : «Amchu ruukhu al-balad wa aktubu rasimha wa gabbulu leyi hini. Wa ana nisawwi amʼiyeedaat giddaam Allah hini fi Chiilooh achaan naʼarfu al-gisim le ayyi gabiila.»
[9] Wa l-rujaal dool macho chaggo al-balad wa katabo rasim al-hillaal hasab al-sabʼa gisim. Wa gabbalo le Yachuuʼ fi l-fariig fi Chiilooh.
[10] Wa Yachuuʼ sawwa leehum amʼiyeedaat giddaam Allah fi Chiilooh. Wa be da, Yachuuʼ gassam al-balad le Bani Israaʼiil hasab al-gisim al-wagaʼ le ayyi gabiila.
[11] Wa l-gisim al-awwal antooh le gabiilat Banyaamiin hasab khuchuum buyuuthum. Wa l-turaab al-ligooh gaaʼid ambeen turaab gabiilat Yahuuza wa turaab zurriiyit Yuusuf.
[12] Wa min jiihat al-munchaakh, huduudhum yamchu min bahar al-Urdun lahaddi l-dilleeye hana Ariiha fi l-munchaakh wa lahaddi balad al-jibaal al-fi l-kharib wa yagiifu fi saharat Beet Awan.
[13] Wa min al-bakaan da, al-huduud yamchu lahaddi Luuz wa yiʼaddi jamb al-dilleeye al-fi junuub Luuz yaʼni Beet Iil. Wa l-huduud yiddallo ale Ataruut Addaar wa yamchu ale l-jabal al-gaaʼid junuub min Beet Huruun al-tihit.
[14] Wa l-huduud yigabbulu ale l-kharib wa yamchu ale l-junuub min al-jabal al-mugaabil Beet Huruun. Wa yamchu le Kharyat Baʼal yaʼni Kharyat Yaʼariim al-hi hille hint gabiilat Yahuuza. Wa dool al-huduud min jiihat al-kharib.
[15] Wa min jiihat al-junuub huduudhum yabdo min Kharyat Yaʼariim wa yamchu ale l-kharib lahaddi Een Niftuuh.
[16] Wa l-huduud yamchu taraf al-jabal al-mugaabil waadi Bani Hinnuum al-gaaʼid munchaakh le waadi Rafaayiin. Wa l-huduud yamchu min waadi Bani Hinnuum be l-dilleeye al-junuubiiye hana jabal al-Yabuusiyiin wa yiddallo ale Een Ruugil.
[17] Wa l-huduud yigabbulu munchaakh lahaddi Een Chams wa lahaddi Galiiluut al-mugaabile al-gooz hana l-Aduumiim. Wa l-huduud yamchu ale l-hajar hana Buuhan wileed Raʼuubiin.
[18] Wa l-huduud yiʼaddu be l-dilleeye al-tidalli fi waadi al-Urdun wa yamchu ale l-junuub fi waadi al-Urdun.
[19] Wa l-huduud yiʼaddu ale munchaakh le l-dilleeye hana Beet Hugla wa yamchu lahaddi munchaakh le l-bahar al-Mayyit bakaan al-yusubb foogah bahar al-Urdun. Wa dool al-huduud min al-junuub.
[20] Wa l-huduud min sabaah hu bahar al-Urdun. Wa da bas ard warasa hana gabiilat Banyaamiin hasab khuchuum buyuuthum be huduudhum min kulli jiihe.
[21] Wa l-mudun hana gabiilat Banyaamiin hasab khuchuum buyuuthum humman Ariiha wa Beet Hugla wa Imakh Khasiis
[22] wa Beet Araba wa Samaraayim wa Beet Iil
[23] wa Awiim wa Faara wa Ufra
[24] wa Kafar Ammuuna wa Ufni wa Gabaʼ. Wa be l-jumla 12 mudun wa l-hillaal al-taabʼiin leehum.
[25] Wa battaan Gibʼuun wa l-Raama wa Biiruut
[26] wa Misfa wa Kafiira wa Mussa
[27] wa Raakhim wa Yirfiil wa Taraala
[28] wa Siilaʼ wa Alif wa madiinat al-Yabuusiyiin yaʼni Uruchaliim wa Gibeeʼa wa Kharyat Yaʼariim. Wa be l-jumla 14 mudun wa hillaalhum al-taabʼiin leehum. Wa da kulla ard warasa hint gabiilat Banyaamiin hasab khuchuum buyuuthum.