[1] Wa Dawuud gaddam khine al-chukur le Allah wakit hu najjaah min iid kulla udwaanah wa min iid Chaawuul.
[2] Wa hu gaal : «Allah hu maljaʼi yahmiini wa yinajjiini.
[3] Ilaahi hu maljaʼi wa l-bakaan al-nillabbad foogah. Hu daragati wa l-gudra al-tinajjiini. Hu maskani al-gawi wa maljaʼi wa min siyaad al-unuf, yinajjiini.
[4] Ana sarakht wa gult : ‹Al-hamdulillah ! Allah najjaani min udwaani.›
[5] «Achaan mooj al-moot khattaani wa seel al-halaak bahatni.
[6] Guyuud al-haawiye hawwagooni wa churukka al-moot gaaʼidiin giddaami.
[7] Fi l-diige, naadeet Allah aywa, naadeet Ilaahi wa min beetah al-mukhaddas hu simiʼni, hu simiʼ hiss siraakhi.
[8] «Al-ard anhazzat wa rajafat wa asaas al-sama anhazza wa barjal achaan ma himlo khadab Allah al-chadiid.
[9] Wa min manaakhirah yatlaʼ dukhkhaan wa min khachmah tamrug naar al-taakul al-indaha jamur al-yahrig.
[10] «Allah falla al-samaawaat wa dalla maʼa sahaabaay dalma // tihit rijileenah.
[11] Hu rikib fi makhluug samaawi wa taar wa be janaahe al-riih, haam.
[12] Wa allabbad fi dalaam al-muhawwig misil kheemtah wa da katarat almi wa l-sahaab al-azrag al-chaayil.
[13] Giddaamah nuur chadiid al-yamrug minnah jamur al-yahrig.
[14] Wa Allah dagdag min al-sama. Hu al-Aali, wa hissah ansamaʼ.
[15] Hu zarrag nachaachiib le udwaani wa chattataahum be barraaga al-chadiide wa hazamaahum.
[16] Wa min chiddit zaʼal Allah wa min hamu riih al-jaayi minnah, gaʼar al-bahar baan wa asaas al-dunya ankachaf.
[17] «Wa min foog, madda iidah rafaʼni wa min al-almi al-katiir, maragaani.
[18] Wa najjaani min udwaani al-chudaad wa min khusmaani al-gawiyiin minni.
[19] Wa yoom al-masiibe wagaʼat foogi, humman hajamooni laakin Allah fazaʼni.
[20] Wa hu maragaani min al-khutuura // wa harraraani, hu najjaani achaan yiriidni.
[21] Wa Allah yiʼaamilni hasab adaalti wa yikaafiini hasab salaamat iideeni.
[22] Achaan ana taabaʼt derib Allah wa ma isiit Ilaahi.
[23] Aywa, ana tabbagt kulla churuutah wa abadan ma tarraft // min gawaaniinah.
[24] Wa bigiit naadum tamaam giddaamah wa hafadt nafsi min al-khata.
[25] Wa khalaas, Allah antaani ajur hasab adaalti wa hasab salaamti // al-hu chaafha giddaamah.
[26] «Ya Allah ! Inta saadikh maʼa l-saadikhiin wa ma tuluum al-naas al-tamaamiin.
[27] Maʼa l-taahiriin, tukuun taahir wa maʼa l-uwuj, tukuun aʼwaj.
[28] Wa tinajji al-mazluumiin wa tidalli raas al-mustakbiriin.
[29] Ya Allah ! Inta bas faanuusi wa Allah al-yidawwi leyi fi l-dalaam.
[30] Ya Ilaahi ! Beek inta, nahjim duyuuch wa beek inta, nunutt daraadir al-hille.
[31] «Al-Rabb, derbah adiil, kalaam Allah daayman kaamil. Hu daraga le l-naadum al-yaljaʼ leyah.
[32] Achaan la ilaah illa Allah wa la maljaʼ illa Ilaahna.
[33] Ilaahi hu maljaʼi al-gawi wa yuguudni fi l-derib al-adiil.
[34] Wa antaani rijle khafiifiin najri misil al-khazaal wa rafaʼni fi l-bakaan al-aali.
[35] Hu bas allamaani kikkeef nihaarib wa kikkeef iideeni yajbudu // nubbaal al-nahaas.
[36] «Ya Allah ! Anteetni daragat najaatak wa be musaaʼadatak, gawweetni.
[37] Wa sahhalt leyi derbi wa sabbat rijileeni.
[38] Nitaarid udwaani wa nidammirhum wa ma nigabbil lahaddi nikammilhum.
[39] Nikammilhum wa nidammirhum wa yagaʼo fi l-ard wa nifajjikhhum.
[40] Wa gudra le l-harib, inta anteetni wa dangart udwaani giddaami.
[41] Wa fi iideeni, sallamtuhum wa le khusmaani, // ana dammartuhum.
[42] Yiʼiitu le l-fazaʼ wa ma fi munajji, yasʼalo Allah wa ma yurudd leehum.
[43] Ana rihiktuhum misil ajaaj al-ard, misil tiinat al-chawaariʼ daggeethum wa fajjakhtuhum.
[44] «Wa inta najjeetni min muʼaaradat chaʼabi wa sabbattini kabiir fi umam wa chaʼab al-ma naʼarifhum yakhdumu leyi.
[45] Al-ajaanib yimaskunu nufuushum leyi wa yukhuttu udneehum // le yasmaʼooni.
[46] Al-ajaanib kislo wa marago min maljaʼhum // be rajifiin.
[47] «Al-Hayy hu Allah wa baarak Allah maljaʼi ! Al-Aali hu Ilaah maljaʼi al-yinajjiini.
[48] Ilaahi hu al-yichiil leyi al-taar wa yisallim leyi al-chuʼuub // tihit sultiti.
[49] Wa yamrugni min iid udwaani wa yansurni fooghum wa yinajjiini min al-naas al-yisawwu al-unuf.
[50] Wa be sabab da, ya Allah, fi ust al-umam, nachkurak wa be khine, namdah usmak.
[51] Allah anta al-nasur le l-malik al-hu darrajah. Aywa, wassaf kheerah le l-naadum al-hu masahah, le Dawuud wa zurriiytah ila l-abad.»