Пәтрус I 1
[1] Жь Пәтрус, Шандийе Иса Мәсиһ, щьмә’та Хwәдейә бьжартир’а, йа кӧ ль wәлатед Понтосе, Галатйайе, Кәпәдокйайе, Асйайе у Битенйайеда хәриб бәлабуйи йә.
[2] Һун ль гора wе qьрара Бав Хwәдейә пешда һатьнә бьжартьне у бь Р’ӧһ’е Пироз бӧһӧрти-жьбарә дьбьн, wәки гӧһдарийа Иса Мәсиһ бькьн у бь хуна Wийә р’ети бенә паqьжкьрьне: Дә бьра к’әрәм у ә’дьлайи һе ль wә зедә бә.
[3] Шькьр жь Хwәдер’а, Баве Хӧдане мә Иса Мәсиһ, кӧ жь р’ә’ма Хwәйә п’ьр’, щарәкә дьн әм дьне хьстьн, бь р’абуна Иса Мәсиһә жь мьрийа, wәки бьбьнә хwәйе гӧмана сах
[4] у wан соз-qьраред нәбәталә нәр’ьзи у нәч’ьлмьси wар бьн. Әвана ль ә’змана wәр’а хwәйкьри нә.
[5] У qәwата Хwәде пе баwәрийа wә, wә хwәй дькә, бона wе хьлазбуна һазьркьри, йа кӧ ахьрийа зәменда wе хӧйа бә.
[6] Һун бь wе ша дьбьн, р’аст ә ньһа жи ӧса дьqәwьмә кӧ һун һьнәки мә’дәкьри нә, жь дәст щур’ә-щур’ә щер’ьбандьна.
[7] Әв йәк дьбә сәбәб, wәки хальсийа баwәрийа wә һе бь qимәт к’ьфш бә, нә кӧ әw зер’е кӧ нава егьрда те щер’ьбандьне ле диса ӧнда дьбә у бь ви аwайи әw баwәрийа wә wе һежайи пәсьн, р’умәт у qәдьр бә, wәхте хӧйабуна Иса Мәсиһ.
[8] Wә Әw нәдитийә, ле һун Wи һ’ьз дькьн, ньһа жи набиньн, ле баwәрийа хwә Wи тиньн у ша нә бь wе әшqа мәзьнә хwәйир’умәт, кӧ бь зара найе готьне.
[9] Чьмки һун хьлазкьрьна р’ӧһ’е хwә дьстиньн, кӧ мәрәме баwәрийа wә йә.
[10] Бона ве хьлазбуне п’ехәмбәр ле гәр’ийан у к’әтьбунә бьн ә’нәна у бона wе к’әрәма кӧ wе wәр’а бьбуйа п’ехәмбәрти кьрьн.
[11] Р’ӧһ’е Мәсиһи нава wанда һе пешда ль бәр wан вәдькьр, кӧ Мәсиһе щәфе бьк’ьшинә у пәйр’а бьк’әвә р’умәта Хwә. У wан дькьр кӧ бьзаньбьн к’а бона к’әнге у зәманәки чаwада әв йәке бьqәwьмьн.
[12] Ль бәр wан вәбу, wәки әw нә кӧ бона хwә, ле бона wә хәбьтин, гава әw тьштед ньһа wәр’а бь дәсте wан һатьнә готьне, йед кӧ Мьзгини wәр’а даннасин кьрьн, бь Р’ӧһ’е Пирози кӧ жь ә’змен һатә шандьне. Мьлйак’әт жи дәмана wан тьштада нә, кӧ һәма бьбиньн.
[13] Бона wе йәке һун фькьред хwәда пьштгьредайи у һ’ьшйар бьн, т’ам гӧмана хwә бьдьнә сәр wе к’әрәме, йа кӧ wе wәр’а бе дайине, wәхте хӧйабуна Иса Мәсиһ.
[14] Мина зар’ед гӧһдар бьн, нәбьнә мина wи wәхте дьлхwәстьнед хwәйә нәзанийа хwәда.
[15] Ле мина wи Пирозе кӧ гази wә кьр, һун жи пироз бьн нава һ’әму р’абун-р’уньштьна хwәда.
[16] Чаwа ньвисар ә: «Пироз бьн, чьмки Әзи пироз ьм» .
[17] Һәгәр һун Wир’а Баво дьбежьн, Йе кӧ бе фьрqи диwана һәр кәси wәкә ә’мәлед wи дькә, кӧ ӧса йә ви wәхте хәриб-фьрарийа хwәйә ве дьне бь хофа Хwәде дәрбаз кьн.
[18] Чьмки һун заньн wәки һун жь р’аw-р’ьзьмед кал-бавайә бекер, пе wан тьштед кӧ ӧнда дьбьн, аwа готи зер’а йан зива нәһатьнә к’ьр’ине,
[19] ле пе хуна Мәсиһә qимәт-гьран, кӧ әw чаwа бәрхәки беqӧсур у беләк’ә бу.
[20] Әw һе бәри дәстпебуна дьнйайе к’ьфшкьри бу, ле ван ахьрийада бона wә ә’йан бу.
[21] Бь Wи wә баwәрийа хwә Wи Хwәдейи ани, Йе кӧ Әw жь нава мьрийа р’акьр у р’умәт да Wи, ләма баwәри у гӧмана wә сәр Хwәде йә.
[22] Аwа wә гӧһдарийа р’астийе кьр у бь ви аwайи хwә паqьж кьр, кӧ һ’ьзкьрьна wә һьндава хушк-бьрада бе һ’ьләк’ари бә, ньһа бь дьле сах һәвдӧ qайим һ’ьз бькьн.
[23] Һун нә кӧ жь һавене п’уч’ диса дьне к’әтьнә, ле жь йе нәп’уч’, жь хәбәра Хwәдейә хwәйиә’мьрә һ’әта-һ’әтайе.
[24] Чьмки «Һ’әму мәрьв мина гиһе нә у т’әмамийа р’әwша wан мина гӧле гиһе. Гиһа һ’ьшк дьбә у гӧлед wе же дьwарьн,
[25] ле хәбәра Хӧдан һ’әта-һ’әтайе дьминә». Әв әw хәбәр ә, кӧ бь Мьзгинийе wәр’а һатә дайине.