<Titus ᑖᐃᑕᐢ 1

[1] ᐹᓬ ᐅᐟ ᐊᑐᐢᑫᔮᑲᓇ ᑭᓭᒪᓂᑐ ᒥᓇ ᐅᐟ ᐊᐹᐢᑎᓬᐃᒪ. ᒋᓴᐢ ᙭ ᐁ ᐃᑕᐢᑌᔨᐠ ᐅ ᑖᐯᐧᔦᔨᑕᒧᐃᐧᓂᔨᐤ ᑭᓭᒪᓂᑐ ᐅ ᓇᐊᐧᓱᓈᑲᓇ ᒥᓇ ᐁ ᑭᐢᑫᔨᑕᒥᕽ ᑖᐯᐧᐃᐧᐣ ᒪᓂᑐᐋᐧᑎᓯᐃᐧᓂᕽ ᑳ ᐃᑕᐢᑌᐠ,

[2] ᐁ ᐸᑯᓭᔨᒧᕽ ᑳᑭᑫ ᐱᒫᑎᓯᐃᐧᐣ ᐊᓂᒪ ᑭᓭᒪᓂᑐ ᐁᑳ ᑫ ᑭ ᑭᔭᐢᑭᐟ ᑳ ᑭ ᐊᓱᑕᒫᑫᐟ ᐯ ᒥᒋᒫᐨ ᐅᐦᒋ;

[3] ᒫᑲ ᐃᐧᔭ ᐃᔨᑯᕽ ᐁ ᐃᑌᔨᑕᕽ ᑳ ᑭ ᐋᐧᐸᐦᑕᐦᐃᐁᐧᐟ ᐅᐟ ᐃᑌᐧᐃᐧᐣ ᐊᓂᒪ ᐃᑌᐧᐃᐁᐧᐃᐧᓂᕽ ᑳ ᑭ ᐸᒥᓇᒧᐃᑲᐃᐧᔭᐣ ᐁ ᐃᑕᐢᑌᔨᐠ ᐅᔮᓱᐁᐧᐃᐧᐣ ᑭᓭᒪᓂᑐ ᑯᐱᒫᒋᐦᐃᐁᐧᒥᓇᐤ;

[4] ᐁ ᒪᓯᓇᐦᐊᒫᑖᐣ ᑖᐃᑕᐢ, ᑖᐯᐧ ᓂᐟ ᐊᐋᐧᓯᒥᐢ ᐁ ᐃᓯ ᐯᔭᑯᑕᔭᕽ ᑖᐯᐧᔦᔨᑕᒧᐃᐧᐣ; ᑭᓭᐋᐧᑐᑖᑯᐃᐧᐣ ᒥᓇ ᐯᔭᑕᑫᔨᒧᐃᐧᐣ ᑭ ᑲ ᐃᐧ ᐅᐦᒋᐢᑕᒫᐠ ᑭᓭᒪᓂᑐ ᐁᐧᔪᑖᐃᐧᕽ ᒥᓇ ᙭ ᒋᓴᐢ ᑯᐱᒫᒋᐦᐃᐁᐧᒥᓇᐤ.

[5] ᐁᐊᐧᑯ ᐅᒪ ᐅᐦᒋ ᑳ ᑭ ᓇᑲᑎᑖᐣ ᑲᕒᐃᑎᕽ, ᑭᑕ ᑲᐧᔭᐢᑲᐧᐢᑖᔭᐣ ᐊᓂᐦᐃ ᑳ ᓄᑌᐸᔨᑭ ᒥᓇ ᑭᑕ ᐅᔭᑭᒪᒋᐠ ᑫ ᓂᑳᓀᔨᑖᑯᓯᒋᐠ ᑎᑲᐠ ᐅᑌᓈᕽ ᑳ ᑭ ᐃᓯ ᐸᒥᓇᒧᐃᑖᐣ;

[6] ᑭᐢᐱᐣ ᐊᐃᐧᔭᐠ ᐁᑳ ᐁ ᐋᓀᐧᔨᑖᑯᓯᐟ, ᐁ ᐯᔭᑯᔨᐟ ᐃᐧᐊᐧ, ᐅᐟ ᐊᐋᐧᓯᒥᓴ ᐁ ᑖᐯᐧᑕᒥᔨᐟ, ᐁᑳ ᐁ ᐊᑖᒥᒥᒥᐦᐟ ᑭᐢᑫᐧᔮᑎᓯᐃᐧᐣ ᐊᐦᐳ ᓴᓯᐱᑕᒧᐃᐧᐣ.

