[1] وَ سُلَيْمَانْ بَدَا بُنَى بَيْت اللّٰهْ فِي أُورُشَلِيمْ فِي رَاسْ حَجَرْ مُرِيَّا. وَ دَا الْبَكَانْ الْاللّٰهْ بَانْ فَوْقَهْ لِدَاوُدْ أَبُوهْ وَ دَا الْبَكَانْ الدَّاوُدْ جَهَّزَهْ فِي مَدَقّ هَنَا أُرْنَانْ الْيَبُوسِي.
[2] وَ سُلَيْمَانْ بَدَا الْبُنَى فِي الشَّهَرْ التَّانِي فِي السَّنَةْ الرَّابْعَةْ هَنَا حُكْمَهْ.
[3] وَ سُلَيْمَانْ أَسَّسْ بُنَى بَيْت اللّٰهْ بِأَسَاسْ طُولَهْ 60 دُرَاعْ وَ عُرْضَهْ 20 دُرَاعْ حَسَبْ الْمَقَاسْ الْقَدِيمْ.
[4] وَ غُرْفَةْ الْمَدَخَلْ عُرْضَهَا 20 دُرَاعْ وَ طُولْهَا فَوْق 20 دُرَاعْ. وَ مَسَحَوْهَا مِنْ دَاخَلْ كُلَّهَا كَيْ بِدَهَبْ صَافِي.
[5] وَ الْغُرْفَةْ الْكَبِيرَةْ دِي سَدَّوْهَا بِخَشَبْ السَّرْوِي الْمَمْسُوحْ بِدَهَبْ صَافِي وَ نَقَشَوْا فَوْقَهْ صُوَرْ هَنَا سَلَاسِلْ وَ شَدَرْ نَخَلْ.
[6] وَ بَتَّانْ جَمَّلَوْا الْغُرْفَةْ دِي بِحُجَارْ غَالِيِّينْ وَ بِدَهَبْ الْجَابَوْه مِنْ بَلَدْ فَرْوَايِمْ.
[7] وَ كُلَّ الْغُرْفَةْ دِي، مَسَحَوْهَا بِدَهَبْ وَ دَا الْمَرَادِيسْ وَ الْمَدَخَلْ وَ الدَّرَادِرْ وَ بِيبَانْ الْبَيْت. وَ نَقَشَوْا صُوَرْ هَنَا مَخْلُوقِينْ سَمَاوِيِّينْ فِي الدَّرَادِرْ.
[8] وَ فِي لُبّ الْبَيْت دَا، بَنَوْا الْبَكَانْ الْمُقَدَّسْ مَرَّةْ وَاحِدْ طُولَهْ 20 دُرَاعْ وَ عُرْضَهْ كُلَ 20 دُرَاعْ. وَ مَسَحَوْه بِدَهَبْ صَافِي الْوَزْنَهْ يِسَاوِي 20 000 كِيلَوْ.
[9] وَ الْوَزِنْ هَنَا الْمَسَامِيرْ يِسَاوِي 72 جِنَيْه هَنَا دَهَبْ. وَ الْخَشَبْ هَنَا الْبَيْت بِفَوْق كُلَ مَسَحَوْه بِدَهَبْ.
[10] وَ فِي لُبّ الْبَكَانْ الْمُقَدَّسْ مَرَّةْ وَاحِدْ، بِحَطَبْ صَنَعَوْا تَمَاثِيلْ هَنَا مَخْلُوقِينْ سَمَاوِيِّينْ إِتْنَيْن وَ مَسَحَوْهُمْ بِدَهَبْ.
[11] وَ الْجَنَاحَيْ هَنَا الْمَخْلُوقِينْ السَّمَاوِيِّينْ دَوْل طُولْهُمْ 20 دُرَاعْ. جِنْح وَاحِدْ هَنَا الْمَخْلُوقْ الْأَوَّلَانِي، طُولَهْ 5 دُرَاعْ وَ يِلِمّ فِي الدُّرْدُرْ هَنَا الْبَيْت. وَ جِنْحَهْ الْآخَرْ كُلَ طُولَهْ 5 دُرَاعْ وَ يِلِمّ مَعَ الْجِنْح هَنَا الْمَخْلُوقْ التَّانِي.
[12] وَ الْجِنْح هَنَا الْمَخْلُوقْ التَّانِي كُلَ طُولَهْ 5 دُرَاعْ وَ يِلِمّ فِي الدُّرْدُرْ هَنَا الْبَيْت. وَ جِنْحَهْ الْآخَرْ كُلَ طُولَهْ 5 دُرَاعْ وَ يِلِمّ مَعَ الْجِنْح هَنَا الْمَخْلُوقْ الْأَوَّلَانِي.
[13] وَ الْمَخْلُوقِينْ السَّمَاوِيِّينْ الْإِتْنَيْن دَوْل وَاقْفِينْ بِطُولْهُمْ وَ وِجِهُّمْ مُقَابِلْ الْبَيْت وَ مُمَطِّطِينْ جَنَاحَيْهُمْ الطُّولْهُمْ 20 دُرَاعْ.
[14] وَ سَوَّوْا سِتَارْ مِنْ قُمَاشْ لَوْنَهْ ظَهْرِي وَ قَرَضِي وَ أَحْمَرْ وَ كَتَّانْ. وَ خَيَّطَوْا فَوْقَهْ صُوَرْ هَنَا الْمَخْلُوقِينْ السَّمَاوِيِّينْ.
[15] وَ صَنَعَوْا عَمَدْ إِتْنَيْن هَنَا نَحَاسْ قِدَّامْ بَيْت اللّٰهْ وَ طُولْ هَنَا أَيِّ عَمُودْ 35 دُرَاعْ. وَ صَنَعَوْا لَيْهُمْ رُوسَيْ هَنَا نَحَاسْ وَ خَطَّوْهُمْ فَوْق فِي الْعَمَدْ دَوْل وَ أَيِّ وَاحِدْ مِنْ الرُّوسَيْ دَوْل طُولَهْ 5 دُرَاعْ.
[16] وَ جَمَّلَوْا الْعَمَدْ دَوْل بِسَلَاسِلْ مِثِلْ الْفِي الْبَكَانْ الْمُقَدَّسْ وَ عَلَّقَوْهُمْ فَوْق فِي رُوسَيْ الْعَمَدْ. وَ بَتَّانْ صَنَعَوْا 100 رُمَّانْ مِنْ نَحَاسْ وَ رَصَّوْهُمْ فِي السَّلَاسِلْ.
[17] وَ خَطَّوْا الْعَمَدْ دَوْل قِدَّامْ بَيْت اللّٰهْ. الْعَمُودْ الْوَاحِدْ، خَطَّاهْ بِالزَّيْنَةْ وَ سَمَّاهْ يَاكِينْ (مَعَنَاتَهْ اللّٰهْ يِثَبِّتْ). وَ الْعَمُودْ التَّانِي، خَطَّاهْ بِالْإِسْرَةْ وَ سَمَّاهْ بُعَازْ (مَعَنَاتَهْ الْقُدْرَةْ مِنْ اللّٰهْ).