[1] Әwед кӧ бьн нире хӧламтийеда нә, бьра ахайед хwә һ’әсаб кьн чаwа һежайи qәдьре бьльнд, wәки наве Хwәде у һинкьрьна мә нәйе беһӧрмәткьрьне.
[2] Ахайед к’ейә баwәрмәнд һәнә, бьра wан беһӧрмәт нәкьн, чьмки әw бьрайед һәв ьн. Ле бьра хӧлам һе р’ьнд хӧламтийе бькьн, чьмки йед кӧ к’аре жь хьзмәтк’арийа хӧлама дьстиньн, баwәрмәнд ьн у дәлал ьн. Ван тьшта һин кә у ширәт кә.
[3] Һәгәр йәк тьштәки дьн һин бькә у готьнед Хӧдане мә Иса Мәсиһә сахләм у һинкьрьна хwәдеп’арьстийа мә нә qайл ә,
[4] әw йәки к’ӧбар ә у тьштәки ньзанә. Әw нәхwәшийа шәр’ у дә’wава гьрти йә, жь wе жи пешда тен: Һ’әвсуди, нәйарти, готьнед нәр’еда, шькед хьраб
[5] у шәр’уди. Әв һ’әму тьшт жь нава мәрьвед qафсәqәт у жь р’астийе шуна р’әшва чуйи пешда тен. Әвана хwәденасийе һ’әсаб дькьн, чаwа канийа к’аре.
[6] Бәле хwәденаси к’ара сәр к’аре йә, һәгәр бь р’азибуне бә.
[7] Мә т’ӧ тьшт нәанийә дьне у әме нькарьбьн т’ӧ тьшти жи бьбьн .
[8] Ле к’ьнщ у хӧрәке мә һәбьн, бь wан әм р’ази бьн .
[9] Ле әwед кӧ дьхwазьн дәwләти бьн, тенә щер’ьбандьне, дьк’әвьнә т’әләка у гәләк тәмед ахмах у зийанк’ар, к’ижан мерьв нӧqи мират’ийе у wеранбуне дькьн .
[10] Чьмки п’әрәһ’ьзи каникә һәр щур’ә хьрабийе йә. Һьнәка хwә данә wе, жь баwәрийе хальфин у хwә кьрьнә хwәйе кӧл у дәрда.
[11] Ле тӧ, мәрьве Хwәде жь ван тьшта бьр’әвә у пәй һәqийе, хwәденасийе, баwәрийе, һ’ьзкьрьне, сәбьре у мьлуктийе һәр’ә.
[12] Ләща баwәрийеда qәнщ бьр’әвә, жийина һ’әта-һ’әтайе qазьнщ кә, к’ижанер’а тӧ һати газикьрьне у ль бәр гәләк шә’да тә әw иqрара qәнщ иqрар кьр.
[13] Ль бәр Хwәдейе кӧ ә’мьр дьдә һ’әму ә’фьрина у ль бәр Мәсиһ Исайе кӧ ль бәр Пилатойе Понтийо шә’дәтийа иqрара qәнщ да, әз т’әмийе дьдьм тә ,
[14] кӧ тӧ ве т’әмийе беләк’ә у беqӧсур хwәй ки, һ’әта хӧйабуна Хӧдане мә Иса Мәсиһ.
[15] Хӧйабуна Wи wе wәхте хwәда жь алийе Йе һежайи шькьрийе у Т’әнейи qәwат, П’адшайе п’адшайа у Хӧдане хӧданада ә’йан бә.
[16] Т’әне Әwи нәмьри йә, нава р’онайийеда йә, кӧ т’ӧ кәс нькарә незик бе. Т’ӧ qул-бәнда Әw нәдитийә у нә жи дькарә бьбинә. Qәдьр у qӧдрәта һ’әта-һ’әтайе Wир’а бә! Амин .
[17] Т’әмийе бьдә дәwләтийед ве дьне, бьра бабах нәбьн у гӧмана хwә нәдьнә сәр һәбука п’уч’ә дәрәw, ле ль сәр Хwәдейе кӧ һәр тьшти бь мәр’дани дьдә мә, wәки әм мьраз пе бькьн .
[18] Бьра qәнщийа бькьн, бь кьрьнед qәнщ дәwләти бьн, мәр’д бьн у п’арәвәкьрьнер’а жи һазьр.
[19] Бь ви тьһәри әwе хwәр’а хьзнәке т’оп кьн, һ’имәки qәнщ бона ахрәте, wәки wе жийина кӧ р’асти жийин ә qазьнщ кьн.
[20] Тимот’ейо! Чь кӧ ль тә һатә спартьне хwәй кә. Жь готьнед п’уч’ә һ’әрам у шәр’-дә’wа дур бә, кӧ бь дәрәw наве «занәбун» данә сәр.
[21] Һьнәка хwә данә ве йәке у бь ви аwайи жь баwәрийе хальфин. К’әрәма Хwәде wәр’а бә.