[1] Чахе Иса ә’лаләт дит, һьлк’ьшийа ч’ийе, р’уньшт у шагьртед Wи һатьнә щәм Wи.
[2] Әwи дәст бь һинкьрьна Хwә кьр у wанр’а гот:
[3] «Хwәзи ль р’ӧһ’фәqира , чьмки П’адшатийа Ә’змана йа wан ә.
[4] Хwәзи ль һ’әзнийа, чьмки бәр дьлед wанда wе бе һатьне.
[5] Хwәзи ль шкәстийа, чьмки ә’рде п’ара wан бә.
[6] Хwәзи ль wан, кӧ т’и у бьр’чийе р’астиqәдандьне нә, чьмки әwе т’ер бьн.
[7] Хwәзи ль дьлр’ә’ма, чьмки әwе р’ә’ме бьбиньн.
[8] Хwәзи ль дьлпаqьжа, чьмки әwе Хwәде бьбиньн.
[9] Хwәзи ль wан, кӧ ә’дьлайийе дькьн, чьмки әwе зар’ед Хwәде бенә һ’әсабе.
[10] Хwәзи ль wан, кӧ бона р’астиqәдандьне тенә зерандьне, чьмки П’адшатийа Ә’змана йа wан ә.
[11] Хwәзи ль wә, гава бона наве Мьн wә беһӧрмәт кьн, бьзериньн у һәр щур’ә бӧхдан ль wә бькьн.
[12] Әшq у ша бьн, чьмки һәqе wә ль ә’змана гәләк ә. Бь ви щур’әйи п’ехәмбәред кӧ бәри wә һәбун, зерандьн.
[13] Һун хwейа ә’рде нә. Ле һәгәр хwе тә’ма хwә ӧнда кә, паше әwе бь чь тә’ме бьстинә? Иди wе кери тьштәки нәйе. Wе бьгьрьн бавежьнә нав дәст-п’ийа.
[14] Һун р’онайа дьнйайе нә. Һәгәр бажарәк сәре ч’ийе йә, найе вәшартьне.
[15] Кәсәк жи ч’ьре венахә у накә бьне фьраqе, ле датинә сәр п’еч’ьре, кӧ р’онайе бьдә һ’әмуйед кӧ маледа нә.
[16] Ӧса жи бьра р’онайа wә бәр мәрьва шәwq бьдә, кӧ әwана кьрьнед wәйә qәнщ бьбиньн у пәсьне Баве wәйи ә’змана бьдьн.
[17] Нәфькьрьн кӧ Әз һатьмә ньвисаред п’ехәмбәра у Qануне хьраб кьм. Әз нәһатьм кӧ хьраб кьм, ле wан һ’әмуйа биньмә сери.
[18] Әз р’аст wәр’а дьбежьм, бәри дәрбазбуна ә’рд у ә’зман, дәqәк йан жи һ’әрфәкә бьч’ук жь Qануне wе т’ӧ щар ӧнда нәбә, һ’әта кӧ һ’әму бенә сери.
[19] Аwа к’и жь ван т’әмийа йәкә һәрә бьч’ук хьраб кә у мәрьва ӧса һин кә, әwе П’адшатийа Ә’зманада жь һ’әмуйа бьч’уктьр бе һ’әсабе. Ле к’и кӧ wана пек бинә у һин бькә, әwе П’адшатийа Ә’зманада мәзьн бе һ’әсабе.
[20] Ләма Әз wәр’а дьбежьм, һәгәр р’астийа wә жь р’астийа qанунзан у ферьсийа зедәтьр нибә, һун т’ӧ щар нак’әвьнә П’адшатийа Ә’змана.
[21] Wә бьһистийә кӧ пешийар’а һатийә готьне: ‹Нәкӧжә! К’и кӧ бькӧжә, диwана wи wе бе кьрьне›.
[22] Ле Әз wәр’а дьбежьм, к’и сәр бьре хwә һерс к’әвә , wе бьбә дәйндаре диwане у к’и бежә бьре хwә: ‹Бе аqьл›, әwе бьбә дәйндаре диwана щьвина гьрәгьра у к’и кӧ бежә: ‹Ахмах›, wе бьбә дәйндаре агьре доже.
[23] Аwа һәгәр тӧ һ’әдийа хwә бини сәр горигәһе у ль wьр бе бира тә, кӧ дьле бьре тә жь тә майә,
[24] һ’әдийа хwә wе дәре ль бәр горигәһе бьһелә у пешийе һәр’ә бьре хwәр’а ль һәв wәрә у паше wәрә һ’әдийа хwә бьдә.
