[1] وَ يَهُوشَفَطْ مَاتْ وَ لِحِقْ أَبَّهَاتَهْ وَ دَفَنَوْه فِي قَبُرْ جُدُودَهْ فِي مَدِينَةْ دَاوُدْ. وَ وِلَيْدَهْ يَهُورَامْ حَكَمْ فِي بَدَلَهْ.
[2] وَ يَهُورَامْ عِنْدَهْ أَخْوَانْ كَتِيرِينْ وَ هُمَّنْ عَزَرْيَا وَ يَحِيِيلْ وَ زَكَرِيَّا وَ عَزَرْيَاهُو وَ مِكَايِيلْ وَ شَفَطْيَا دَوْل كُلُّهُمْ كَيْ عِيَالْ مَلِكْ يَهُوشَفَطْ.
[3] وَ أَبُوهُمْ يَهُوشَفَطْ أَنْطَاهُمْ هَدَايَا كَتِيرِينْ مِثِلْ فُضَّةْ وَ دَهَبْ وَ خُمَامْ غَالِي. وَ أَنْطَاهُمْ مَسْؤُولِيَّةْ فِي الْمُدُنْ الْقَوِيِّينْ هَنَا بَلَدْ يَهُوذَا. وَ لَاكِنْ هُو أَنْطَى الْمُلُكْ لِوِلَيْدَهْ يَهُورَامْ أَشَانْ هُو بَسْ الْبِكِرْ.
[4] وَ وَكِتْ يَهُورَامْ شَالْ مُلُكْ أَبُوهْ، هُو بِقِي شَدِيدْ وَ كَتَلْ كُلَّ أَخْوَانَهْ وَ وَاحِدِينْ مِنْ كُبَارَاتْ الْمَمْلَكَةْ كُلَ.
[5] وَ يَهُورَامْ عِنْدَهْ 32 سَنَةْ وَكِتْ بِقِي مَلِكْ وَ حَكَمْ 8 سَنَةْ فِي مَدِينَةْ الْقُدُسْ.
[6] وَ هُو تَابَعْ دَرِبْ مُلُوكْ مَمْلَكَةْ إِسْرَائِيلْ مِثِلْ عَايِلَةْ أَخَابْ سَوَّتَهْ أَشَانْ هُو أَخَدْ بِنَيَّةْ أَخَابْ. وَ هُو سَوَّى الْفَسَالَةْ قِدَّامْ اللّٰهْ.
[7] وَ بَيْدَا كُلَ، اللّٰهْ مَا دَوَّرْ يِدَمِّرْ ذُرِّيَّةْ دَاوُدْ أَشَانْ الْمُعَاهَدَةْ الْهُو سَوَّاهَا مَعَ دَاوُدْ وَكِتْ قَالْ لَيَّهْ دَايْماً نَادُمْ وَاحِدْ مِنْ ذُرِّيّتَهْ يَقْعُدْ فِي الْمُلُكْ.
[8] وَ فِي حُكُمْ يَهُورَامْ مَلِكْ مَمْلَكَةْ يَهُوذَا، نَاسْ بَلَدْ أَدَوْم أَتْمَرَّدَوْا ضِدّ حُكْمَهْ وَ دَرَّجَوْا لَيْهُمْ مَلِكْ آخَرْ.
[9] وَ يَهُورَامْ مَشَى مَعَ قُيَّادْ وَ كُلَّ عَرَبَاتَهْ هَنَا الْحَرِبْ لِيِحَارُبُوا الْأَدَوْمِيِّينْ. وَ بِاللَّيْل، الْأَدَوْمِيِّينْ حَوَّقَوْهُمْ وَ لَاكِنْ يَهُورَامْ وَ كُبَارَاتْ عَرَبَاتَهْ هَنَا الْحَرِبْ قَمَّوْا حَارَبَوْهُمْ.
[10] وَ التَّمَرُّدْ هَنَا بَلَدْ أَدَوْم ضِدّ حُكُمْ يَهُورَامْ قَاعِدْ لَحَدِّي الْيَوْم. وَ فِي الْوَكِتْ دَا، حِلَّةْ لِبْنَةْ كُلَ أَتْمَرَّدَتْ ضِدّ حُكُمْ يَهُورَامْ أَشَانْ هُو أَبَى اللّٰهْ رَبّ جُدُودَهْ.
