<Titus ᑖᐃᑕᐢ 3

[1] ᒥᐢᑲᐋᐧᓱᒥᐠ ᑭᑕ ᓇᓇᐃᑕᐋᐧᒋᐠ ᐅᔭᓱᐁᐧᐊᐧ, ᑳ ᑭᐢᑕᑭᒋᑳᓱᔨᐟ, ᑭᑕ ᓇᓇᐦᐃᐦᑕᐦᑭᐠ, ᑭᑕ ᐊᐧᐁᐧᔨᑲᑕᑭᐠ ᑲᐦᑭᔭᐤ ᒥᔪ ᐊᑐᐢᑫᐃᐧᓇ,

[2] ᐁᑳ ᐊᐃᐧᔭ ᐊᔨᓯᔨᓂᐊᐧ ᑭᑕ ᒫᔨᐃᑖᒋᐠ, ᐁᑳ ᑭᑕ ᑭᑳᑐᐢᑭᒋᐠ, ᑭᑕ ᒥᔮᐧᑎᓯᒋᐠ, ᑭᑕ ᐋᐧᐸᐦᑕᐋᒋᐠ ᔪᐢᑳᑎᓯᐃᐧᐣ ᑲᐦᑭᔭᐤ ᐊᔨᓯᔨᓂᐊᐧ.

[3] ᒋᑫᒫ ᑭᔮᓈᐤ ᒥᓇ ᑲᔮᐢ ᑭ ᑭ ᑭᐢᑫᐧᔮᑎᓯᓈᓇᐤ ᐁ ᓴᓯᐱᑕᒪᕽ, ᐁ ᐊᐧᔦᓯᐃᑲᐃᐧᔭᕽ, ᓇᓈᑐᕽ ᒪᒋ ᒧᐢᑕᐁᐧᔨᑐᒧᐃᐧᓇ ᒥᓇ ᒥᔦᐧᔨᑕᒧᐃᐧᓇ ᐁ ᐊᑐᐢᑳᑕᒪᕽ, ᒪᒉᔨᑐᐃᐧᓂᕽ ᒥᓇ ᐃᓴᐋᐧᓇᑫᔨᑐᐃᐧᓂᕽ ᐁ ᐱᒫᑎᓯᔭᕽ ᐁ ᐸᑳᐧᓯᐁᐧᔭᕽ, ᐁ ᐸᑳᐧᑎᑐᔭᕽ.

[4] ᒫᑲ ᐃᐢᐱ ᐅ ᑭᑎᒫᑭᓈᑫᐃᐧᐣ ᑭᓭᒪᓂᑐ ᑯᐱᒫᒋᐦᐃᐁᐧᒥᓇᐤ ᒥᓇ ᐁ ᐃᓯ ᓵᑭᐋᐟ ᐊᔨᓯᔨᓂᐊᐧ ᐁ ᓄᑲᐧᓂᔨᐠ,

[5] ᓇᒪᐃᐧᔭ ᐊᑐᐢᑫᐃᐧᓇ ᐅᐦᒋ ᑲᐧᔭᐢᑭᑖᑎᓯᐃᐧᓂᕽ ᑭᔮᓇᐤ ᑎᐱᔭᐤ ᐁ ᑭ ᐃᑐᑕᒪᕽ, ᒫᑲ ᐁ ᐃᓯ ᑭᑎᒫᑭᓈᑯᔭᕽ ᑭ ᑭ ᐱᒫᒋᐃᑯᓇᐤ ᐁ ᑭᓯᐯᑭᓂᐁᐧᐠ ᑭᑖᐧᑦ ᓂᐦᑖᐃᐧᑭᐃᐁᐧᐃᐧᐣ ᒥᓇ ᐅᐢᑭ ᐅᓯᐃᐁᐧᐃᐧᐣ ᑳ ᑲᓈᑎᓯᐟ ᐊᐦᒑᕽ,

[6] ᑳ ᑭ ᐁᐧᔪᒋ ᓯᑭᓇᒫᑯᔭᕽ ᐃᐧᔭ ᐅᐦᒋ ᒋᓴᐢ ᙭ ᑯᐱᒫᒋᐦᐃᐁᐧᒥᓇᐤ;

[7] ᐁᑯᓯ ᐁ ᑳᐧᔭᐢᑳᐧᑎᓯᐊᐧᑭᒥᑲᐃᐧᔭᕽ ᐅ ᑭᓭᐋᐧᑎᓯᐃᐧᐣ ᐅᐦᒋ, ᐅᐟ ᐊᐋᐧᓯᒥᓴ ᑭᑕ ᐃᓯᐃᑲᐃᐧᔭᕽ ᐁ ᐃᑕᐢᑌᐠ ᑳ ᐃᓯ ᐸᑯᓭᔨᒧᔭᕽ ᑳᑭᑫ ᐱᒫᑎᓯᐃᐧᐣ.