[7] ᒋᑫᒫ ᑭᐦᒋ ᐊᔭᒥᐦᐁᐃᐧᔨᓂᐤ ᐱᑯ ᑭᑕ ᐁᑳ ᐋᓀᐧᔨᑖᑯᓯᐟ ᑖᐱᐢᑯᐨ ᑭᓭᒪᓂᑐ ᐅ ᐸᒥᐢᑕᒪᐋᐧᑲᓇ; ᐁᑳ ᐁ ᐯᔭᑫᐧᔨᒥᓱᐟ, ᐁᑳ ᑭᔨᐸ ᐁ ᑭᓯᐋᐧᓯᐟ, ᐁᑳ ᐁ ᑭᑲᐃᐧᑕᐢᑭᐟ, ᐁᑳ ᐁ ᐸᑲᒪᐃᑫᐢᑭᐟ, ᐁᑳ ᐁ ᑳᓴᑳᑎᓯᐟ ᒪᒋ ᐅᐦᑎᓯᐃᐧᐣ;

[8] ᒫᑲ ᑭᑕ ᓂᐦᑖ ᐱᐦᑐᑲᐦᐃᐁᐧᐟ, ᐁ ᓵᑭᑖᐟ ᑳ ᒥᔮᐧᓯᓂᔨᐠ, ᐁ ᐯᔭᑕᑭ ᒥᑐᓀᔨᒋᑲᓀᐟ, ᐁ ᑲᐧᔭᐢᑳᐧᑎᓯᐟ, ᐁ ᑲᓈᑎᓯᐟ, ᐁ ᓇᐃᔨᑯᑳᐧᑎᓯᐟ;

[9] ᐁ ᒥᒋᒥᓇᕽ ᑳ ᑖᐯᐧᐃᐧᓂᐊᐧᓂᔨᐠ ᐃᑌᐧᐃᐧᐣ ᑳ ᐃᑕᐢᑌᐠ ᑭᐢᑭᓄᐦᐊᒫᑫᐃᐧᐣ, ᑭᑕ ᑲᐢᑭᑖᐟ ᑭᑕ ᓯᑭᑫᒧᐟ ᑳ ᐱᒫᑎᓯᐢᑳᑫᐠ ᑲᑫᐢᑫᐧᐃᐧᐣ, ᒥᓇ ᑭᑕ ᑲᐢᑭᒫᐟ ᐅᑖᓀᐧᑕᒧᐊᐧ.

[10] ᒋᑫᒫ ᒥᐦᒉᑎᐊᐧᐠ ᑳ ᓴᓯᐱᑕᑭᐠ ᐊᔨᓯᔨᓂᐊᐧᐠ, ᐱᑯᓇᑕ ᐁ ᐱᑭᐢᑫᐧᒋᐠ ᒥᓇ ᐁ ᐊᐧᔦᓯᐃᐁᐧᒋᐠ ᐅᓵᑦ ᐅᑎ ᐊᓂᑭ ᓴᕒᑲᑦᓴᐃᓯᐃᐧᐃᐧᐣ ᑳ ᐃᐧᒋᐃᐁᐧᒋᐠ,

[11] ᐁᐊᐧᑯᓂᐠ ᐱᑯ ᑭᑕ ᑭᐳᑐᓀᐅᐦᒋᐠ; ᐊᔨᓯᔨᓂᐊᐧᐠ ᑳ ᓂᓯᐊᐧᓈᒋᑖᒋᐠ ᒫᒥᓯᐁᐧ ᐋᐧᐢᑳᐦᐃᑲᓇ, ᐁ ᑭᐢᑭᓄᐦᐊᒫᑫᒋᐠ ᐊᓂᐦᐃ ᐁᑳ ᐁ ᐃᑕᐢᑌᔨᑭ ᑭᑕ ᑭᐢᑭᓄᐦᐊᒫᑫᒋᐠ, ᒪᒋ ᐅᐦᑎᓯᐃᐧᐣ ᐅᐦᒋ.

