Ә’йанти 18
[1] Пәй ван тьштар’а мьн дина хwә дайе, wе мьлйак’әтәки дьн жь ә’змен дьһатә хwаре. Әw хwәйе һ’ӧкӧме мәзьн бу у жь диндара wи р’уйе ә’рде р’онайи бу.
[2] Әwи бь дәнгәки бьльнд кьрә гази у гот: «Һьлшийа, wеран бу, Бабилона мәзьн! Әw бу щи-wар, мьск’әне щьна у сьт’ара һ’әму р’ӧһ’ед һ’әрам, qәлетка һ’әму тәйрәдед нәп’акә мьр’дар’ .
[3] Чьмки жь wе шәрава qавийа wейә һар һ’әму мьләта һьлда вәхwар, п’адшед дьнйайе т’әви wе qави кьрьн, базьрганед дьнйайе жь агьре дьле wе дәwләти бун» .
[4] Ль вьр мьн жь ә’змен дәнгәки дьн бьһист кӧ гот: «Жь нава wе дәрк’әвьн, щьмә’та Мьн, wәки һун нәбьнә һәвал-п’аред гӧнед wе у жь бәлайед wе п’аре нәстиньн .
[5] Чьмки гӧнед wе сәр һәв щи бунә гьһиштьнә һ’әта ә’змен у Хwәде нәр’астийед wе анинә бира Хwә .
[6] Wе чь кьрьбә ӧса жи һун биньнә сәре wе у ль анәгори кьред wе, дӧ щар һаqаси ле вәгәр’иньн, әw к’аса кӧ wе бона wә дагьрт, һун дӧ щар тә’л ль wе бьдьнә вәхwарьне .
[7] Чьqас р’умәта хwә бьльнд кьрийә у к’ефа дьле хwә дәрбаз кьрийә, һаqаси щәфа-шине сәрда биньн. Чьмки дьле хwәда аһа дьбежә: ‹Әз чаwа п’адша р’уньшти мә, у нә жьнәби мә, т’ӧ щар әзе шине нәбиньм› .
[8] Ләма жи нава р’ожәкеда wе бәлайед wе сәр wеда бен: Нәхwәшийа һ’ал, шин у хәлайи у wе бьбә хӧре егьр. Чьмки әw Хӧдан Хwәде qәwат ә, йе кӧ диwана wе дькә».
[9] П’адшед дьнйайе, йед кӧ пер’а qави у к’еф кьрьнә, гава дуйе шәwата wе бьбиньн, wе бьгьрин у сәр wе шине бькьн.
[10] Жь тьрса щәфе wе, әwе ль дур бьсәкьньн у бежьн: «Ах, ах бажаре мәзьн, бажаре зор, Бабилон! Диwана тә сьһ’әтәкеда сәр тәда һат» .
[11] Базьрганед дьнйайе wе ль сәр wе бьгьрин у шине бькьн, чьмки иди т’ӧ кәсе тьштед wанә фьротане нәк’ьр’ә:
[12] Һур-муред зер’, зив, кәвьред qимәт, лал-дӧр’, к’ьтане qимәт, п’арч’ед ширк, һәвьрмьш, п’арч’ед соре гәвәз, һәр дара бинхwәш у һәр тьштед жь qилед фила, тьштед жь даред һәрә qимәт, жь сьфьр, һ’әсьн у мәрмәр,
[13] ӧса жи дарчин, бьһарәта бинхwәш, бьхур, р’уне бинхwәш, бьхуре ә’рәби, шәрав, бьзьре зәйт’уне, аре хас, гәньм, дәwар, пәз, һәсп, ә’рәбә, хӧлам у р’ӧһ’ед инсен жи.
[14] Базьргане бежьн: «Әw тьштед дьле тәдайә ширьн жь дәсте тә чун у һ’әму тьштед р’әwшә бьрqок жь тә бьрийан, иди т’ӧ щар әw дәст тә нак’әвьн».
[15] Әw базьрганед ван тьшта, йед кӧ пе Бабилоне дәwләти бьбун, wе жь тьрса щәфе wе дур бьсәкьньн бьгьрин, бавежьнә сәр wе
[16] у бежьн: «Ах, ах бажаре мәзьн, кӧ тә к’ьтане qимәт, п’арч’е ширк у соре гәвәз ль хwә wәргьртьбу у бь зер’, кәвьре qимәт, лал-дӧр’ва хәмьли буйи!
[17] Һаqас һәбук сьһ’әтәкеда п’уч’ бу чу». Һ’әму сәрдаред гәмийа у сийаред гәмийа, гәмивана у һ’әмуйед кӧ пе хәбата сәр бә’ре ә’буре хwә дькьрьн, дур сәкьнин
[18] у чахе дуйе шәwата wи дитьн, кьрьнә qир’ин у готьн: «Гәло бажарәки дьн мина ви бажаре мәзьн һәбу?»
[19] Хwәли ль сәре хwә кьрьн, бь шин у гьри кьрьнә qир’ин у готьн: «Ах, ах бажаре мәзьн, wәки һ’әмуйед бә’редайә хwәйигәми пе һәбука wийә хьнебуйи дәwләти бьбун, чаwа сьһ’әтәкеда wеран бу чу!»
[20] Ә’змано, щьмә’та Хwәде, шанди у п’ехәмбәрно! Дьле хwә ша кьн ль wи бажари, кӧ Хwәде һ’әйфа wә жь wи һьлда.
[21] Һьнге мьлйак’әтәки qәwат, кәвьрәк мина бәрашәки мәзьн һьлда, авитә бә’ре у гот: «Бь ви аwайи жи бажаре мәзьн Бабилон wе qайим жорда бе авитьне у иди т’ӧ щар wе хӧйа нәбә .
[22] Wе иди дәнге чәнг, сазбәнд, бьлурван у бор’иван нав тәда т’ӧ щар нәйе бьһистьне. Wе иди һостаки т’ӧ п’ешәйи т’ӧ щар нав тәда хӧйа нәбә. Wе иди дәнге бәраша жи т’ӧ щар нав тәда нәйе бьһистьне .
[23] Wе иди ч’ьрусийа ч’ьре жи т’ӧ щар нав тәда хӧйа нәбә Wе иди дәнге бук-зә’ве жи т’ӧ щар нав тәда нәйе бьһистьне. Базьрганед тә гьрәгьред дьнйайе бун у һ’әму мьләт бь сербазийа тә жь р’е хальфин .
[24] У хуна п’ехәмбәр у щьмә’та Хwәде к’әтә стуйе wи бажари, бәле хуна wан һ’әмуйа кӧ ль сәр р’уйе ә’рде һатьнә р’етьне».