[25] Чахе нәйаре тә тә к’аши щәм һ’акьм дькә, р’еда т’әви wи зу ль һәв wәрә. Һәгәр на, әwе тә бьдә дәсте һ’акьм, һ’акьме жи тә бьдә дәсте бәрдәстийе хwә у тә бавежә кәле.
[26] Әз р’аст тәр’а дьбежьм, тӧ жь wьр т’ӧ щар дәрнак’әви һ’әта поле пашьн нәди.
[27] Wә бьһистийә кӧ һатийә готьне: ‹Зьнийе нәкә› .
[28] Ле Әз wәр’а дьбежьм, к’и бь тәме хьраб жьнәке бьньһер’ә, әwи дьле хwәда иди т’әви wе зьнек’ари кьр.
[29] Аwа һәгәр ч’ә’ве тәйи р’асте тә жь р’е дәрдьхә, wи дәрхә у жь хwә бавежә. Бона тә һе qәнщ ә кӧ әндәмәки тә ӧнда бә, ле бәдәна тә пева нәк’әвә щә’ньме.
[30] У һәгәр дәсте тәйи р’асте тә жь р’е дәрдьхә, wи жекә у бавежә. Тәр’а һе qәнщ ә кӧ әндәмәки тә ӧнда бә, ле бәдәна тә пева нәк’әвә щә’ньме.
[31] Әв жи һатийә готьне: ‹К’и к’ӧлфәта хwә бәр’дә, бьра к’ахаза жьнбәр’дане бьдә wе› .
[32] Ле Әз wәр’а дьбежьм, к’и кӧ бе сәбәбийа qавийе жьна хwә бәр’дә, әw дьбә сәбәбе зьнекьрьна wе, һәгәр диса әw мер кә у к’и кӧ йәкә мербәр’дайи бьстинә, әw зьнийе дькә.
[33] Wә әв жи бьһистийә кӧ пешийар’а һатийә готьне: ‹Дәрәw сонд нәхwә у сонде хwә ль бәр Хӧдан бинә сери› .
[34] Ле Әз wәр’а дьбежьм, т’ӧ щар сонд нәхwьн, нә бь ә’змен, чьмки әw т’әхте Хwәде йә,
[35] нә жи бь ә’рде, чьмки әw щийе бьн п’ийед Wи йә, нә жи бь Оршәлиме, чьмки әw бажаре П’адше мәзьн ә
[36] у нә жи бь сәре хwә сонд бьхwә, чьмки тӧ нькари муки сьпи ки йан р’әш ки.
[37] Ле бьра готьна wә бьбә ‹бәле-бәле› йан жи ‹на-на›. Жь ве зедәтьр жь мирещьн ә .
[38] Wә бьһистийә кӧ һатийә готьне: ‹Ч’ә’в жь бәр ч’ә’вва, дьран жь бәр дьранва› .
[39] Ле Әз wәр’а дьбежьм, мьqабьли хьраба нәсәкьньн. Һәгәр йәк шәмаqәке ль р’уйе тәйи р’асте хә, йе дьн жи бьдә бәр.
[40] У һәгәр йәк тә к’аши бәр диwане кә у бьхwазә кьрасе тә жь тә бьстинә, п’оте хwә жи жер’а бьһелә.
[41] У һәгәр йәки qӧльхеда зоре ль тә бькә, wәки километьрәке тә бьбә, т’әви wи дӧда һәр’ә.
[42] Бьдә wи, к’и жь тә дьхwазә у бәре хwә жь wи нәгӧһезә, йе кӧ дьхwазә жь тә дәйн бькә.
[43] Wә бьһистийә кӧ һатийә готьне: ‹Һәвале хwә һ’ьз бькә у бьжәнә дьжмьне хwә›.
[44] Ле Әз wәр’а дьбежьм, дьжмьнед хwә һ’ьз бькьн у бона wан дӧа бькьн, йед кӧ wә дьзериньн ,
[45] wәки һун бьбьнә зар’ед Баве хwәйи Ә’змана. Чьмки Әw тә’ва Хwә дәрдьхә һьн сәр qәнща, һьн жи сәр хьраба у баране дьбаринә һьн сәр р’аста, һьн жи сәр нәр’аста.
[46] Һәгәр һун wан һ’ьз бькьн, к’ижан кӧ wә һ’ьз дькьн, һуне чь һәq бьстиньн? Нә хәрщгьр жи ӧса дькьн?
[47] У һәгәр һун т’әне сьлаве бьдьнә бьред хwә, иди һун чь тьшти жь әwед дьн зедәтьр дькьн? Нә п’утп’арьст жи ӧса дькьн?
[48] Аwа к’амьл бьн, чаwа кӧ Баве wәйи Ә’змана к’амьл ә.