[12] ᐯᔭᐠ ᐃᐧᔭᐋᐧᐤ ᐅᐦᒋ, ᐃᐧᔭᐋᐧᐤ ᐅᑭᐢᑭᐁᐧᐦᐃᑫᐃᐧᔨᓂᒥᐋᐧᐊᐧ, ᑭ ᐃᑌᐧᐤ, ᑲᕒᐃᑕᓇᐠ ᑳᑭᑫ ᑭᔮᐢᑭᐢᑭᐊᐧᐠ, ᒪᒋ ᐱᓯᐢᑭᐊᐧᐠ, ᑭᑎᒥᑲᓂ ᐅᒥᐢᑕᒋᑫᐊᐧᐠ.

[13] ᑖᐯᐧᐤ ᐊᐊᐧ ᑳ ᐃᑌᐧᐠ. ᐁᐊᐧᑯ ᐅᐦᒋ ᒫᑲ ᓱᐦᑭ ᑭᑕᐦᐊᒪᐃᐧᐠ, ᑭᑕ ᒪᐢᑲᐃᐧᓯᒋᐠ ᑖᐯᐧᔦᔨᑕᒧᐃᐧᓂᕽ,

[14] ᐁᑳ ᑭᑕ ᓇᑐᑕᐦᑭᐠ ᒍᐃᐧ ᐊᑕᔪᑳᓇ ᒥᓇ ᐅᔭᓱᐁᐧᐃᐧᓂᔨᐊᐧ ᐊᔨᓯᔨᓂᐊᐧ ᑳ ᑫᐧᐢᑭᓂᐁᐧᔨᐟ ᑖᐯᐧᐃᐧᓂᕽ ᐅᐦᒋ.

[15] ᑳ ᐯᑭᓯᒋᐠ ᑲᐦᑭᔭᐤ ᑫᑲᐧᐩ ᐯᑲᓂᔨᐤ; ᒫᑲ ᐊᓂᑭ ᐁᑳ ᑳ ᐯᑭᓯᒋᐠ ᒥᓇ ᐁᑳ ᑳ ᑖᐯᐧᑕᐦᑭᐠ ᓇᒪ ᑫᑲᐧᐩ ᐯᑲᓂᔨᐤ; ᒫᑲ ᑖᐱᐢᑯᐨ ᐅ ᒥᑐᓀᔨᒋᑲᓂᐋᐤ ᒥᓇ ᐅ ᑭᐢᑫᔨᒥᓱᐃᐧᓂᐋᐧᐤ ᓇᒪᐃᐧᔭ ᐯᑲᓂᔨᐤ.

[16] ᑭᐢᑫᔨᒫᓈᐣ ᑭᓭᒪᓂᑐ ᐃᑖᐧᓱᐊᐧᐠ; ᒫᑲ ᐃᐧᔭ ᐅᐟ ᐃᓯᐦᒋᑫᐃᐧᓂᐋᐧᐊᐧ ᐅᐦᒋ ᐋᓀᐧᑕᐁᐧᐊᐧᐠ, ᐁ ᐸᑳᐧᑎᑯᓯᒋᐠ ᒥᓇ ᐁ ᓴᓯᐱᑕᑭᐠ ᒥᓇ ᑲᐦᑭᔭᐤ ᒥᔪ ᐊᑐᐢᑫᐃᐧᓇ ᐁ ᐸᑳᐧᑕᑭᐠ.