[1] وَ سُكَّانْ مَدِينَةْ الْقُدُسْ دَرَّجَوْا أَخَزْيَا الْوِلَيْد الصَّغَيَّرْ هَنَا يَهُورَامْ فِي بَدَلَهْ أَشَانْ أَوَّلْ الْعَرَبْ النَّهَّابِينْ جَوْا فِي الْمُعَسْكَرْ وَ كَتَلَوْا كُلَّ أَخْوَانَهْ الْكُبَارْ. وَ بِمِثِلْ دَا، أَخَزْيَا وِلَيْد يَهُورَامْ بِقِي مَلِكْ فِي مَمْلَكَةْ يَهُوذَا.
[2] وَ أَخَزْيَا عِنْدَهْ 42 سَنَةْ وَكِتْ بِقِي مَلِكْ وَ حَكَمْ سَنَةْ وَاحِدَةْ فِي مَدِينَةْ الْقُدُسْ. وَ أَمَّهْ أُسُمْهَا عَتَلْيَا مِنْ عَايِلَةْ عُمْرِي.
[3] وَ هُو كُلَ تَابَعْ دَرِبْ عَايِلَةْ أَخَابْ أَشَانْ أَمَّهْ قَاعِدَةْ تِوَصِّيهْ لِيِسَوِّي الْفَسَالَةْ.
[4] وَ أَخَزْيَا سَوَّى الْفَسَالَةْ قِدَّامْ اللّٰهْ مِثِلْ عَايِلَةْ أَخَابْ سَوَّتَهْ أَشَانْ بَعَدْ مَوْت أَبُوهْ، الْمُسْتَشَارِينْ قَاعِدِينْ يِوَصُّوهْ بِالشَّيّءْ الْيِجِيبْ دَمَارَهْ.
[5] وَ بِوَصِيِّتْهُمْ، أَخَزْيَا مَشَى مَعَ يُورَامْ وِلَيْد أَخَابْ مَلِكْ مَمْلَكَةْ إِسْرَائِيلْ وَ حَارَبَوْا حَزَيِيلْ مَلِكْ بَلَدْ أَرَامْ فِي حِلَّةْ رَامُوتْ الْفِي قِلْعَادْ. وَ الْأَرَامِيَّيْن جَرَحَوْه لِيُورَامْ.
[6] وَ يُورَامْ قَبَّلْ فِي حِلَّةْ يَزْرَعِيلْ لِيِعَالِجْ جِرَاحَهْ الْجَرَحَوْه وَكِتْ قَاعِدْ يِحَارِبْ ضِدّ حَزَيِيلْ مَلِكْ أَرَامْ. وَ أَخَزْيَا وِلَيْد يَهُورَامْ مَلِكْ مَمْلَكَةْ يَهُوذَا مَشَى حِلَّةْ يَزْرَعِيلْ لِيِشِيفْ يُورَامْ وِلَيْد أَخَابْ أَشَانْ هُو تَعْبَانْ.
[7] وَ بِزِيَارَةْ أَخَزْيَا لِيُورَامْ بَسْ، الرَّبّ قَرَّرْ دَمَارَهْ. وَكِتْ أَخَزْيَا قَاعِدْ هِنَاكْ، هُو قَمَّ مَعَ يُورَامْ وَ مَشَوْا لِيِقَابُلُوا يَاهُو وِلَيْد نِمْشِي. وَ يَاهُو دَا، هُو بَسْ الْاللّٰهْ مَسَحَهْ وَ دَرَّجَهْ مَلِكْ لِيِدَمِّرْ عَايِلَةْ أَخَابْ.
[8] وَ وَكِتْ يَاهُو قَاعِدْ يِعَاقِبْ عَايِلَةْ أَخَابْ، هُو لِقِي كُبَارَاتْ مَمْلَكَةْ يَهُوذَا وَ عِيَالْ أَخْوَانْ أَخَزْيَا الْخَدَمَوْا لِلْمَلِكْ وَ كَتَلَاهُمْ كُلُّهُمْ.
[9] وَ بَعَدْ دَا، قَمَّ يِفَتِّشْ أَخَزْيَا. وَ يَاهُو رَسَّلْ نَاسْ يِفَتُّشُوا أَخَزْيَا وَ لِقَوْه فِي مَدِينَةْ السَّامِرَةْ فِي الْبَكَانْ الْمُلَّبِّدْ فَوْقَهْ وَ جَابَوْه لِيَاهُو وَ كَتَلَوْه. وَ دَفَنَوْه عَدِيلْ أَشَانْ قَالَوْا: «دَا وِلَيْد يَهُوشَفَطْ التَّابَعْ اللّٰهْ بِكُلَّ قَلْبَهْ.» وَ مَا فَضَّلْ نَادُمْ مِنْ عَايِلَةْ أَخَزْيَا الْيَقْدَرْ يِشِيلْ الْمُلُكْ.
[10] وَ وَكِتْ عَتَلْيَا أَمّ أَخَزْيَا شَافَتْ كَدَرْ وِلَيْدهَا مَاتْ، هِي قَمَّتْ تِدَمِّرْ كُلَّ ذُرِّيَّةْ مُلُوكْ مَمْلَكَةْ يَهُوذَا.
[11] وَ لَاكِنْ يُوشَبْعَةْ بِنَيَّةْ مَلِكْ يَهُورَامْ شَالَتْ يُوَاشْ وِلَيْد أَخَزْيَا وَ مَرَقَتَهْ بِسِرّ مِنْ لُبّ عِيَالْ الْمَلِكْ الْيِدَوْرُوا يَكْتُلُوهُمْ. وَ هِي لَبَّدَتَهْ مَعَ الْمَرَةْ التَّكُرْبَهْ، فِي لُبّ مَخَزَنْ السَّرَايِرْ. وَ يُوشَبْعَةْ دِي، هِي بِنَيَّةْ مَلِكْ يَهُورَامْ وَ مَرِةْ يَهُويَدَعْ كَبِيرْ رُجَالْ الدِّينْ وَ أَخُتْ أَخَزْيَا. وَ بِمِثِلْ دَا، هِي لَبَّدَتْ يُوَاشْ وِلَيْد أَخَزْيَا مِنْ عَتَلْيَا وَ هُو نِجِي مِنْ الْمَوْت.
[12] وَ يُوَاشْ قَعَدْ مُلَبَّدْ فِي بَيْت اللّٰهْ مَعَ النَّاسْ النَّجَّوْه لِمُدَّةْ سِتَّةْ سَنَةْ. وَ فِي الْمُدَّةْ دِي، عَتَلْيَا قَاعِدَةْ تَحْكِمْ فِي الْبَلَدْ.