Ә’йанти 21
[1] Һьнге мьн ә’рд у ә’зманәки ну дитьн, чьмки ә’рд у ә’змане бәре дәрбаз бун у иди бә’р т’ӧнәбу .
[2] Мьн дина хwә дайе, ва жь ә’змен Бажаре Пироз, Оршәлима ну мина букәкә хеликьри бона дәргистийе хwә хәмьли жь Хwәдеда дьһатә хwаре.
[3] Мьн жь т’әхт дәнгәки бьльнд бьһист кӧ гот: «Ва йә коне Хwәде нава мәрьвада! Әwе Хwәха нав wанда бьжи, әwана wе бьбьнә щьмә’та Wи у Хwәде Хwәха жи wе т’әви wан бьминә, чаwа Хwәдейе wан .
[4] Әwе жь ч’ә’вед wан һ’әму һесьред wан паqьж кә у иди мьрьне т’ӧнәбә, нә шин, нә гьри, нә еш-ешук, чьмки тьштед бәре дәрбаз бун» .
[5] Һьнге Әwи ль сәр т’әхт р’уньшти гот: «Ва Әз һәр тьшти ну чедькьм». У мьнр’а гот: «Бьньвисә, чьмки әв хәбәрнә амьн у р’аст ьн».
[6] Ӧса жи готә мьн: «Һәр тьшт һатә сери. Әз ьм Алфа у Омега, Дәстпебун у Ахьри. Әзе йед т’и, жь канийа ава жийине беһәq бьдьмә вәхwарьне.
[7] Әwе кӧ сәрк’әвә, һәр тьште п’ара wи бьк’әвьн, Әзе Хwәдейе wи бьм, әwе жи лаwе Мьн бә .
[8] Ле п’ара тьрсонәка, беамьна, к’ьрет-һ’әрама, меркӧжа, бенамуса, сербаза, п’утп’арьста у һ’әму дәрәwина wе гола агьре кӧ к’ьрк’утева дьшәwьтә бьк’әвә. Әв ә мьрьна дӧда».
[9] Мьлйак’әтәки жь wан һәр һ’әфт мьлйак’әта, йед кӧ һ’әфт т’асед wанә һ’әфт бәлайед хьлазийева т’ьжи һәбун, һат т’әви мьн хәбәр да у гот: «Wәрә ве дәре, әзе буке нишани тә кьм, дәргистийа Бәрх».
[10] Һьнге Р’ӧһ’е Пироз һатә сәр мьн, wи әз бьрьмә сәр ч’ийаки мәзьни бьльнд у Бажаре Пироз, Оршәлим нишани мьн да, кӧ жь ә’змен Хwәдеда дьһатә хwаре .
[11] Р’умәта Хwәде нав wида шәwq дьда, әw р’онайи мина кәвьре qимәт бу, мина кәвьре йаспис, мина хьрустал бу.
[12] Сура wи мәзьн у бьльнд бу, донздәһ дәргәһи бу у ль бәр дәргәһа донздәһ мьлйак’әт һәбун. Ль сәр дәргәһа навед һәр донздәһ qәбилед зар’ед Исраел ньвисар бун .
[13] Жь алийе р’оһьлатева се дәргәһ, жь алийе бакӧрева се дәргәһ, жь алийе башурева се дәргәһ у жь алийе р’оавайева се дәргәһ һәбун.
[14] Донздәһ һ’имед сура бажер һәбун, ль сәр wан һәр донздәһа навед һәр донздәһ шандийед Бәрх ньвисар бун.
[15] Дәсте wи мьлйак’әтида, йе кӧ т’әви мьн хәбәр дьда бона чапкьрьне qамишәки зер’ин һәбу, wәки бажер, дәргәһед wи у сура wи чап кә.
[16] Бажар чар гошә бу, дьрежайийа бажер wәкә бәрайийе бу. Әwи бажар бь wи qамиши чап кьр, донздәһ һ’әзар мәйдан дәрк’әт. Дьрежайи, бәрайи у бьльндайи wәкә һәв бун.
[17] Мьлйак’әт сура бажер пе чапкьрьна мәрьвайе чап кьр, бьльндайийа wе бу сәд чьл чар зәнд .
[18] Әw сур жь кәвьре йаспис һатьбу чекьрьне у бажар хwәха жь зер’е хаси мина шушә зәлал бу .
[19] Һ’имед сура бажер бь һәр щур’ә кәвьред хасә qимәт һатьбунә хәмьландьне. Һ’име пешьн йасписе сьпи бу, йе дӧда сафире шин, йе сьсийа халкедоне к’әске вәкьри, йе чара зьмруде к’әск,
[20] йе пенща сардонуксе сор, йе шәша сардийоне соре тә’ри, йе һ’әфта кәвьре зер’ин, йе һ’әйшта зьмруде шин, йе нәһа топазе qич’ьк, йе дәһа хьрисопрасе к’әск, йе йанздәһа йаqуте ширк, йе донздәһа аместисе ширке вәкьри .
[21] Һәр донздәһ дәргәһ донздәһ дӧр’ бун, һәр дәрик жь дӧр’әки бу у мәйдана бажер жь зер’е хаси мина шуше зәлал бу.
[22] Мьн бажерда п’арьстгәһ нәдит, чьмки Хӧдан Хwәдейе Һ’әму Зорайийе у Бәрх п’арьстгәһа wи нә.
[23] Бажар нә һ’әwще тә’ве у һиве бу кӧ р’онайи бьдане, чьмки р’умәта Хwәде wи р’онайи дькә у Бәрх ч’ьра wи йә .
[24] Мьләт wе р’онайа wида бьгәр’ьн у п’адшед дьнйайе wе р’әwш-р’умәта хwә биньнә нава wи .
[25] Дәргәһед wи wе т’ӧ щар нәйенә гьртьне, чьмки ль wьр т’ьме wе р’ож бә, шәве т’ӧнәбә.
[26] Wе р’умәт у һӧрмәта мьләта биньнә нава wи.
[27] Qәт тьштәки һ’әрам wе нәк’әвә бажер, нә жи йед кӧ к’ьретийе у дәрәwа дькьн wе бьк’әвьне, т’әне әwед кӧ к’ьтеба Бәрхейә жийинеда һатьнә ньвисаре .