<Аqуб 3

[1] Бьра гәләк жь wә, бьрайед мьн нәбьнә дәрсдар, чьмки һун заньн диwане сәр мә дәрсдара һе гьран бә.

[2] Бәле әм һ’әму жи гәләки шашийа дькьн. Һәгәр йәк хәбәрданеда т’ӧ шашийе накә, әw йәки к’амьл ә, кӧ дькарә т’әмамийа qальбе хwә зәфт кә.

[3] Әм гәме давежьнә дәве һәспе, wәки әw бе зәфте, кӧ әм сәрwертийе т’әмамийа һәспе пева бькьн.

[4] Әм биньн сәр гәмийе жи. Әw чьqаси мәзьн ьн у жь бәр байе qайим тенә ажотьне, ле бь чәрхәкә гәләки бьч’ук тенә сәрwертикьрьне, дьле гәмиван к’ийалида кӧ бьхwазә.

[5] Ӧса жи зьман әндәмәки бьч’ук ә, ле тьштед жь хwә мәстьр дьбежә. Дина хwә бьдьнә пьрискә агьр, чь дарьстанәкә мәзьн дькарә бьшәwьтинә!

[6] Зьман жи агьрәк ә, дьнйакә зӧлмк’ар ә нава әндәмед мәда. Әw т’әмамийа qальбе мә дьһ’әр’ьминә, агьр дәwра жийина мерьв дьхә у әw хwәха жь алава агьре доже пегьрти йә.

[7] Һәр щур’ә р’ә’wьр, тәйрәдә, шульки у һ’әйwанед бә’ре тенә зәфте у зәфти мерьв дьбьн,

[8] ле т’ӧ qул-бәндә зьмен нькарә. Әw зӧлмк’арәки беар ә, жә’ра мә’рава дагьрти йә.

[9] Әм бь wи шькьрийе дьдьнә Хӧдан у Бав, бь wи жи ньфьр’а мерьв дькьн, йед кӧ дьлqе Хwәдеда һатьнә хӧльqандьне.

[10] Һәма жь wи дәви жи дӧа у ньфьр’ дәртен. Хушк-бьрайед мьн, әв йәк нә щайиз ә кӧ аһа бә.

[11] Гәло жь ч’ә’вканике ава хwәш у тә’л дьдә дәр?

[12] Гәло дьбә хушк-бьрайед мьн, wәки дара һежире бәре зәйт’уне бьдә, йан жи к’ола тьрийе һежире? Нә жи жь шор’айийе ава хwәш дәрте?

[13] Нава wәда к’и сәрwахт у аqьл ә? Бьра әw бь п’әргалийа хwәйә qәнщ, кьред хwә бь мьлуктийа сәрwахтийе бьдә к’ьфше.

[14] Ле һәгәр дьле wәда һ’әвсудийа хьраб у ч’ә’внәбари һәнә, к’ӧбар нәбьн у р’астийе дәрәw дәрнәхьн.

[15] Әва «сәрwахтийа» нә дайина жорьн ә, ле жь дьне йә, йа мәрьвайи йә у жь щьна йә.

[16] Чьмки ль к’идәре һ’әвсуди у ч’ә’внәбари һәнә, ль wьр бет’әрбәти у һәр кьрьнед хьраб жи һәнә.

[17] Ле сәрwахтийа жорьн, бәре пешьн паqьж ә, паше ә’дьл ә, мьлук у бәрбьһер ә, бь р’ә’ме у бәред qәнщийева т’ьжи йә, бе т’агер у бе һ’ьләк’ари йә.

[18] У бәре һәqийе жь алийе йе кӧ бь ә’дьлайийе дьчинә те чьнине .