[1] Wa Dawuud haarab al-Amaalikh wa annasar fooghum wa gabbal gaʼad fi hillit Sikhlaag yoomeen. Wa da baʼad Chaawuul maat khalaas.
[2] Wa fi l-yoom al-taalit, ja sabi waahid min muʼaskar Chaawuul, khulgaanah mucharratiin wa indah turaab fi raasah le yiwassif hiznah. Wa wakit garrab le Dawuud, wagaʼ fi l-ard wa sajad giddaamah.
[3] Wa Dawuud saʼalah wa gaal : «Inta jaayi min ween ?» Hu radda leyah wa gaal : «Ana min muʼaskar Bani Israaʼiil wa arradt min al-harib.»
[4] Wa Dawuud gaal leyah : «Chunu al-kaan hinaak ? Min fadlak, hajjiini beyah.» Wa l-sabi radda leyah wa gaal : «Askar Bani Israaʼiil arrado min al-harib wa katiiriin minhum maato. Wa Chaawuul wa wileedah Yuunataan kula maato.»
[5] Wa Dawuud gaal le l-sabi al-jaab leyah al-khabar da : «Kikkeef inta irift kadar Chaawuul wa wileedah Yuunataan maato ?»
[6] Wa l-sabi gaal : «Wakit ana gaaʼid fi raas jabal Gilbuuʼa, chift Chaawuul gaaʼid yirrakkaz fi haribtah wa l-adu haasarah be kheel wa be arabaat al-harib.
[7] Wa wakit Chaawuul anlafat, chaafaani wa naadaani wa ana gult : ‹Naʼam, ya siidi.›
[8] Wa hu saʼalaani gaal : ‹Inta yaatu ?› Wa ana gult : ‹Ana Amaalikhi.›
[9] Wa hu gaal leyi : ‹Taʼaal gariib leyi wa aktulni kan ruuhi ma maragat kula achaan ana gariib numuut.›
[10] Wa khalaas, ana garrabt leyah wa kataltah achaan irift kadar min wagaʼ da, hu ma yiʼiich. Wa be da, daahu chilt al-taaj al-fi raasah wa dimlij al-muluk al-fi iidah wa jibtuhum leek, inta siidi.»
[11] Wa tawwaali, min al-hizin Dawuud gamma charrat khalagah wa l-naas al-maʼaayah kula charrato khulgaanhum.
[12] Wa humman bako wa naaho wa saamo lahaddi l-achiiye fi chaan Chaawuul wa wileedah Yuunataan wa chaʼab Allah wa kulla Bani Israaʼiil al-maato fi l-harib.
[13] Wa Dawuud gaal le l-sabi al-jaab leyah al-khabar : «Inta min ween ?» Wa hu radda wa gaal : «Ana wileed ajnabi waahid Amaalikhi.»
[14] Wa Dawuud gaal leyah : «Kikkeef inta ma khuft wa rafaʼt iidak wa katalt al-raajil al-Allah masahah wa darrajah malik ?»
[15] Wa khalaas, Dawuud naada waahid min askarah wa gaal leyah : «Aktulah !» Wa l-askari darab al-Amaalikhi wa katalah.
[16] Wa wakit ruuhah gaaʼide tamrug, Dawuud gaal leyah : «Khalli dimmitak tagaʼ fi raasak achaan inta gult be khachmak kadar inta bas katalt al-raajil al-Allah masahah wa darrajah malik.»
[17] Wa khalaas, Dawuud khanna khine hana hizin le Chaawuul wa wileedah Yuunataan.
[18] Wa amar yiʼallumuuh le Bani Yahuuza. Wa l-khine da sammooh Khine al-Nubbaal. Wa hu maktuub fi Kitaab al-Saalih.
[19] Ya Bani Israaʼiil, majduku dabahooh fi raas al-hajar. Maala al-furraas dabahoohum ?
[20] Ma tikhabburu naas hillit Gaat wa ma tiballukhuuh fi chawaariʼ hillit Achgaluun achaan banaat al-Filistiyiin ma yafrahan wa la banaat al-ma mutahhariin yifaachiran.
[21] Ya jabal Gilbuuʼa, ma yanzil foogak matar wa la yibillak karany wa ziraaʼtak abadan ma tugumm. Achaan hinaak wassakho daragat al-furraas wa daragat Chaawuul, be dihin ma yamsahooha battaan
[22] illa be damm al-dabahoohum wa be chaham furraashum. Nuchchaab Yuunataan ma khiti abadan wa seef Chaawuul abadan ma raham.
[23] Chaawuul wa Yuunataan maryuudiin wa mahbuubiin // fi hayaathum wa humman ma anfarago // fi moothum. Humman ajiiliin min al-suguura wa chudaad min al-diidaan.
[24] Ya banaat Bani Israaʼiil, abkan le Chaawuul achaan hu labbasaakan khulgaan samhiin wa khaaliyiin wa mujammaliin be dahab.
[25] Maala al-furraas dabahoohum // fi l-harib ? Wa maala Yuunataan dabahooh // fi raas al-hajar ?
[26] Ana haznaan leek, ya akhuuyi Yuunataan ! Ridtak min kulla galbi wa rafagak ajabni ziyaada // min hubb al-awiin.
[27] Maala al-furraas dabahoohum ? Wa maala silaahhum daffag ?