[1] Wa fi wakit hukum Dawuud, bigi juuʼ wa l-juuʼ da gaʼad talaata sana mutataabiʼiin. Wa Dawuud saʼal Allah wa Allah radda leyah wa gaal : «Al-juuʼ da ja be sabab al-dimam al-Chaawuul wa aayiltah kataloohum. Humman katalo min sukkaan Gibʼuun.»
[2] Wa l-malik naadaahum le sukkaan Gibʼuun wa hajja leehum. Wa l-Gibʼuuniyiin, humman ma min Bani Israaʼiil laakin min al-Amuuriyiin al-faddalo fi l-balad. Wa zamaan, Bani Israaʼiil halafo le l-Gibʼuuniyiin wa gaalo ma yaktuluuhum. Wa laakin min chiddit hamiistah le Bani Israaʼiil wa Bani Yahuuza, Chaawuul dawwar yidammirhum.
[3] Wa Dawuud gaal le l-Gibʼuuniyiin : «Nisawwi leeku chunu ? Wa be chunu niraddiiku min al-fasaala al-sawwooha leeku achaan tibaaruku chaʼab Allah al-misil warasatah ?»
[4] Wa l-Gibʼuuniyiin gaalo le l-malik : «Muchkilitna maʼa Chaawuul wa aayiltah ma tinhalla wa la be gurus wa la be dahab wa la be katil naadum fi Bani Israaʼiil.» Wa l-malik gaal leehum : «Ayyi cheyy al-tidooruuh, ana nisawwi leeku.»
[5] Wa humman gaalo le l-malik : «Chaawuul dawwar yidammirna wa yiwaddirna marra waahid min balad Israaʼiil.
[6] Wa be da, khalli yisallumu leena sabʼa rujaal min iyaalah wa aniina nachunguuhum giddaam Allah fi Gibeeʼa hillit Chaawuul hu al-Allah azalah.» Wa l-malik gaal leehum : «Nisallimhum leeku.»
[7] Wa laakin al-malik hanna fi Mafiibuchat wileed Yuunataan wileed Chaawuul achaan al-haliife al-sawwaaha Dawuud wa Yuunataan giddaam Allah.
[8] Wa khalaas, al-malik chaal Armuuni wa Mafiibuchat iyaal Risfa al-wildathum le Chaawuul. Wa Risfa di hi bineeyit Ayya. Wa chaal battaan al-iyaal al-khamsa hana Miirab bineeyit Chaawuul al-wildathum le Adriyiil wileed Barzillaay al-min hillit Mahuula.
[9] Wa l-malik sallamaahum le l-Gibʼuuniyiin. Wa khalaas, al-Gibʼuuniyiin chanagoohum fi raas al-hajar giddaam Allah. Wa humman al-sabʼa dool, kulluhum maato sawa. Wa moothum da bigi fi bidaayit al-gatiʼ hana l-gameh al-abyad.
[10] Wa Risfa bineeyit Ayya chaalat chuwaal wa farachatah fi raas al-hajar wa gaʼadat hinaak min bidaayit gatiʼ al-gameh al-abyad lahaddi almi al-khariif sabba fi l-janaazaat dool. Wa be nahaar, hi tadhar al-suguura ma yanzulu fooghum wa be leel, tadhar minhum haywaanaat al-kadaade.
[11] Wa khabbarooh le Dawuud be l-cheyy al-sawwatah Risfa bineeyit Ayya sirriiyit Chaawuul.
[12] Wa Dawuud gamma macha chaal udaam Chaawuul wa Yuunataan wileedah min sukkaan hillit Yaabiich fi turaab Gilʼaad. Achaan wakit al-Filistiyiin hajamo Chaawuul wa askarah fi jabal Gilbuuʼa, humman kataloohum wa allago janaazaathum fi nagaʼat hillit Beet Chaan. Wa sukkaan Yaabiich chaaloohum.
[13] Wa Dawuud wadda maʼaayah udaam Chaawuul wa Yuunataan. Wa naasah kula khammo udaam al-rujaal al-sabʼa al-chanagoohum.
[14] Wa dafano udaam Chaawuul wa Yuunataan wa l-rujaal al-sabʼa dool fi balad Banyaamiin fi hillit Siilaʼ fi khabur Khiich abu Chaawuul. Wa l-naas sawwo kulla cheyy al-malik amaraahum beyah. Wa baʼad da, al-Rabb raham al-balad di.
[15] Wa kaan harib ambeen al-Filistiyiin wa Bani Israaʼiil. Wa Dawuud wa naasah macho haaraboohum le l-Filistiyiin wa Dawuud bigi ayyaan.
[16] Wa Yichbi Binuub waahid min zurriiyit Raafa chaal niiye achaan yaktul al-malik Dawuud. Wa haribtah hint nahaas tawzin talaata kiilo wa raabit fi sulbah seef jadiid.
[17] Wa laakin Abichaay wileedha le Saruuya ja fazaʼ le Dawuud wa darab al-Filisti wa katalah. Wa fi l-bakaan da, askar Dawuud halafo wa gaalo leyah : «Battaan inta ma tamrug maʼaana fi l-harib. Achaan inta nuur Bani Israaʼiil ma tumuut.»
[18] Wa baʼad da, gamma battaan harib maʼa l-Filistiyiin fi Guub. Wa fi l-bakaan da, Sibbakaay min hillit Huucha katal Saaf min zurriiyit Raafa.
[19] Wa battaan al-harib bada maʼa l-Filistiyiin fi Guub. Wa Alihanaan wileed Yaʼri min Beet Laham katal Jaaluut min hillit Gaat. Wa Jaaluut da, uud haribtah takhiin misil murdaas al-ligdaabe.
[20] Wa battaan kula al-harib bada fi hillit Gaat. Wa fiyah raajil waahid tawiil wa asaabiʼ rijileenah wa iideenah sitte sitte wa kulluhum ke adadhum 24. Wa hu kula min zurriiyit Raafa.
[21] Wa l-raajil da ayyar Bani Israaʼiil. Wa khalaas, Yuunataan wileed Chimʼa akhu Dawuud katalah.
[22] Wa kulla l-rujaal al-arbaʼa dool, humman min zurriiyit Raafa min hillit Gaat. Wa humman maato be iid Dawuud wa naasah.