[1] Wан р’ожада Йуһ’әннайе ньхӧмдар р’абу нава бәр’ийа Щьһустане даннасин кьр
[2] у гот: «Жь гӧнәкьрьне вәгәр’ьн, чьмки П’адшатийа Ә’змана незик буйә».
[3] Йуһ’әнна әw бу, бона к’ижани Ишайа п’ехәмбәр готьбу: «Дәнгәк бәр’ийеда дькә гази: ‹Р’ийа Хӧдан һазьр бькьн у шьвәр’ийед Wи р’аст бькьн›» .
[4] К’ьнще Йуһ’әнна жь пьр’ч’а дәве бу у qайишәкә ч’әрм ль пьште бу. Хwарьна wи жи кӧли у һьнгьве чоле бу.
[5] Һьнге щьмә’та Оршәлиме у т’әмамийа Щьһустане у һ’әму алийед ч’әме Урдӧне дьһатьнә щәм wи,
[6] гӧнед хwә дьданә р’уйе хwә у жь wи ч’әме Урдӧнеда дьһатьнә ньхӧмандьне.
[7] Гава Йуһ’әнна дит кӧ жь ферьси у садуqийа жи гәләк һатьнә wәки бенә ньхӧмандьне, әwи готә wан: «Ч’ежькед мә’ра! К’е wәр’а гот, кӧ һун жь хәзәба те бьр’әвьн?
[8] Дә бь кьред qәнщ бьдьнә к’ьфше, кӧ һун жь гӧнәкьрьне вәгәр’ийанә.
[9] У нав хwәда нәфькьрьн нәбежьн: ‹Бьраһим баве мә йә›. Әз wәр’а дьбежьм, кӧ Хwәде жь ван кәвьра жи дькарә зар’а Бьраһимр’а дәрхә.
[10] Ва йә бьвьр ль сәр р’аwе даре йә. Һәр дара кӧ бәре qәнщ нәйнә, wе бе бьр’ине у авитьне нава егьр.
[11] Әз wә бона гӧнәвәгәр’андьне бь аве дьньхӧминьм, ле Йәки жь мьн qәwаттьр wе бе. Әз нә һежа мә чарьхе Wи жи бьгьрьмә дәсте хwә. Әwе wә пе Р’ӧһ’е Пироз у егьр бьньхӧминә.
[12] Мәлһ’әба Wи дәсте Wида йә. Әwе бедәра Хwә паqьж кә, гәньме Хwә бькә ә’мбаре, ле кайе wе бь агьре кӧ натәмьрә бьшәwьтинә».
[13] Һьнге Иса жь Щәлиле һатә Урдӧне, щәм Йуһ’әнна, кӧ жь wи бе ньхӧмандьне.
[14] Ле Йуһ’әнна бона ве йәке Wир’а qайл нәдьбу у готә Wи: «Әз һ’әwщә мә кӧ бь дәсте Тә бемә ньхӧмандьне у Тӧ тейи щәм мьн?»
[15] Иса ле вәгәр’анд у готе: «Ньһа бьһелә, чьмки ль мә дьк’әвә кӧ әм һ’әму р’астийе аһа биньнә сери». Паше Йуһ’әнна qайл бу.
[16] Һәма чаwа Иса һатә ньхӧмандьне у жь аве дәрк’әт, ньшкева ә’зман вәбун у әwи дит кӧ Р’ӧһ’е Хwәде мина кәвоткәке һатә хwаре у сәр Wи дани.
[17] У ва дәнгәк жь ә’змана һат: «Әв ә Кӧр’е Мьни дәлал, кӧ әз жь Wи р’ази мә».