[1] Wa akuun fi l-ard al-Allah Ilaahku yantiiha leeku warasa, talgo janaaza waagʼe fi l-kadaade wa ma taʼarfu yaatu al-katalha.
[2] Wa kan ke da, khalli chuyuukhku wa gudiyaaku yamurgu wa yigaawusu al-masaafa been al-janaaza wa l-mudun al-muhawwigiinha.
[3] Wa wakit yaʼarfu al-madiina al-gariibe le l-janaaza, chuyuukh al-madiina di yichiilu ijle al-abadan ma khadamo beeha wa la karro beeha harraata.
[4] Wa chuyuukh al-madiina di yidallu al-ijle fi waadi al-almiih jaari daayman wa l-waadi da ma muteerab wa la mahruut. Wa yaksuru ragabat al-ijle di fi lubb almi al-waadi da.
[5] Wa khalaas, rujaal al-diin iyaal Laawi yigarrubu achaan humman bas Allah Ilaahku azalaahum le yakhdumu leyah wa yibaaruku be usmah. Wa humman bas al-yihillu ayyi muchkila hana huraaj wa ayyi muchkila hana darabaan.
[6] Wa kulla chuyuukh al-madiina al-gariibe le l-janaaza yikhassulu iideehum fi l-ijle al-kasaro ragabatha fi almi al-waadi da.
[7] Wa humman yuguulu : «Iideenna ma daffago al-damm da wa uyuunna kula ma chaafooh wakit daffag.
[8] Ya Allah, akhfir le chaʼabak Bani Israaʼiil al-inta fadeethum wa ma tasʼal chaʼabak Bani Israaʼiil min damm al-bari al-daffag fi usuthum.» Wa khalaas, da yabga leehum kaffaara min al-dimme di.
[9] Wa be misil da, tamurgu min usutku damm al-bari be sawwiyiin al-adiil giddaam Allah.
[10] Wa akuun tamchu le l-harib didd udwaanku wa Allah Ilaahku yisallimhum leeku fi iideeku wa takurbuuhum masaajiin.
[11] Wa kan raajil minku yichiif min al-masaajiin dool mara jamiile wa azalha le tabga leyah mara,
[12] khalaas al-raajil da yiwaddiiha fi lubb beetah. Wa hi tizayyin raasha wa tigattiʼ khanaafirha
[13] wa tikhayyir khulgaanha al-awwal karabooha beehum masjuuna. Wa taskun maʼaayah fi beetah. Wa hi tahzan le abuuha wa ammaha le muddit chahar. Wa baʼad da, yaji leeha wa yaakhudha wa hi tabga martah.
[14] Wa laakin kan baʼad mudda al-mara di ma ajabat al-raajil, waajib yikhalliiha tamchi fi ayyi bakaan al-hi tidoorah. Wa hu ma yagdar yibiiʼha be fudda wa la yujuurha achaan hu ragad maʼaaha wa abaaha.
[15] Wa akuun naadum indah awiin itneen wa yihibb al-waahide ziyaada min al-aakhara wa ayyi waahide indaha wileed. Wa kan wileedah al-bikir hu min al-mara al-ma yiriidha ziyaada,
[16] wakit yigassim warasatah le iyaalah, hu ma yanti hagg al-bukuuriiye le wileed al-mara al-yihibbaha ziyaada wa yikhalli wileedah al-bikir wileed al-mara al-hu ma yiriidha.
[17] Wa laakin waajib yaʼarif kadar al-bikir hu wileed al-mara al-hu ma yiriidha wa waajib yantiih min kulla cheyy al-indah haggah marrateen. Achaan al-wileed da hana awwal chabaabah wa hagg al-bukuuriiye kula waajib leyah hu.
[18] Wa kan naadum indah wileed haraami wa aasi wa la yasmaʼ kalaam abuuh wa la ammah wa wakit yiʼaddubuuh hu ma yitiiʼhum,
[19] khalaas ammah wa abuuh yakurbuuh wa yiwadduuh le l-chuyuukh fi khachum baab al-madiina al-hu saakin foogha.
[20] Wa yuguulu le chuyuukh al-madiina : «Daahu wileedna haraami wa aasi wa abadan ma yitiiʼna wa hu mukhaalif wa sakkaari.»
[21] Wa kulla rujaal madiintah yarjumuuh be hujaar wa yumuut. Wa be da, tamurgu al-charr min usutku wa kulla Bani Israaʼiil yasmaʼo beyah wa yakhaafo.
[22] Wa kan hakamtu le naadum waahid be l-moot be sabab zanbah wa kataltuuh wa allagtuuh fi chadara,
[23] khalaas ma tikhallu janaaztah muʼallaga fi l-chadara tuul al-leel. Wa laakin adfunuuha fi nafs al-yoom achaan al-janaaza al-muʼallaga fi l-chadara tijiib laʼanat Allah fi l-balad. Wa ma waajib tinajjusu baladku al-Allah Ilaahku yantiiha leeku warasa.