[1] Һьнге Р’ӧһ’ Иса бьрә бәр’ийе, кӧ жь Мирещьн бе щер’ьбандьне.
[2] Әwи чьл р’ож у чьл шәви р’ожи гьрт, пәйр’а бьр’чи бу.
[3] Йе кӧ дьщер’ьбинә незики Wи бу у готе: «Һәгәр Тӧ Кӧр’е Хwәде йи, дә бежә ван кәвьра кӧ бьбьнә нан».
[4] Ле Иса ле вәгәр’анд у готе: «Ньвисар ә: ‹Инсан т’әне бь нен нажи, ле бь һәр хәбәра кӧ жь дәве Хwәде дәрдьк’әвә› ».
[5] Һьнге мирещьн Әw бьрә Бажаре Пироз, сәр бьльндщийа бане п’арьстгәһе да сәкьнандьне
[6] у готә Wи: «Һәгәр Тӧ Кӧр’е Хwәде йи, дә Хwә бавежә хwаре, чьмки ньвисар ә: ‹Хwәде wе т’әмийа Тә бьдә мьлйак’әтед Хwә у wе Тә сәр дәсте Хwә бьгьрьн, wәки ньге Тә кәвьр нәк’әвә› ».
[7] Иса готе: «Әв жи ньвисар ә: ‹Хӧдан Хwәдейе хwә нәщер’ьбинә› ».
[8] Һьнге мирещьн Әw бьр р’акьрә сәр ч’ийаки гәләки бьльнд у һ’әму п’адшатийед дьнйайе, р’әwша wанва нишани Wи дан
[9] у готә Wи: «Һәгәр Тӧ дәвәр’уйа бейи, сәре Хwә ль бәр мьн дайни, әзе ван һ’әмуйа бьдьмә Тә».
[10] Һьнге Иса готе: «Дури Мьн һәр’ә, щьно! Чьмки ньвисар ә: ‹Сәре хwә ль бәр Хӧдан Хwәдейе хwә дайнә у т’әне Wир’а хӧламтийе бькә!› »
[11] Wи чахи мирещьн Әw һьшт чу у ва мьлйак’әт һатьн жер’а бәрдәсти кьрьн.
[12] Гава Иса бьһист, wәки Йуһ’әнна һатә гьртьне, Әw р’абу чу Щәлиле.
[13] Әwи Ньсрәт һьшт, чу Кәфәрнаһума дәве гола Щәлиле, ль нав синоре Зәбулоне у Нәфтәлийе щи-wар бу.
[14] Әв йәк аһа бу, кӧ әw готьна бь заре Ишайа п’ехәмбәр бе сери:
[15] «Wәлате Зәбулоне у wәлате Нәфтәлийе, ль сәр р’ийа бәрбь голе, wи алийе Урдӧне, Щәлила нәщьһуйа,
[16] әw щьмә’та кӧ нав тә’ристанийеда р’уньштьбу, р’онайикә мәзьн дит у әwед кӧ ль wәлат у сийа мьрьнеда р’уньштьбун, р’онайи жь wанар’а дәрк’әт» .
[17] Жь һьнгева Иса дәст бь даннасинийе кьр у гот: «Жь гӧнәкьрьне вәгәр’ьн, чьмки П’адшатийа Ә’змана незик буйә».
[18] Чахе Иса ль дәве гола Щәлиле дьгәр’ийа, р’асти дӧ бьра һат, Шьмһ’уне кӧ жер’а Пәтрус дьһатә готьне у Әндраwьсе бьре wи. Wана т’ор’ давитә голе, чьмки мә’сигьр бун.
[19] Иса wанар’а гот: «Пәй Мьн wәрьн, Әзе wә бькьмә неч’ирванед мәрьва».
[20] Wана жи һәма wе дәме т’ор’ед хwә һьштьн у пәй Wи чун.
[21] Гава Иса жь wи щийи һьнәки пешда чу, р’асти дӧ бьред дьн жи һат, Аqубе Зәбәди у Йуһ’әннайе бьре wи. Wана т’әви баве хwә, Зәбәди qәйькеда т’ор’ед хwә һивез дькьрьн. Иса гази wан жи кьр.
[22] Wана жи һәма wе дәме qәйьк у баве хwә һьштьн у пәй Wи чун.
[23] Иса ль т’әмамийа Щәлиле дьгәр’ийа, к’ьништед wанда һин дькьр у Мьзгинийа П’адшатийе дьда у һәр щур’ә еш у нәхwәши жи кӧ нав щьмә’теда һәбун qәнщ дькьрьн.
[24] Нав-дәнге Wи ль т’әмамийа Сурйайе бәла бу, щьмә’те һәр щур’ә мәрьвед нәхwәш анинә щәм Wи, йед кӧ щур’ә-щур’ә еш у щәфада бун: Йед щьнак’әти, һивк’әти, шьлушә’т у Әwи әw һ’әму жи qәнщ кьрьн.
[25] Гәләк ә’лаләт жи жь Щәлиле, жь qәза Декаполисе , жь Оршәлиме, жь Щьһустане у жь wи алийе Урдӧнейи р’оһьлате пәй Wи дьчун.