[1] Дьле каләмера нәешинә, ле дьл бьдә wан, чаwа баве хwә. Щаһьла чаwа бьрайед хwә һ’әсаб кә ,
[2] пира чаwа дийа хwә, к’ӧлфәтед щаһьл чаwа хушкед хwә, wәкә шире һ’әлал.
[3] Qәдьре жьнәбийа бьгьрә, йед кӧ бь ә’дәти жьнәби нә.
[4] Ле һәгәр зар’ йан нәвийед жьнәбике һәбьн, бьра әw зар’ пешийе мала хwәда һин бьн чаwа хwәденасийа хwә бьдьнә к’ьфше у бь ви тьһәри дәйне де у баве хwә вәгәр’иньн, чьмки әв йәк ль Хwәде хwәш те.
[5] Жьнәбийа ә’дәти әw ә, йа кӧ т’әне майә у гӧмана хwә данийә сәр Хwәде, шәв у р’ожед хwә бь дӧа у р’әща дәрбаз дькә.
[6] Ле йа кӧ к’ефа дьле хwәр’а йә, мьрийа нәч’ә’лкьри йә.
[7] Ван тьшта т’әми кә, wәки беләк’ә бьн.
[8] Ле һәгәр мәрьвәк бона хwәхатийа хwә, илаһи бона мала хwә хәм накә, әwи баwәри инк’ар кьрийә у жь нәбаwәра жи хьрабтьр ә.
[9] Бьра наве wе дәфт’әра жьнәбийада бе ньвисаре, к’ижан жь шест сали кемтьр нинә, щарәке жи меркьри буйә,
[10] бь кьрьнед qәнщва жи бәрбьч’ә’в ә: Мәсәлә, зар’ мәзьн кьрьбьн, меван qәбул кьрьбьн, ньгед баwәрмәнда шуштьбьн, дәст авитьбә к’әтийа у бона һәр шьхӧле qәнщ жи һазьр сәкьни йә.
[11] Ле жьнәбийед щаһьл qәбул нәкә, чьмки гава әвана тәме хwә хьраб дькьн, бәре хwә жь Мәсиһ дьгӧһезьн, дьхwазьн мер кьн
[12] у бь ви аwайи әви сущи һьлтиньнә сәр хwә, чьмки созе бәре данә алики.
[13] Сәрда жи мал бь мал дьгәр’ьн, хwәр’анәдити һин дьбьн, нә т’әне хwәр’анәдити нә, ӧса жи гьлигәр’о, т’әви шьхӧле хәлqе дьбьн у тьштед нәщайиз хәбәр дьдьн.
[14] Аwа әз дьхwазьм кӧ жьнәбийед щаһьл мер кьн, зар’а биньн у малкьр бьн, wәки зьмен нәкьнә дәве нәйара.
[15] Чьмки иди һьнәк жьнәбийед щаһьл хальфин, пәй мирещьн чун.
[16] Һәгәр жьнәбийед баwәрмәндәке һәбьн, бьра әw алик’арийа wан бькә у щьвине баргьран нәкә, wәки щьвин бькарьбә алик’арийа жьнәбийед ә’дәти бькә.
[17] Әw бәрпьрсийаред кӧ сәрwертийе р’ьнд дькьн, бьра дӧбарә һежайи qәдьр бьн, илаһи әwед кӧ хәбәрдан у һинкьрьнеда дьхәбьтьн.
[18] Чьмки ньвисар дьбежә: «Дәве гайе бедәреда дьхәбьтә гьренәдә» у «П’алә һежайи һәqе хwә йә» .
[19] Хәйба һьндава бәрпьрсийарда баwәр нәкә, һәгәр дӧ йан се шә’дә т’ӧнәбьн .
[20] Бәрпьрсийаред кӧ нава гӧнада дьминьн, ль бәр һ’әмуйа ле һьле, wәки йед майин жи бьтьрсьн.
[21] Әз ль бәр Хwәде, Мәсиһ Иса у мьлйак’әтед бьжарти дькьмә дәйне стуйе тә, кӧ тӧ ван ширәта бе т’агери хwәй ки, тьштәки бь фьрqийе нәки.
[22] Дәсте хwә зу данәйнә сәр йәки бона хьзмәтк’арийа Хӧдан, нә жи т’әви гӧнед йед майин би. Хwә паqьж хwәй кә .
[23] Жь вьр шунда т’әне аве вәнәхwә, ле һьнәки жи шәраве т’әв кә, бона щийе мәһ’андьна хwарьне, кӧ зу-зу нәхwәш дьк’әви.
[24] Һьнәк һәнә, кӧ гӧнед wан к’ьфш ьн у р’аст wан дьбьнә бәр диwане, ле гӧнед һьнәка жи паше wе к’ьфш бьн.
[25] Ӧса жи кьрьнед qәнщ к’ьфш ьн у әw кьрьнед кӧ нә к’ьфш ьн, әw жи вәшарти наминьн.