[1] ᑭᐟ ᐊᔮᑳᐧᒥᒥᑎᐣ ᐁ ᐋᐧᐸᒥᑯᔭᕽ ᑭᓭᒪᓂᑐ, ᒥᓇ ᙭ ᒋᓴᐢ ᑫ ᐅᔭᓱᐋᐧᑖᐟ ᐅᐱᒫᑎᓯᐊᐧ ᒥᓇ ᐅᓂᐱᐊᐧ, ᒥᓇ ᐅ ᓄᑯᓯᐃᐧᐣ ᒥᓇ ᐅᐟ ᐅᑌᓇᐃᐧᐃᐧᐣ ᐅᐦᒋ;
[2] ᑲᑫᐢᑭᑫᒧ ᐃᑌᐧᐃᐧᐣ; ᐋᑲᒣᔨᒧ ᓀᐃᐸᔨᑭ ᒥᓇ ᐁᑳ ᓀᐃᐸᔨᑭ; ᒫᒥᓀᒥᐁᐧ, ᑭᑕᐊᒫᑫ, ᓯᑭᑫᒧ, ᒥᓯᐁᐧ ᓯᐱᔭᐁᐧᓯᐃᐧᓂᕽ ᒥᓇ ᑭᐢᑭᓄᐦᐊᒫᑫᐃᐧᓂᕽ.
[3] ᒋᑫᒫ ᑭᑕ ᐅᑎᐦᒋᐸᔨᐤ ᐃᑕ ᐁᑳ ᑫ ᓯᐯᔨᑕᐦᑭᐠ ᑭᑕ ᓇᑐᐦᑕᐦᑭᐠ ᑳ ᐋᐸᒋᐃᐁᐧᐠ ᑲᑫᐢᑭᑫᒧᐃᐧᐣ; ᒫᑲ ᐁ ᑭᔭᑭᑕᐊᐧᑫᒋᐠ ᑭᑕ ᒫᐊᐧᓴᑯᓇᒫᓱᐊᐧᐠ ᐅᑭᐢᑭᓄᐦᐊᒫᑫᐊᐧ ᐁ ᐃᓯ ᒪᒋ ᒧᐢᑕᐁᐧᔨᑕᐦᑭᐠ;
[4] ᐁᑯᓯ ᑭᑕ ᐊᑎᒥᐢᑫᐧᔨᐢᑕᑭᐠ ᑖᐯᐧᐃᐧᐣ ᒥᓇ ᑭᑕ ᐸᐢᑫᑐᑕᑭᐠ ᐋᑕᔪᑲᓇ.
[5] ᒫᑲ ᑭᔭ ᐊᔮᑳᐧᒥᓯ ᒥᓯᐁᐧ ᐃᓯ, ᓯᐯᔨᑕ ᐊᔨᒥᓯᐃᐧᓂᕽ, ᐃᑐᑕ ᒥᔭᐧᒋᒧᐃᐧᔨᓂᐤ ᐅᐟ ᐊᑐᐢᑫᐃᐧᐣ, ᑎᐱᑐᑕ ᑭ ᐸᒥᐢᑖᑫᐃᐧᐣ.
[6] ᒋᑫᒫ ᓵᓴᐩ ᓂ ᐸᑭᑎᓂᑲᐃᐧᐣ ᐅᑎᐦᒋᐸᔨᐤ ᐁᑲᐧ ᑭᑕ ᓯᐯᐧᑌᔭᐣ.