[11] يَهُورَامْ بَنَى بَكَانَاتْ عَالِيِينْ هَنَا عِبَادَةْ الْأَصْنَامْ فِي رُوسَيْ جِبَالْ يَهُوذَا. وَ لَزَّ سُكَّانْ مَدِينَةْ الْقُدُسْ يِشَّرْمَطَوْا مَعَ الْأَصْنَامْ وَ لِنَاسْ بَلَدْ يَهُوذَا، بَعَّدَاهُمْ مِنْ اللّٰهْ.
[12] يَوْم وَاحِدْ، جَوَابْ جَاءْ لِيَهُورَامْ مِنْ النَّبِي إِلِيَاسْ وَ قَالْ: دَاهُو اللّٰهْ إِلٰـهْ جِدَّكْ دَاوُدْ قَالْ: «إِنْتَ مَا تَابَعْت دَرِبْ أَبُوكْ يَهُوشَفَطْ وَ لَا دَرِبْ جِدَّكْ آسَا مَلِكْ مَمْلَكَةْ يَهُوذَا.
[13] لَاكِنْ إِنْتَ تَابَعْت دَرِبْ مُلُوكْ مَمْلَكَةْ إِسْرَائِيلْ وَ لَزَّيْت نَاسْ بَلَدْ يَهُوذَا وَ سُكَّانْ مَدِينَةْ الْقُدُسْ لِيِشَّرْمَطَوْا مَعَ الْأَصْنَامْ مِثِلْ عَايِلَةْ أَخَابْ سَوَّوْه. وَ بَتَّانْ إِنْتَ كَتَلْت كُلَّ أَخْوَانَكْ عِيَالْ أَبُوكْ الْهُمَّنْ أَخَيْر مِنَّكْ.»
[14] وَ بِسَبَبْ دَا، دَاهُو اللّٰهْ يِنَزِّلْ وَبَاءْ شَدِيدْ فِي شَعَبَكْ وَ فِي عِيَالَكْ وَ فِي عَوِينَكْ وَ فِي كُلَّ مَالَكْ.
[15] وَ إِنْتَ كُلَ يَكُرْبُوكْ أَمْرَاضْ خَاصَّةً مَرَضْ الْبَطُنْ الْيِزِيدْ لَيْك مِنْ يَوْم لِيَوْم لَحَدِّي مَصَارِينَكْ يَمُرْقُوا مِنْ بَطْنَكْ مِنْ شِدَّةْ الْمَرَضْ.
[16] وَ خَلَاصْ، اللّٰهْ لَزَّ الْفِلِسْطِيِّينْ وَ الْعَرَبْ الْقَاعِدِينْ جَنْب الْحَبَشِيِّينْ لِيُقُمُّوا ضِدّ الْمَلِكْ يَهُورَامْ.
[17] وَ هُمَّنْ هَجَمَوْا مَمْلَكَةْ يَهُوذَا وَ شَقَّوْا الْبَلَدْ وَ كَسَبَوْا كُلَّ الْمَالْ الْفِي قَصِرْ الْمَلِكْ وَ شَالَوْا عِيَالَهْ وَ عَوِينَهْ كُلَ. وَ مَا فَضَّلْ لَيَّهْ وَاحِدْ مِنْ عِيَالَهْ إِلَّا وِلَيْدَهْ الصَّغَيَّرْ أَخَزْيَا.
[18] وَ بَعَدْ دَا، اللّٰهْ نَزَّلْ لَيَّهْ مَرَضْ الْبَطُنْ الْمَا بِدَّاوَى.
[19] وَ الْمَرَضْ دَا قَاعِدْ يِزِيدْ مِنْ يَوْم لِيَوْم. وَ فِي السَّنَةْ التَّانِيَةْ، مَصَارِينَهْ مَرَقَوْا مِنْ بَطْنَهْ مِنْ شِدَّةْ الْمَرَضْ وَ مَاتْ فِي تَعَبْ شَدِيدْ. وَ شَعَبَهْ مَا حَرَّقَوْا لَيَّهْ رِيحَةْ كَتِيرَةْ مِثِلْ سَوَّوْه لِجُدُودَهْ لِيِشَرُّفُوهُمْ.
[20] وَ يَهُورَامْ عِنْدَهْ 32 سَنَةْ وَكِتْ بِقِي مَلِكْ وَ حَكَمْ 8 سَنَةْ فِي مَدِينَةْ الْقُدُسْ. وَ وَكِتْ مَاتْ، نَادُمْ وَاحِدْ الْبَكَى لَيَّهْ كُلَ مَا فِيهْ. وَ دَفَنَوْه فِي مَدِينَةْ دَاوُدْ لَاكِنْ مَا فِي قَبُرْ الْمُلُوكْ.