Пәтрус I 3
[1] Ӧса жи к’ӧлфәтно, гӧр’а мере хwәда бьн, wәки жь wан һьнәк жи, һәгәр гӧһдарийа хәбәре накьн, бь п’әргалийа жьнед хwә, бе готьн жи бенә сәр баwәрийе
[2] гава п’әргалийа wәйә хофә у навә-намус бьбиньн.
[3] Бьра хәмьла wә дәрвава бь гӧливәгьртьне у т’ор’ед зер’а, йан жи бь к’ьнща нибә ,
[4] ле йа мәрьве һьндӧр’е дьлда, р’ӧһ’әки мьлук у гьранә бәдәwәтийа нәбәтал ә, кӧ ль бәр Хwәде п’ьр’ бь qимәт ә.
[5] Чьмки бәре бь ви тьһәри к’ӧлфәтед пирозә кӧ гӧмана хwә данибунә сәр Хwәде, хwә дьхәмьландьн, хәмьла wан әw бу кӧ гӧр’а мере хwә бькьрана,
[6] мина Сәрайе кӧ гӧр’а Бьраһимда бу у дьготә wи: «Хwәйе мьн». Иди һун qизед wе дейе нә, һәгәр һун хwә ль qәнщийе дьгьрьн у жь т’ӧ тьшти натьрсьн.
[7] Ӧса жи мерно, бь фә’мдарийе ә’мьре хwә т’әви жьнед хwә дәрбаз кьн, чаwа qьсьме сьст qәдьре wан бьгьрьн, ӧса жи чаwа һәвалwаре wе жийина кӧ һуне п’ешк’еш бьстиньн, wәки т’ӧ тьшт нәбьнә байисе дӧайед wә .
[8] Һәйнәсәр һ’әму жи сәр нетәке бьн, сәр һәв шәwат бьн, һәв һ’ьз бькьн, р’ә’м у шкәсти бьн.
[9] Жь бәр хьрабийева хьрабийе нәкьн, йан жь бәр беһӧрмәткьрьнева беһӧрмәткьрьне, ле жь бәр ванва дӧа-дьрозга ль wан бькьн, чьмки һун ве йәкер’а һатьнә газикьрьне, wәки дӧа-дьрозге создайи сәр wәда бе.
[10] Чьмки ньвисар ә: «К’и жийине бәгәм дькә у дьхwазә р’ожед хwәш бьбинә, бьра зьмане хwә жь хьрабийе хwәй кә у заре хwә жи жь һ’ьләк’арийе.
[11] Бьра жь хьрабийе вәгәр’ә, qәнщийе бькә у ә’дьлайийе бьгәр’ә, ль пәй wе һәр’ә.
[12] Чьмки ч’ә’ве Хӧдан ль сәр р’аста йә у гӧһе Wи сәр дӧайе wан ә, ле Хӧдан мьqабьли wан ә, йед кӧ хьрабийе дькьн».
[13] К’и wе хьрабийе ль wә бькә, һәгәр һун дәмана qәнщикьрьнеда бьн?
[14] Ле һәгәр һун бона р’астикьрьне щәфе жи бьбиньн, һунә хwәзьли нә! Иди жь мәрьва нәтьрсьн у хwә ӧнда нәкьн .
[15] Ле бәле Мәсиһ чаwа Хӧдане пироз дьле хwәда бьльнд бьгьрьн. Һәр гав һазьр бьн, щаба wан һ’әмуйа бьдьн, йед кӧ бона wе гӧмана нава wәда дьпьрсьн. Ле wе йәке бь хоф у мьлуктийе бькьн ,
[16] хwәйе исафа р’ьһ’әт бьн, wәки, гава һун бенә р’әзилкьрьне, йед кӧ п’әргалийа wәйә qәнщә т’әви Мәсиһ беһӧрмәт дькьн, шәрми бьн.
[17] Һе qәнщ ә, һәгәр qьрара Хwәде йә, әм бона qәнщийе щәфе бьк’ьшиньн, нә кӧ бона хьрабийе.
[18] Чьмки Мәсиһ щарәке бона һәр т’ьм бона гӧна щәфа к’ьшанд , Йе һәq бона нәһәqа, wәки мә незики Хwәде кә. Әw алийе бәдәнида һатә кӧштьне, ле алийе р’ӧһ’анида жийинер’а һатә вәгәр’андьне.
[19] Бь р’ӧһ’ани чу нава wан р’ӧһ’ед кәледа даннасин кьр,
[20] йед кӧ wәхтәке нә гӧһдар бун, гава Хwәде бь думька дьреж сәбьр дькьр, wи зәмане Нӧһда, гава гәми дьһатә чекьрьне. Wеда һьндьк, аwа готи һ’әйшт нәфс «нава аведа» хьлаз бун .
[21] Әw ав сурәте ньхӧмандьне бу, к’ижан ньһа wә хьлаз дькә. Әw ньхӧмандьн нә кӧ wә жь qьлера бәдәне дьшо, ле жь исафа р’ьһ’әт шә’дәтик ә ль бәр Хwәде . Әw йәк бь р’абуна Иса Мәсиһә жь мьрийа wә хьлаз дькә,
[22] Йе кӧ чуйә ә’змен, ль мьле Хwәдейи р’асте йә у мьлйак’әт, һ’ӧкӧмәт у qӧдрәтед р’ӧһ’ани бьн гӧр’а Wида нә.