[7] ᓂ ᑭ ᓄᑎᓂᑳᐣ ᒥᔪ ᓄᑎᓂᑫᐃᐧᐣ, ᓂ ᑭᓯᐱᐢᑫᐣ ᑲᑫᐧᒋᐢᑲᓯᐁᐧᐃᐧᐣ, ᓂ ᑭ ᑲᓇᐁᐧᔨᑌᐣ ᑖᐯᐧᔦᔨᑕᒧᐃᐧᐣ;
[8] ᐁᑲᐧ ᓂ ᑲᐧᔮᑕᐢᑕᒫᑲᐃᐧᐣ ᐊᓂᒪ ᑲᐧᔭᐢᑳᐧᑎᓯᐃᐧᓂ ᐊᐢᑐᑎᐣ ᑳ ᑎᐯᔨᐦᒋᑫᐟ ᑲᐧᔭᐢᐠ ᑳ ᐅᔭᓱᐁᐧᐟ ᑫ ᒥᔨᐟ ᐁᐊᐧᑯ ᑭᓯᑳᑭ; ᓇᒪᐃᐧᔭ ᒫᑲ ᐱᑯ ᓂᔭ ᒫᑲ ᑲᐦᑭᔭᐤ ᐊᓂᐦᐃ ᑳ ᑭ ᓵᑭᑖᔨᐟ ᐅ ᓄᑯᓯᐃᐧᐣ.
[9] ᐋᑲᒣᔨᒧ ᑭᔨᐸ ᑭᑕ ᐯ ᓇᑕᐋᐧᐸᒥᔭᐣ;
[10] ᒋᑫᒫ ᑎᒫᐢ ᓂ ᑭ ᓇᑲᑎᐠ ᐁ ᑭ ᓵᑭᑖᐟ ᐅᒪ ᐊᐢᑭ ᐁᑯᓯ ᑭ ᐃᑐᐦᑌᐤ ᑌᓴᓬᐊᓇᐃᑲᐃᕽ; ᑲᕒᐁᓯᐣᐢ ᑭ ᐃᑐᐦᑌᐤ ᑲᓬᐁᓯᔭᐃᕽ, ᑖᐃᑕᐢ ᑖᓬᒣᓯᔭᐃᕽ,
[11] ᓬᐅᐠ ᐱᑯ ᓂ ᐃᐧᒉᐃᐧᐠ. ᐅᑎᐣ ᒫᕒᐠ ᒥᓇ ᐯᓯᐤ; ᒋᑫᒫ ᓂᐟ ᐋᐸᒋᐃᐠ ᐁ ᐸᒥᐢᑖᑫᐟ.
[12] ᒫᑲ ᑎᑭᑲᐢ ᓂ ᑭ ᐃᓯᑎᓴᐋᐧᐤ ᐁᐱᓴᓯᕽ.
[13] ᐊᓂᒪ ᐊᑲᐧᓂᐃᐧᐣ ᑳ ᑭ ᓇᑲᑕᒫᐣ ᑕᕒᐅᐋᓯᕽ ᐁ ᑲᓇᐁᐧᔨᑕᕽ ᑳᕒᐸᐢ ᐯᑖ ᐯ ᐃᑐᑌᔭᓂ ᒥᓇ ᒪᓯᓇᐦᐃᑲᓇ ᐅᓵᒼ ᒫᑲ ᐊᐱᓀᑭᓇᐧ.
[14] ᐋᓬᐃᐠᓵᐣᑕᕒ ᐊᓇ ᐅᓵᐋᐧᐱᐢᐠ ᐅᔭᐃᓱ ᒥᐢᑕᐦᐃ ᓂ ᑭ ᒫᔨᑐᑖᐠ; ᑳ ᑎᐯᔨᐦᒋᑫᔨᐟ ᑭᑕ ᑎᐸᐦᐊᒫᐠ ᐁ ᐃᑕᐢᑌᔨᑭ ᐅᐟ ᐃᓯᐦᒋᑫᐃᐧᓇ;
[15] ᐁᐊᐧᑯ ᑭᐢᑕ ᐊᔮᑳᐧᒥᓯᐢᑕᐤ; ᒋᑫᒫ ᒥᐢᑕᐦᐃ ᑭ ᓇᑳᐢᑲᑦ ᑭᐟ ᐃᑌᐧᐃᐧᓂᓇᐊᐧ.
