<Аqуб 5

[1] Ньһа һун бьбьһен, дәwләтино! Бьгьрин у шине бькьн бона wе бәләнгазийа кӧ wе бе сәре wә.

[2] Һәбука wә р’ьзи йә, к’ьнщед wә жи бунә хӧре бьзузе .

[3] Зер’ у зиве wә зәнг гьртьн ә у зәнга wане бьбә шә’де мьqабьли wә у мина алава егьр гоште wә һ’уфи хwә кә. Wә бона р’ожед ахьрийе хьзнә хwәр’а т’оп кьр!

[4] Wә әw һәqед п’алед кӧ ә’рде wә дьдьрутьн нәдане. Ва йә әw һәq дькьнә зарин. Шькийате wан п’ала гьһиштийә гӧһе Хӧдане Зор .

[5] Wә ль сәр дьне ч’ә’ве хwә тьштәкида нәһьштийә, ль гора дьле хwә хwарийә-вәхwарийә, чаwа к’озикьри, бона р’ожа сәржекьрьне.

[6] Wә әw мәрьвед р’аст ломәк’ар кьрьн у кӧштьн, к’ижан кӧ мьqабьли wә р’анәбун.

[7] Аwа хушк-бьрано, сәбьр кьн һ’әта һатьна Хӧдан. Дина хwә бьдьне, щотк’ар һивийа бәре ә’рдейи бь qимәт ә, бона wе йәке сәбьр дькә һ’әта барана пешьн у пашьн ледә.

[8] Һун жи сәбьр кьн, гӧмана хwә ӧнда нәкьн, чьмки һатьна Хӧдан незик ә.

[9] Бина хwә жь һәвдӧ тәнг нәкьн хушк-бьрано, кӧ диwана wә нәбә. Ва йә һ’акьм пьшт дери сәкьни йә.

[10] Хушк-бьрано, алийе тә’ли-тәнгийа у сәбьреда ч’ә’в бьдьнә wан п’ехәмбәра, йед кӧ бь наве Хӧдан хәбәр данә.

[11] Бәле әм хwәзийа хwә ль йед сәбьр дькьн тиньн. Wә бона сәбьра Ибо бьһистийә у wә дит, Хӧдан ахьрийа wи чаwа хер кьр, чьмки Хӧдан гәләки исаф у р’ә’м ә!

[12] Бәри һәр тьшти хушк-бьрайед мьн, сонд нәхwьн, нә бь ә’змен, нә бь ә’рде, нә жи сондәкә майин. Бьра «Бәле»-йа wә бәле бә, «На»-йа wә на бә, wәки һун диwане сәр хwәда нәйньн .

[13] Һәгәр йәк жь wә тә’ли-тәнгийеда йә, бьра дӧа бькә. Һәгәр йәк ша йә, бьра әшqи Хwәде бьстьре.

[14] Һәгәр йәк жь wә нәхwәш ә, бьра гази бәрпьрсийаред щьвине кә, сәр wида бьра дӧа бькьн, бь наве Хӧдан бь р’ун р’ун кьн .

[15] У дӧайе бь баwәрийе wе йе нәхwәш qәнщ кә у Хӧдан wе wи р’акә сәр п’ийа. У һәгәр гӧнәк жи кьрьбә, wе wи бе бахшандьне.

[16] Ләма бәр һәв гӧнед хwә бьдьнә р’уйе хwә у бона һәв дӧа бькьн, wәки һун qәнщ бьн. Дӧайе йе р’аст гәләки qәwат ә у һ’ӧкӧм дькә.

[17] Елйас хут мәрьвәки мина мә бу, бь дьл у щан дӧа кьр, кӧ баран нәбарә у се сал у нива сәр ә’рде баран нәбари .

[18] У паше диса дӧа кьр, жь ә’змен баран бари у ә’рде бәре хwә да.

[19] Гәли хушк-бьрайед мьн! Һәгәр йәк жь wә жь р’ийа р’астийе бьк’әвә у йәки дьн wи вәгәр’инә,

[20] бьра әw заньбә йе кӧ гӧнәк’ар жь р’ийа wийә хальфи вәдьгәр’инә, әw р’ӧһ’әки жь мьрьне хьлаз дькә у гәләк гӧна р’әсит дькә .