<Ә’йанти 3

[1] Мьлйак’әте щьвина Сардәйсер’а бьньвисә беже: Әwи кӧ һ’әфт р’ӧһ’ед Хwәде у һ’әфт стәйркед Wи һәнә, аһа дьбежә: Әз һаш жь кьред тә һәмә, наве тә һәйә йане тӧ сах и, ле р’аст тӧ мьри йи.

[2] Һ’ьшйар бә у әwед кӧ манә ле ль бәр мьрьне нә, бькә бьра сәр хwәда бен, чьмки Мьн кьред тә ль бәр Хwәдейе Хwә гьһишти нәдитьн.

[3] Дә бинә бира хwә кӧ тә чь стандийә у бьһистийә, гӧр’а wан тьшта бькә у т’обә кә. Ле һәгәр тӧ һ’ьшйар нәби, Әзе мина дьзәки сәр тәда бьгьрьм у те qәт ньзаньби кӧ Әзе к’ижан сьһ’әтеда сәр тәда бьгьрьм .

[4] Ле Сардәйседа чәнд кәсед тә һәнә кӧ wан к’ьнщед хwә нәләwьт’андьнә. Әwе бь к’ьнщед чилә-qәрqаш т’әви Мьн бьгәр’ьн, чьмки әwә һежа нә.

[5] Әwе кӧ сәрк’әвә, әwе аһа к’ьнщед чилә-qәрqаш ль хwә wәргьрә. Әзе наве wи жь к’ьтеба жийине т’ӧ щар р’әсит нәкьм у наве wи ль бәр Баве Хwә у ль бәр мьлйак’әтед Wи ашкәрә кьм .

[6] Гӧһе к’е һәйә бьра бьбьһе, кӧ Р’ӧһ’ чь дьбежә щьвина.

[7] Мьлйак’әте щьвина Фьладәлфйайер’а бьньвисә беже: Әwи пироз, Әwи р’аст, аһа дьбежә, Йе кӧ хwәйе к’ьлита Даwьд ә, кӧ вәдькә у т’ӧ кәс нькарә дадә у дадьдә т’ӧ кәс нькарә вәкә :

[8] Әз һаш жь кьред тә һәмә. Ва Мьн дәрики вәкьри данийә бәр тә, кӧ т’ӧ кәс нькарә дадә. Әз заньм кӧ qәwата тә һьнәки һәйә у тә готьна Мьн хwәй кьр у наве Мьн инк’ар нәкьр.

[9] Бьньһер’ә, һьнәкә жь к’ьништа мирещьн һәнә, йед кӧ дьбежьн: ‹Әмә щьһу нә›, ле р’аст нә щьһу нә, әw дәрәwа дькьн. Ва Әзе п’ейи сәр wан кьм, кӧ әw бен у ль бәр ньгед тә та бьн у бьзаньбьн Әз тә һ’ьз дькьм.

[10] Тә кӧ т’әмийа Мьн хwәй кьр у сәбьр кьр, Әзе жи тә жь wи wәхте щер’ьбандьне хwәй кьм, йа кӧ wе бе сәр т’әмамийа дьнйайе, кӧ бьнәлийед ль р’убари дьне бьщер’ьбинә.

[11] Әзе зутьрәке бем, чи тә һәйә qәwин бьгьрә, wәки т’ӧ кәс т’аще тә нәстинә.

[12] Әwе кӧ сәрк’әвә Әзе wи п’арьстгәһа Хwәдейе Хwәда бькьмә стун у әwе иди дәрнәк’әвә дәрва. Әзе ль сәр wи наве Хwәдейе Хwә, ӧса жи наве бажаре Хwәдейе Хwә, аwа готи наве Оршәлима ну бьньвисьм, йа кӧ жь Хwәдейе Мьн жь ә’змен wе бе хwаре у Әзе наве Хwәйи ну жи бьньвисьм .

[13] Гӧһе к’е һәйә бьра бьбьһе, кӧ Р’ӧһ’ чь дьбежә щьвина.

[14] Мьлйак’әте щьвина Лаwдькйайер’а бьньвисә беже: ‹Йе Амин› аһа дьбежә, Әw шә’де р’аст у амьн, ч’ә’вканийа ә’фьрин у хӧльqийед Хwәде :

[15] Әз һаш жь кьред тә һәмә, тӧ нә сар и у нә жи гәрм и. Хwәзи тӧ йан сар буйайи йан жи гәрм.

[16] Ле чьмки тӧ голи йи, нә сар и у нә жи гәрм, Әзе тә жь дәве хwә бьр’ежьм.

[17] Тӧ дьбежи: ‹Әз дәwләти мә, wе йәкеда гәләк пешда чумә, qәт һ’әwще т’ӧ тьшти нимә›. Ле тӧ ньзани кӧ тӧ мә’рьм, р’әбән, бәләнгаз, кор у тә’зи йи.

[18] Әз ве т’әмийе дьдьмә тә: Зер’е кӧ бь егьр һатийә сафикьрьне жь Мьн бьк’ьр’ә, wәки тӧ дәwләти би у к’ьнщед чилә-qәрqаш жь Мьн бьк’ьр’ә, кӧ ль хwә ки, wәки шәрма тә’зибуна тә бе ньхамтьне, ӧса жи дәрмане ч’ә’ва, кӧ ль ч’ә’вед хwә ди, wәки бьбини.

[19] Әз к’ижана һ’ьз дькьм ль wан һьлтем у wан ширәт дькьм. Бона ве йәке хирәт кә у жь гӧнәкьрьне вәгәр’ә!

[20] Ва Әз ль бәр дәри сәкьни мә у ль дери дьхьм. Һәгәр йәк дәнге Мьн бьбьһе у дери ль Мьн вәкә, Әзе һәр’ьмә һьндӧр’, т’әви wи нан бьхwьм у әwе жи т’әви Мьн.

[21] Әwе кӧ сәрк’әвә, Әзе дәстуре бьдьме кӧ т’әви Мьн сәр т’әхте Мьн р’уне, чаwа кӧ Әз сәрк’әтьм у т’әви Баве Хwә сәр т’әхте Wи р’уньштьм.

[22] Гӧһе к’е һәйә бьра бьбьһе, кӧ Р’ӧһ’ чь дьбежә щьвина».