[16] ᓂᐢᑕᑦ ᐁ ᐱᑭᐢᑫᐧᐢᑕᒪᓱᔮᐣ ᓇᒪᐃᐧᔭ ᐊᐃᐧᔭᐠ ᓂ ᓈᑕᒫᐠ ᒫᑲ ᑲᐦᑭᔭᐤ ᓂ ᓇᑲᑎᑲᐧᐠ; ᐱᑕᓀ ᐁᑳ ᐊᑭᑕᒫᐦᒋᐠ ᐁᐊᐧᑫᐧᔨᐤ.
[17] ᒫᑲ ᑳ ᑎᐯᔨᐦᒋᑫᐟ ᓂ ᑭ ᐃᐧᒋᑳᐸᐃᐧᐢᑖᐠ ᒥᓇ ᓂ ᑭ ᒪᐢᑲᐃᐧᓯᐦᐃᐠ; ᓂᔭ ᐅᐦᒋ ᐃᐧᐦᑕᒫᑫᐃᐧᐣ ᑭᑕ ᒥᑐᓂ ᐯᑖᑲᐧᕽ ᐁᑯᓯ ᑲᐦᑭᔭᐤ ᒉᐣᑕᐃᓬᐊᐠ ᑭᑕ ᐯᐦᑕᐦᑭᐠ; ᓂ ᑭ ᐸᐢᐱᐃᑲᐃᐧᐣ ᒫᑲ ᐅᑐᓂᕽ ᒥᐢᑕᑫᓯᐤ.
[18] ᑳ ᑎᐯᔨᐦᒋᑫᐟ ᒫᑲ ᓂ ᑲ ᐸᐢᐱᐦᐃᐠ ᑲᐦᑭᔭᐤ ᒪᒋ ᐃᓯᐦᒋᑫᐃᐧᓂᕽ ᐅᐦᒋ ᒥᓇ ᓂ ᑲ ᐱᒫᒋᐃᐠ ᐅ ᑭᐦᒋ ᑭᓯᑯᐃᐧ ᐅᑌᓇᐃᐧᐃᐧᓂᕽ; ᐁᐊᐧᑯ ᑭᑕ ᐊᔮᐤ ᑭᐢᑌᔨᑖᑯᓯᐃᐧᐣ ᑳᑭᑫ ᒥᓇ ᑳᑭᑫ. ᐋᒣᐣ.
[19] ᐊᑕᒥᐢᑲᐃᐧᐠ ᐸᕒᐃᐢᑲ ᒥᓇ ᐊᑭᐧᓬᐊ ᒥᓇ ᑳ ᐃᑕᓯᐟ ᐃᐧᑭᕽ ᐋᓀᓯᐸᕒᐊᐢ.
[20] ᐃᕒᐋᐢᑕᐢ ᑭ ᑭᓵᒋᐤ ᑳᕒᐃᐣᑎᕽ; ᒫᑲ ᑕᕒᐋᐱᒪᐢ ᓂ ᑭ ᓇᑲᑖᐤ ᒫᐧᓬᐃᑕᓯᕽ ᐁ ᐋᑯᓯᐟ.
[21] ᑲᑫᐧᑲᐢᑭᑖ ᑭᑕ ᐯ ᐁᑐᐦᑌᔭᐣ ᒪᐧᔦᐢ ᐱᐳᕽ. ᔪᐳᓬᐊᐢ ᑭᐟ ᐊᑕᒥᐢᑳᐠ ᒥᓇ ᐳᑎᐣᐢ ᒥᓇ ᓬᐊᐃᓇᐢ ᒥᓇ ᑲᓬᐋᑎᔭ ᒥᓇ ᑲᐦᑭᔭᐤ ᐅᒋᐋᐧᒥᒫᐊᐧᐠ.
[22] ᑲ ᑎᐯᔨᐦᒋᑫᐟ ᑭ ᑲ ᐃᐧ ᐃᐧᒉᐃᐧᐠ ᑭᐟ ᐊᐦᒑᐦᑯᕽ. ᑭᓭᐋᐧᑐᑖᑯᐃᐧᐣ ᑭ ᑲ ᐃᐧ ᐃᐧᒉᐃᐧᑯᐣ.