[1] Жь Паwлос, шандийе Мәсиһ Иса, бь ә’мьре Хwәдейе Хьлазкьре мә у Мәсиһ Исайе гӧмана мә,
[2] Тимот’ейойе лаwе хwәйи баwәрийедайи һәq-һ’әлалр’а: Дә бьра р’ә’м, к’әрәм у ә’дьлайи жь Бав Хwәде у Мәсиһ Исайе Хӧдане мә ль тә бә.
[3] Гава әз дьчумә Мәкәдонйайе, мьн һиви жь тә кьр, кӧ ль Әфәсе бьмини, wәки т’әмийе бьди чәнд кәса, кӧ һинкьрьна нәр’аст һин нәкьн
[4] у гӧһ нәдьнә ч’ьловискийа у р’әqәма сьлсьләта кӧ хьлазийа wан т’ӧнә. Әв йәк һе шәр’-дә’wа т’әвр’адькә, нә кӧ т’ьвдира Хwәдейә кӧ бь баwәрийе те наскьрьне мийасәр дькә.
[5] Сәре т’әмийе һ’ьзкьрьн ә, кӧ жь дьле сах, бь исафа р’ьһ’әт у жь баwәрийа бедӧр’ути йә.
[6] Һьнәк же дагәр’ийан у пәй готьнед п’уч’ к’әтьн.
[7] Дьхwазьн бьбьнә дәрсдаред Qануне, ле әw хwәха жи ньзаньн чь дьбежьн, нә жи wан тьштед кӧ дьдьнә зора хwә фә’м дькьн.
[8] Әм заньн кӧ Qанун qәнщ ә, һәгәр йәк бь qануни wе бьqәдинә.
[9] Бәле фә’мдари йә, кӧ qанун бона р’аста найе дайине, ле бона нәһәq у сәрһ’ьшка, бона нәп’ак у гӧнәк’ара, бона мьр’дар’ у һ’әрама, бона бавкӧж у декӧжа, бона меркӧжа,
[10] бенамуса, к’она, дьзед мәрийа, дәрәwин у шә’дәдәрәwа йә у бона һәр кәсед дьнә кӧ тьштед мьqабьли һинкьрьна сахләм дькьн.
[11] Әв һинкьрьн ль Мьзгинийа хwәйир’умәтә Хwәдейе һежайи шькьрийе дьгьрә, к’ижан ль мьн һатийә спартьне.
[12] Әз жь Мәсиһ Исайе Хӧдане мә р’ази мә, Йе кӧ qәwат да мьн, әз амьн һ’әсаб кьрьм, данимә сәр ве хьзмәтк’арийе.
[13] Мьн жи бәре Әw беһӧрмәт дькьр, дьзеранд у нәйарти ль Wи дькьр, ле р’ә’м ль мьн бу, чьмки мьн нәбаwәрийеда бь нәзанийа хwә кьрьн .
[14] К’әрәма Хӧдане мә п’ьр’ сәр мьнда р’ьжийа, т’әви баwәри у һ’ьзкьрьна Мәсиһ Иса.
[15] Ве готьнеда хельф т’ӧнә у лап һежайи qәбулкьрьне йә, кӧ: «Мәсиһ Иса һатә дьне, гӧнәк’ара хьлаз бькә», сәре к’ижана әз ьм.
[16] Ле бона wе йәке р’ә’м ль мьн бу, wәки Мәсиһ Иса сәр мьн, чаwа сәре гӧнәк’ара т’әмамийа сәбьра Хwә бьдә к’ьфше, чаwа нәхшәк бона wан, йед кӧ wе баwәрийа хwә Wи биньн, жийина һ’әта-һ’әтайе бьстиньн.
[17] Аwа бьра wи П’адшайе һ’әта-һ’әтайейи нәмьри у нәхӧйа, Хwәдейе бешьрики-беһәвалр’а һӧрмәт у р’умәт бә һ’әта-һ’әтайе! Амин.
[18] Ве т’әмийе әз дьдьмә тә, лаwе мьн Тимот’ейо, ль гора wан п’ехәмбәртийед кӧ пешда бона тә бун, wәки тӧ бь wан шәр’е хwәйи qәнщ бьки,
[19] дәст жь баwәрийе нәкә у исафа хwә р’ьһ’әт хwәй кә. Һьнәка әв йәк жь хwә дур хьстьнә, дәwра баwәрийа хwә wәлгәр’андьн.
[20] Жь wан бун, Һумәнайо у Скәндәр, йед кӧ мьн данә дәсте мирещьн, wәки әw һин бьн р’астийа Хwәде беһӧрмәт нәкьн.