[8] ᑖᐯᐧᒪᑲᐣ ᐃᑌᐧᐃᐧᐣ, ᒥᓇ ᐁᐊᐧᑯᓂ ᐅᐦᐃ ᓂ ᓇᑕᐁᐧᔨᑌᐣ ᑭᑕ ᐃᐧᐦᑕᒪᐣ ᓴᓱᑭᒧᐃᐧᓂᕽ ᐊᓂᑭ ᑳ ᑭ ᑖᐯᐧᑕᐋᐧᒋᐠ ᑭᓭᒪᓂᑐᐊᐧ ᑭᑕ ᐅᐦᒋ ᐋᑲᒣᔨᒧᒋᐠ ᑭᑕ ᐸᒥᑖᒋᐠ ᒥᔪ ᐊᑐᐢᑫᐃᐧᓇ. ᐁᐊᐧᑯᓂ ᐅᐦᐃ ᒥᔮᐧᓯᓇᐧ ᒥᓇ ᐋᐸᒋᐃᑲᐧᐠ ᐊᔨᓯᔨᓂᐊᐧᐠ;

[9] ᒫᑲ ᐊᔮᑳᐧᒥᓯᐢᑕ ᐱᑯᓇᑕ ᑲᑫᐧᒋᑐᐃᐧᓇ ᒥᓇ ᐋᔮᓂᐢᑫ ᐋᒋᒧᐃᐧᓇ, ᒥᓇ ᑭᑳᑐᐃᐧᓇ, ᒥᓇ ᓄᑎᓂᑐᐃᐧᓇ ᐅᔭᓱᐁᐧᐃᐧᐣ ᐅᐦᒋ; ᒋᑫᒫ ᓇᒪ ᓈᐣᑕᐤ ᐃᑖᐸᑕᓇᐧ ᒥᓇ ᒥᑐᓂ ᐱᑯᓇᑕ.

[10] ᓇᐢᐹᐨ ᑳ ᐃᓯ ᑖᐯᐧᑕᕽ ᐯᔭᑳᐧᐤ ᐊᐦᐳ ᓂᓵᐧᐤ ᑭ ᑲᑫᐢᑭᒪᒋ ᑭᔮᑦ ᐁᑳᐃᐧᔭ ᐱᓯᐢᑫᔨᑦ;

[11] ᐁ ᒫᔨᑫᐧᐢᑭᐟ, ᒥᓇ ᐁ ᐊᐧᓂᑐᑕᕽ, ᐁᑯᓯ ᐁ ᓈᓂᐳᒥᓱᐟ.

[12] ᐃᐢᐱ ᐃᑎᓴᐊᐧᑭ ᐋᕒᑎᒪᐢ ᑭᑕ ᓈᑎᐢᐠ, ᐊᐦᐳ ᑎᑭᑲᐢ, ᐋᑲᒣᔨᒧ ᑭᑕ ᐯ ᓇᑕᐋᐧᐸᒥᔭᐣ ᓂᑳᐸᓬᐃᓯᕽ; ᒋᑫᒫ ᐁᑯᑕ ᓂᐟ ᐃᑌᔨᑌᐣ ᑭᑕ ᐱᐳᓀᓯᔮᐣ.

[13] ᓯᓈᐢ ᐅᔭᓱᐁᐧᐃᐧᔨᓂᐤ ᒥᓇ ᐊᐹᓬᐊᐢ ᐋᑲᒥ ᐃᐧᒋᐃᐠ ᑳ ᐃᐧ ᓯᐯᐧᔪᑌᐅᒋᐠ, ᐁᑳ ᑫᑲᐧᐩ ᑭᑕ ᑭᐧᑕᒫᒋᐠ.

[14] ᑭᔮᑦ ᒫᑲ ᑭᐟ ᐃᔨᓂᒥᓇᐊᐧᐠ ᒥᓇ ᑭᑕ ᑭᐢᑭᓄᐦᐊᒫᑯᐃᐧᓯᐊᐧᐠ ᑭᑕ ᐸᒥᑖᒋᐠ ᒥᔪ ᐊᑐᐢᑫᐃᐧᓇ ᐁ ᐃᓯ ᓇᑕᐁᐧᔨᑖᑲᐧᑭ ᐁᑳ ᑭᑕ ᑭᐧᑕᒫᒋᐠ ᒥᓂᓯᐃᐧᐃᐧᐣ.

[15] ᑲᐦᑭᔭᐤ ᑳ ᐃᐧᒉᐃᐧᒋᐠ ᑭᐟ ᐊᑕᒥᐢᑳᑲᐧᐠ. ᐊᑕᒥᐢᑲᐃᐧᐠ ᐊᓂᑭ ᑳ ᓵᑭᐃᑯᔭᑯᐠ ᑖᐯᐧᔦᔨᑕᒧᐃᐧᓂᕽ. ᑭᓭᐋᐧᑐᑖᑯᐃᐧᐣ ᑭ ᑲ ᐃᐧ ᐃᐧᒉᐃᐧᑯᓈᐋᐧᐤ ᑲᐦᑭᔭᐤ.